كىتاپتا بوكسشىنىڭ ءومىر جولى قىسقاشا باياندالىپ, وعان ارنالعان 35 اۆتوردىڭ 45 ولەڭى تۇرىك تىلىنە اۋدارىلىپ بەرىلگەن. سونىمەن قاتار ەڭبەكتە بەكزات ساتتارحانوۆ تۋرالى جاريالانعان كىتاپتاردىڭ ءتىزىمى ەنگىزىلگەن. وقىرماندار چەمپيون تۋرالى ەلىمىزدىڭ بەلگىلى تۇلعالارىنىڭ, سپورتشىلاردىڭ, سيدنەي وليمپياداسىنداعى قارسىلاستارىنىڭ پىكىرلەرىمەن دە تانىسا الادى.
جيناقتى قۇراستىرۋشى – ەرجان ارعىنباەۆ. اۆتور ءار جىلدارى گازەت-جۋرنالداردا جاريالانعان ولەڭدەردى جيناقتاپ, الدىمەن قازاق تىلىندە كىتاپ ەتىپ شىعارعان. كەيىن ەڭبەكتى ءوزى تۇرىك تىلىنە اۋدارىپ, تۇركيادا جاريالاۋعا ۇسىنعان.
جيناق ەۋرازيا جازۋشىلار وداعىنا قاراستى «Bengü» باسپاسىنان جارىق كوردى. انكارادا ورنالاسقان بۇل ۇيىم تۇركى حالىقتارىنىڭ ادەبيەتى, مادەنيەتى مەن تاريحىنا قاتىستى ەڭبەكتەردى تۇرىك تىلىندە شىعارىپ كەلەدى. وسى ۋاقىتقا دەيىن باسپادان تۇركى دۇنيەسىنە ارنالعان مىڭعا جۋىق كىتاپ جارىق كورسە, ولاردىڭ سەكسەنگە جۋىعى قازاقستان تاقىرىبىنا ارنالعان.
كىتاپتىڭ تۇرىك تىلىندە شىعۋىنا ەۋرازيا جازۋشىلار وداعىنىڭ توراعاسى, عالىم-اۋدارماشى ۋفۋك تۋزمان قولداۋ كورسەتكەن.
اۆتوردىڭ ايتۋىنشا, كىتاپتىڭ باستى ماقساتى – چەمپيوننىڭ ونەگەلى ءومىرىن كەيىنگى بۋىنعا تانىتىپ, ۇلگى ەتۋ. تۇركى حالىقتارىنا ورتاق قۇندىلىقتاردى ناسيحاتتاۋعا باعىتتالعان بۇل جوبا ەكى ەل اراسىنداعى مادەني-گۋمانيتارلىق بايلانىستى نىعايتۋعا دا ۇلەس قوسپاق.
