«مەملەكەت باسشىسى ءوزىنىڭ حالىققا جولداۋىندا بالالارعا جاقسى جاعداي تۋعىزىپ, ورتا ءبىلىمنىڭ ساپاسىن ارتتىرۋ جونىندە ايتقان بولاتىن. «ەلىمىزدىڭ كادرلىق الەۋەتىن ارتتىرۋ ىسىندە ورتا ءبىلىم بەرۋ جۇيەسى وتە ماڭىزدى ءرول اتقارادى. مەنىڭ تاپسىرماممەن «جايلى مەكتەپ» ۇلتتىق جوباسى جۇزەگە اسىرىلىپ جاتىر. 2025 جىلدىڭ سوڭىنا دەيىن زاماناۋي ۇلگىدەگى 217 مەكتەپ پايدالانۋعا بەرىلەدى دەپ جوسپارلانعان. وسى وتە ماڭىزدى جۇمىستى «سامۇرىق-قازىنا» قورى قاداعالاپ وتىر. ۇكىمەت پەن اكىمدەر بۇل شارۋاعا بەلسەنە اتسالىسۋعا ءتيىس. دەپۋتاتتار دا ورتاق ىستەن شەت قالمايدى دەپ ويلايمىن» دەگەن ەدى پرەزيدەنت. سوڭعى ەكى جىل ىشىندە وبلىستا جاڭادان 22 مەكتەپ بوي كوتەردى. وسى «جايلى مەكتەپ» جوباسى اياسىندا 2025 جىلى باتىس قازاقستان وبلىسىندا تاعى 6 مەكتەپتىڭ قۇرىلىسى جۇرەدى», دەدى ءوز سوزىندە ناريمان تورەعاليەۆ.
وبلىس اكىمىنىڭ ايتۋىنشا, كوكتەمگى سۋ تاسقىنىنان زارداپ شەگۋشىلەرگە كوپ ءۇي سالىنعان «جۇلدىز» شاعىناۋدانىندا دا جاڭا مەكتەپ سالىناتىن بولادى.
سالتاناتتى جيىنعا «Samruk-Kazyna Construction» اكتسيونەرلىك قوعامى باسقارما توراعاسىنىڭ ۇلتتىق جوبالار جانە وڭىرلىك دامۋ جونىندەگى ورىنباسارى قۋات جىلقىباەۆ, قۇرىلىس نىسانىنىڭ باس مەردىگەرى «KazConstuction Group» جشس ديرەكتورى مۇراتبەك مۇحامبەديەۆ جانە ءبىلىم ۇيىمدارىنىڭ قىزمەتكەرلەرى مەن ارداگەرلەر, اتا-انالار قاتىستى. جەرگىلىكتى تۇرعىندار تاراپىنان قايروللا ايتقالي ۇلى ءسوز الىپ, وسىنداي عاجايىپ ءبىلىم ورداسىن تارتۋ ەتكەن مەملەكەت باسشىسىنا, قۇرىلىسشىلارعا العىسىن ايتتى. مەكتەپتىڭ سيمۆوليكالىق كىلتى مەكتەپ ديرەكتورى جاقسىعالي جۇمابايعا تابىس ەتىلدى.
جايلى مەكتەپتىڭ اۋماعى ادەتتەگى ءبىلىم وشاقتارىنا قاراعاندا كەڭىرەك, ال تەحنيكالىق جابدىقتالۋى 4 ەسە ارتىق. جالپى اۋماعى – 3 گا, عيماراتتىڭ اۋدانى – 2 گا. مەكتەپ ءۇش قاباتتى, 10 بلوكتان تۇرادى. كىرىپ-شىعۋ ەسىكتەرىنە تۋرنيكەت قويىلعان. بالالار ءۇشىن بەينەباقىلاۋ جۇيەسى, دىبىستىق حابارلاۋ جانە باسقا دا كۇشەيتىلگەن قاۋىپسىزدىك شارالارى ورناتىلعان. ءورت قاۋپىنە قارسى بروندالعان بولمە بار.
مەكتەپ وقۋشىلاردىڭ وقۋ قۇرالىن, كيىمىن قويۋعا ارنالعان جەكە شكافتارمەن جابدىقتالعان. سونداي-اق كىتاپ وقۋعا, بالالاردىڭ شىعارماشىلىق دامۋى مەن دەمالۋىنا ءتيىستى بارلىق جاعداي جاسالعان. 4 سپورت زالى, 3 شەبەرحانا, 56 سىنىپ, 18 ارنايى كابينەت, كىتاپحانا, ءماجىلىس زالى, اسحانا بار. كابينەتتەرگە touch-ەكراندار ورناتىلعان. مەكتەپتىڭ كەز كەلگەن جەرىنەن جىلدامدىعى جوعارى ينتەرنەتكە قوسىلۋعا بولادى. بالالارعا ارنالعان مۋزىكالىق اسپاپتار, سونىڭ ىشىندە 50 دومبىرا دا قامتىلعان.
ارينە, جاڭا عيماراتتا ەرەكشە بالالار ءۇشىن دە كەدەرگىسىز قوزعالۋعا ارنالعان پاندۋستار, ليفت, ارنايى دارەتحانا جانە ينكليۋزيۆتى ءبىلىم بەرۋ كابينەتى جاساقتالىپتى. مەكتەپ اۋماعىندا سپورتپەن شۇعىلدانۋعا جانە باسقا دا ءىس-شارالارعا ارنالعان الاڭدار جاسالعان. مەكتەپ عيماراتىن جوبالاۋشى – «AQMOL project» جشس بارلىق جاعدايدى ەسكەرگەن ەكەن. قۇرىلىستىڭ جالپى قۇنى 7,8 ملرد تەڭگە ەكەندىگى حابارلاندى.
ايتا كەتەيىك, عيمارات ءۇش قاباتتى جانە جەرتولەسى بار. مەكتەپتىڭ سول قاناتى – باستاۋىش سىنىپتارعا, سول قاناتى – ورتا جانە جوعارى سىنىپتارعا ارنالعان, ورتاڭعى بولىگىندە جالپى مەكتەپ جايلارىنا ارنالعان بلوكتار ورنالاسقان. مۇندا سپورت زالدىڭ ءوزى – تورتەۋ, باستاۋىش سىنىپ وقۋشىلارى ءۇشىن ەكى زال بولسا, ورتا جانە جوعارى سىنىپتار ءۇشىن بولەك تاعى سپورت زالدارى بار. شەبەرحانالاردىڭ شىعۋ ەسىگى بولەك. ال 190 ورىندىق اكت زالى ورتالىق بلوكتىڭ ەكىنشى قاباتىندا ورنالاسقان. 378 ورىندىق اسحانانىڭ كىرەتىن ەسىگى ۇشەۋ: جوعارى جانە باستاۋىش سىنىپ وقۋشىلارى بولەك قاتىنايدى. ءۇشىنشى قاباتتا ورتالىق بولىكتە كىتاپحانا جانە بىرنەشە كوۆوركينگ الاڭى بار. مۋزىكا سىنىبى مەن حورەوگرافيا كابينەتى جوعارى جانە كىشى بۋىندار بلوگىنىڭ تۇيىسكەن جەرىندە ورنالاسقان.
جاڭا مەكتەپ اشىلعان دەركۇل كەنتىندە وسى كەزگە دەيىن جۇمىس ىستەپ كەلگەن №49 مەكتەپ ءۇش اۋىسىمدا ءبىلىم بەرەتىن ەدى. ەندى ونىڭ جۇكتەمەسى ازايىپ, 1097 وقۋشى, 97 پەداگوگ جاڭا مەكتەپكە كوشەدى دەپ جوسپارلانىپ وتىر.
باتىس قازاقستان وبلىسى
