فوتو: اقوردا
بيىل وليمپيادا جىلى بولعانى بارشاعا بەلگىلى. ەل قۇراماسى ءدۇبىرلى دودادا دەربەس مەملەكەت رەتىندە 8 رەت باق سىنادى. تورتجىلدىقتىڭ باستى باسەكەسىنە جولداما يەلەنگەن 80 اتلەتىمىز جارىس جولىنا شىقتى. وليمپ شىڭىن 60 كەلىدە تاتاميگە شىققان ەلدوس سمەتوۆ باعىندىرىپ, قازاقستان قورجىنىنا التىن مەدال سالدى. سمەتوۆتىڭ بۇل جەڭىسى تاۋەلسىز قازاقستان تاريحىندا دزيۋدودان ەنشىمىزگە بۇيىرعان العاشقى «التىن» بولىپ تىركەلدى.
وسى سپورت تۇرىنەن ەكىنشى جۇلدەنى 66 كەلىدە عۇسمان قىرعىزباەۆ جەڭىپ الدى. ول پاريج وليمپياداسىنىڭ قولا جۇلدەگەرى اتاندى. كوركەم گيمناستيكادان تاريحي كۇمىس مەدالدى - ناريمان قۇربانوۆ تارتۋ ەتتى. ناريمان ات ۇستىندەگى جاتتىعۋدى ەڭ ءبىرىنشى بولىپ ورىنداپ, 15.433 ۇپايدى ەسەبىنە جازدى. ول بازالىق قيىندىعى 6.7-گە تەڭ جاتتىعۋدى ءساتتى ورىنداپ شىقتى. بۇل جەتىستىك قازاقستان تاريحىنداعى سپورتتىق گيمناستيكاداعى تۇڭعىش مەدال ەكەنىن اتاپ وتكەن ءجون.
پاريج وليمپياداسىندا بىلعارى قولعاپ شەبەرلەرى اراسىنان نۇربەك ورالباي كوپشىلىكتى كۇمىس جۇلدەمەن قۋانتسا, قىزدار اراسىنان نازىم قىزايباي ءوزى قاتىسقان العاشقى وليمپياداسىن قولا جۇلدەمەن قورىتىندىلادى.
ەركىن كۇرەستەن 36 جاستاعى دەمەۋ جادىراەۆتىڭ التىنعا بەرگىسىز كۇمىسى دە ەل قۇراماسىنا ەرەكشە سەرپىن بەردى.
قازاقستان مەن گەرمانيا كومانداسى اراسىنداعى پنەۆماتيكالىق ۆينتوۆكادان 10 مەتر قاشىقتىققا ارالاس جۇپتىق نىسانادان كوزدەۋ تارتىسىندا ءبىزدىڭ ەل مەرەيى ۇستەم بولدى. وسى سىندا ەل نامىسىن قورعاعان الەكساندرا لە مەن يسلام ساتپاەۆ وسىلايشا قولا جۇلدەگە قول جەتكىزدى.
وسىلايشا ۇلتتىق قۇراما وليمپيادا ويىندارىندا 1 التىن, 3 كۇمىس, 3 قولا جۇلدەمەن كوماندالىق ەسەپتە 43-ورىنعا جايعاستى.
پاريجدەگى XVII پاراليمپيادادا قانجىعامىزعا 9 مەدال ءتۇستى. بۇل دوداعا 9 سپورت تۇرىنەن 33 ليتسەنزيا العان 44 سپورتشى قاتىستى. پاۋەرليفتينگتەن 54 كەلى سالماقتا سىنعا تۇسكەن سپورتشىمىز داۆيد دەگتيارەۆ 188 كەلى كوتەرىپ التىن مەدال يەلەنىپ, ەكىنشى رەت وليمپيادا چەمپيونى اتاعىن قورعاپ قالدى. پاراليمپيادالىق دزيۋدودان 48 كەلى سالماقتا اقمارال ناۋاتبەك چەمپيون اتاندى. اقمارال ناۋاتبەكتەن بولەك ەرعالي شامەي كۇمىس, ال دايانا فەدوسوۆا, زارينا رايفوۆا جانە جۇرقامىرزا شۇكىربەكوۆ قولا مەدالدى قورجىنعا سالدى. ودان بولەك نىسانا كوزدەۋدەن ەركىن عابباسوۆ, جۇزۋدەن نۇرداۋلەت جۇماعالي كۇمىس السا, جەڭىل اتلەتيكادان داستان مۇقاشبەكوۆ قولا مەدال ەنشىلەدى.
سونداي-اق بيىل UFC-دە سەگىزبۇرىشقا شىققان شاۆكات راحمونوۆ پەن اسۋ الماباەۆتىڭ دا اسىعى الشىسىنان ءتۇستى. UFC-ءدىڭ جەڭىل ورتا سالماقتاعى جاۋىنگەرى, جەڭىلىپ كورمەگەن وتانداسىمىز شاۆكات راحمونوۆ 8 جەلتوقسان تاڭەرتەڭ يرلانديالىق يەن گەرريگە قارسى باق سىنادى. بۇرىن ءبىر زالدا جاتتىققاندار اراسىنداعى تارتىستى جەكپە-جەكتە از-كەم ۇپاي ايىرماشىلىعىمەن وتانداسىمىزدىڭ قولى كوتەرىلدى. بۇل شاۆكات راحمونوۆتىڭ ۇپايمەن باسىم بولعان العاشقى جەكپە-جەگى.
UFC ليگاسىندا اسۋ الماباەۆ تا ءساتتى جورىعىن جالعاستىرىپ جاتىر. الماباەۆ برازيليالىق قارسىلاس ماتەۋس نيكولاۋمەن ءۇش راۋندقا سوزىلعان جەكپە-جەك وتكىزىپ, تورەشىلەردىڭ شەشىمىمەن جەڭىسكە جەتتى. وسى جەڭىسىنەن كەيىن الماباەۆ ۇزدىك وندىق قۇرامىنا ەندى.
وسى جىلدىڭ قىركۇيەگىندە ءۇندىستاندا شاحمات وليمپياداسى ءوتتى. اقىل-وي سىنىندا قازاق قىزدارى جەرگىلىكتى سپورتشىلارعا عانا جول بەرىپ, كۇمىس مەدالمەن ەلگە ورالدى. وسى جارىستىڭ سوڭعى تۋرنيرىندە شاحماتتان قازاقستان ايەلدەر قۇراماسى اقش وكىلدەرىنە قارسىلاس اتاندى.
ويىندا ءبيبىسارا اساۋباەۆا, كسەنيا بالاباەۆا جانە الۋا نۇرمان جەڭىسكە جەتسە, مەرۋەرت كاماليدەنوۆا, وكىنىشكە قاراي, جەڭىلىپ قالدى. وسىلايشا, قۇراما 18 ۇپاي جيناپ, 2024 جىلعى شاحمات وليمپياداسىنىڭ كۇمىس جۇلدەگەرى اتاندى.
قازاقستان ايەلدەر قۇراماسى تومەندەگى قۇرامدا ونەر كورسەتتى:
ءبيبىسارا اساۋباەۆا;
مەرۋەرت كاماليدەنوۆا;
كسەنيا بالاباەۆا;
الۋا نۇرمان;
امينا قايىربەكوۆا.
وسى جىلدىڭ 13 ماۋسىمىندا ءۇندىستاننىڭ گانديناگار قالاسىندا وتكەن جاسوسپىرىمدەر اراسىنداعى الەم چەمپيوناتىندا (FIDE World Junior Chess Championships 2024) قازىبەك نوگەربەك تە تابىستى ونەر كورسەتتى. قازىبەك نوگەربەك ( رەيتينگى 2502) 11 راۋندتا 8½ ۇپاي جيناعان. وسى ارقىلى قازىبەك الەم چەمپيونى اتاعىنا ۇمىتكەرلەر تۋرنيرىنە ىرىكتەۋ اياسىنداعى الەم چەمپيوناتىنا جولداما الدى. سونداي-اق تۋرنير بارىسىندا فيدە پرەزيدەنتى كەڭەسىنىڭ كەزەكتى وتىرىسىندا قازىبەك نوگەربەككە گروسسمەيستەر اتاعى تابىستالدى.
كاسىپقوي بوكستا ەل جالاۋىن جەلبىرەتىپ جۇرگەن جانىبەك ءالىمحان ۇلى دا WBO, IBF تيتۋلدارىن ءساتتى قورعادى. 14 شىلدە كۇنى لاس-ۆەگاستا كاسىپقوي بوكسشى جانىبەك الىمحان ۇلى جاڭازەلانديالىق اندرەي ميحايلوۆيچكە قارسى رينگكە شىعۋ كەرەك ەدى. الايدا جەڭىلىپ كورمەگەن جەرلەسىمىز سالماق قۋ بارىسىندا قيىندىققا تاپ بولعانمەن, Cيدنەيدە وتكەن كاسىپقوي بوكس كەشىندە وتانداسىمىز جانىبەك ءالىمحان ۇلى (16-0, 11 كو) جاڭازەلانديالىق اندرەي ءميحايلوۆيچتى 9-راۋندتا نوكاۋتپەن جەڭدى (21-1, 13 كو).
28-31 قازان كۇندەرى البانيانىڭ تيرانا قالاسىندا كۇرەس تۇرلەرىنەن وليمپيادالىق ەمەس سالماقتاردا الەم چەمپيوناتى ءوتتى.
كۇرەس تۇرلەرىنەن وتكەن بالۋاندار باسەكەسىندە العاشقى جۇلدەنى 63 كەلىدە بەلدەسكەن ەرجەت جارىلقاسىن قورجىنعا سالدى. ول فينالدا ازەربايجاندىق نيحات زاحيد ماممادليگە ەسە جىبەردى.
23 جاسقا دەيىنگى جاستار اراسىندا وتكەن الەم چەمپيوناتىندا ريزابەك ايتمۇحاننىڭ التىن ەنشىلەگەنىن ايتا كەتكەن ءجون. سونداي-اق قىزدار قۇراماسى ساپىنان 72 كەلىدە بوزكىلەمگە شىققان ءجاميلا باقبەرگەنوۆا جاپونيالىق قارسىلاسىنا جول بەرىپ, كۇمىس مەدالعا قول سوزدى.
ەركىن كۇرەستەن 70 كەلىدە نۇرقوجا قايپانوۆ الەم چەمپيونى اتاندى. جەرلەسىمىز فينالدا جاپونيالىق يوشينوسۋكە اوياگيدەن ايلاسىن اسىردى.
وسى جىلدىڭ قاڭتارىندا وتكەن جاسوسپىرىمدەر وليمپياداسىندا يليا ميزەرنىح تاريحي التىن جۇلدەنى ەنشىلەدى. شاڭعىمەن تۇعىردان سەكىرۋدەن العاشقى مۇمكىندىگىندە ءول ۇشىنشى ورىنىن ساقتاپ قالدى. ال ەكىنشى مۇمكىندىكتە ناتيجەسىن جاقسارتىپ, كەيىن ءبىرىنشى ورىنعا شىقتى. ايتا كەتەيىك, قازاقستان بۇعان دەيىن قىسقى جاسوسپىرىمدەر وليمپياداسىندا التىن مەدال الماعان.
تايلاندتىڭ چيانگماي قالاسىندا 30 قاراشا - 10 جەلتوقسان ارالىعىندا بوكستان ازيا چەمپيوناتى ءوتتى. بىلعارى قولعاپ شەبەرلەرىنىڭ باسەكەسىندە قازاقستان قۇراماسى ەرلەر اراسىندا 5 التىن, 5 كۇمىس, 1 قولا مەدالمەن ەكىنشى ورىندا قورىتىندىلادى. بوكستان قازاقستان قۇراماسى ازيا چەمپيوناتىندا قازاق ەلىنە جارقىن جەڭىستەر سىيلادى. فينالعا شىققان 5 بوكسشى دا التىننان القا تاقتى. وزگە 5 بوكسشى قىزىمىز قولا جۇلدە قانجىعالادى.
بيىلعى 9 ايدا وتاندىق سپورتشىلار 621 مەدال (213 التىن, 191 كۇمىس جانە 217 قولا) جەڭىپ الدى.
