فوتو gov.kz
قازىرگى ۋاقىتتا 20 جوبانى ىسكە اسىرۋ بويىنشا جۇمىس جۇرگىزىلىپ جاتىر. ولاردىڭ قاتارىندا مادەنيەت, ونەر مەن ءومىر سالتى تۋرالى «Modern Nomads» شوۋى, بيزنەس پەن ەكونوميكاعا ارنالعان وڭىرلىك شوۋ – «East-West Connect», سونداي-اق وڭىرلىك تۇلعالارمەن سۇحباتتاردان تۇراتىن – «Voices from Central Asia» جوبالارى بار.
ىنتىماقتاستىقتىڭ ماڭىزدى بولىگى – Euronews academy جوباسىن جۇزەگە اسىرۋ. ونىڭ اياسىندا وتاندىق جۋرناليستەرگە شەتەلدىك سپيكەرلەردىڭ قاتىسۋىمەن وفلاين ترەنينگتەر مەن ماستەر-كلاسستار ۇيىمداستىرىلاتىن بولادى. بۇل قازاقستاندىق باق وكىلدەرىنىڭ كاسىبيلىگىنە وڭ اسەرىن تيگىزەرى انىق.
بيىل قازاقستاندا «ماسس-مەديا تۋرالى» زاڭ قابىلداندى. جاڭا زاڭعا سايكەس, باق ماتەريالدارىنا تالاپ قويۋ مەرزىمى – 1 جىل, باق سۇراۋلارىن قاراۋ مەرزىمى – 5 كۇن, گرانتتىق قارجىلاندىرۋ, مەملەكەتتىك ءتىلدىڭ باق-تاعى ۇلەسى – 60% دەپ بەلگىلەندى. سونىمەن قاتار, جۋرناليستەردى اككرەديتاتسيالاۋدىڭ ۇلگىلىك قاعيدالارى بەكىتىلدى.
حالىق پەن مەديا سالاسى ماماندارىنىڭ مەدياساۋاتتىلىعىن ارتتىرۋ – مينيسترلىك قىزمەتىنىڭ باسىم باعىتتارىنىڭ ءبىرى. مينيسترلىك سالانىڭ كادرلىق الەۋەتىنىڭ كاسىبي دەڭگەيىن ارتتىرۋ بويىنشا جۇيەلى جۇمىس جۇرگىزۋدە.
جىل سايىن مەديتسينا, ەكولوگيا, ءدىن, قارجى-ەكونوميكا, قۇقىق, اسكەري ءىس, ۇلتارالىق قاتىناستار, اۋىل شارۋاشىلىعى, تسيفرلاندىرۋ, مۇناي-گاز سالالارىندا جۋرناليستەر مەن مەديا ماماندىعى ستۋدەنتتەرى وقىتۋ كۋرستارىنان وتەدى.
بيىل سالالىق جۋرناليستەردى دايارلاۋ ماقساتىندا ەلىمىزدىڭ جەتەكشى جوعارى وقۋ ورىندارىمەن 4 مەموراندۋمعا قول قويىلدى.
قىركۇيەكتە ەلوردادا «Astana Media Week 2024» مەديا جانە تسيفرلىق كوممۋنيكاتسيالار سالاسىنداعى جىل سايىنعى ءىس-شارا تابىستى ءوتتى. بيىلعى شارادا قۇقىقتىق ترانسفورماتسيا, كوپپلاتفورمالى ەكوجۇيەلەردى دامىتۋ, وڭىرلىك, سپورتتىق جانە سالالىق جۋرناليستيكا, بالالار كونتەنتى, سونداي-اق الەۋمەتتىك شيەلەنىستى باسقارۋداعى احۋالدىق ورتالىقتاردىڭ رولىنە ەرەكشە نازار اۋدارىلدى.
ساپالى قازاقستاندىق تەلەۆيدەنيەنى ىلگەرىلەتۋ مەن دامىتۋعا باعىتتالعان «تۇمار» ۇلتتىق تەلەۆيزيالىق سىيلىعى سەگىزىنشى جىل قاتارىنان وتكىزىلىپ كەلەدى. بيىل «توتەنشە جاعدايلارداعى ۇزدىك رەپورتاج» دەگەن جاڭا نوميناتسيا قوسىلدى. سونداي-اق 2017 جىلدان باستاپ باسپا, راديو جانە ينتەرنەت جۋرناليستيكا سالاسىنداعى جەتىستىكتەرى ءۇشىن بەرىلەتىن «ۇركەر» ۇلتتىق سىيلىعى وتكىزىلىپ كەلەدى.
