الەمدىك رەيتينگتە ۇستانىمى نىق
NU «Times Higher Education» ۋنيۆەرسيتەتتەرىنىڭ بەدەلدى حالىقارالىق رەيتينگىندە ءوز ورنىن انىقتادى. بۇل – وقۋ ورنىنداعى ساپالى ءبىلىمدى دالەلدەيدى. وسى رەيتينگ بويىنشا NU الەمدەگى ەڭ ۇزدىك ۋنيۆەرسيتەتتەردىڭ 24 پايىزىنىڭ قاتارىنان ورىن السا, ازيانىڭ جوعارى وقۋ ورىندارى اراسىندا 129-ورىن يەلەندى. ال الەمدەگى 1100-دەن استام جاس ۋنيۆەرسيتەتتەر اراسىندا 106-ورىندى ەنشىلەدى.
NU پرەزيدەنتى, پروفەسسور ۆاكار احماد ءوزى باسقارىپ وتىرعان ۋنيۆەرسيتەتتىڭ ينفراقۇرىلىمى مەن عىلىمي-زەرتتەۋ مۇمكىندىگى زور ەكەنىن ايتادى.
«قازىر ءبىزدىڭ وقۋ ورىندا عىلىمي-زەرتتەۋلەردىڭ ساپاسى ارتتى. مۇنى ۋنيۆەرسيتەت عالىمدارىنىڭ ماقالالارى حالىقارالىق بەدەلدى جۋرنالداردا ءجيى جاريالانىپ, وعان باسقا زەرتتەۋشىلەر كوپ سىلتەمە جاسايتىنىنان كورۋگە بولادى. ءبىزدىڭ جاريالانىمدارىمىزدىڭ 25 پايىزى باكالاۆريات ستۋدەنتتەرىمەن بىرىگىپ جازىلدى. بۇل ۋنيۆەرسيتەت مارتەبەسىن ودان سايىن بيىكتەتەدى», دەيدى دوكتور ۆاكار احماد.
ونىڭ ايتۋىنشا, NU – تمد ەلدەرىنىڭ عىلىمي ورتالىعى – ستەنفورد بويىنشا ەڭ كوپ سىلتەمە جاسالعان زەرتتەۋشىلەردىڭ 2 پايىز تىزىمىنە ەنگەن. وسىنداعى 52 زەرتتەۋشىنىڭ 36-سى قازاقستاننان.
«بيىلعى دەرەكتەرگە سايكەس, ءبىز ەڭ جوعارعى كۆارتيلگە كىرەتىن جۋرنال بويىنشا قازاقستانداعى بارلىق جاريالانىمنىڭ تورتتەن ءبىرىن الامىز. سونىمەن قاتار ءبىزدىڭ FWCI (2.00) قازىر ديۋك ۋنيۆەرسيتەتى جانە سينگاپۋر ۇلتتىق ۋنيۆەرسيتەتى سياقتى ستراتەگيالىق سەرىكتەستەرىمىزدىڭ كورسەتكىشتەرىمەن سالىستىرۋعا بولادى. ال ۆيسكونسين-مەديسون مەن كولورادو كەن مەكتەپتەرىنىڭ كورسەتكىشتەرىنەن دە جوعارى», دەيدى NU پرەزيدەنتى.
ەلىمىزگە عانا ەمەس, شەتەلگە تانىمال
بيىل Nazarbayev University-ءنىڭ ءتورت پروفەسسورى پرەزيدەنت جانىنداعى ۇلتتىق عىلىم اكادەمياسىنىڭ اكادەميگى بولدى. ولاردىڭ ىشىندە NU جانىنداعى «University Medical Center» كورپوراتيۆتىك قورىنىڭ باسقارما توراعاسى, مەديتسينا عىلىمدارىنىڭ دوكتورى يۋري پيا, NU-دىڭ ينجەنەريا جانە تسيفرلىق عىلىمدار مەكتەبىنىڭ پروفەسسورى, تەحنيكا عىلىمدارىنىڭ دوكتورى جۇماباي باكەنوۆ, NU ۆيتسە-پرەزيدەنتى, PhD دارحان ءبىلالوۆ جانە SSH پروفەسسورى, ماتەماتيكا عىلىمدارىنىڭ دوكتورى سۇراعان دوربەتحان بار. سونداي-اق جۋىردا جاراتىلىستانۋ, الەۋمەتتىك جانە گۋمانيتارلىق عىلىمدار مەكتەبىنىڭ (SSH) پروفەسسورى, بيوحيميا جانە مولەكۋلالىق بيولوگيا عىلىمدارىنىڭ دوكتورى دوس سارباسوۆ ۇلتتىق عىلىم اكادەمياسىنىڭ ۆيتسە-پرەزيدەنتى بولىپ سايلاندى.
ايتالىق, سوڭعى 14 جىلدا NU جەتەكشى عالىمداردىڭ ورتاسى قالىپتاستى. قازىر ولاردىڭ سانى 100-دەن اسادى. ءسويتىپ, ۋنيۆەرسيتەت پروفەسسور-وقىتۋشى قۇرامىن 10 پايىزدان 30 پايىزعا دەيىن ۇلعايتتى. مۇندا وتە بىلىكتى پروفەسسورلار قىزمەت ىستەيدى. وقۋ ورنى سولارمەن ماقتانادى. ماسەلەن, ستەنفورد ۋنيۆەرسيتەتى جىل سايىن الەمنىڭ ەڭ ۇزدىك عالىمدارى رەيتينگىن جاريالايدى. وسى ۋنيۆەرسيتەت زەرتتەۋشىلەرى دايىنداعان رەيتينگ 180 000-نان استام جەتەكشى عالىمداردىڭ ءپروفيلىن قامتىپ, ولاردىڭ دايەكسوز كورسەتكىشتەرىن باعالايدى. وسىعان سايكەس NU پروفەسسورلارى عىلىمي ماقالالارىنىڭ جاريالانىمى بويىنشا الەمنىڭ ەڭ ۇزدىك عالىمدارىنىڭ 2 پايىز قاتارىنان ورىن العان. بۇل رەيتينگتە ماسسيمو پينياتەللي, تيمۋر اتاباەۆ, جۇماباي باكەنوۆ, الەكساندر تيحونوۆ, شازيم مەمون, رەندي حازلەتت, ساففەت ياگيز, ۆەسەلين پاۋنوۆ, پريم سينگح سەكىلدى NU پروفەسسورلارى باسقالاردان وزىق تۇر.
ءۇش جۇزدەن استام عىلىمي جوبا
Nazarbayev University-دە جىل سايىن عىلىم اپتالىعى وتەدى. ءىس-شارا اياسىندا زەرتتەۋشى پروفەسسورلار مەن ستۋدەنتتەر وزدەرىنىڭ عىلىمي-زەرتتەۋلەرىن ۇسىنادى. بيىل عىلىم اپتالىعى نانوماتەريالدار مەن جاساندى ينتەللەكت تاقىرىبىندا ەكى اۋقىمدى سيمپوزيۋم جانە حالىقارالىق عىلىمي-پراكتيكالىق كونفەرەنتسياعا ۇلاستى. بۇل بولاشاق زەرتتەۋ جۇمىستارى وسى باعىتتاردىڭ ماڭىزىن عانا ەمەس, ونىڭ وتاندىق عىلىمنىڭ دامۋىنا ىقپالىن كورسەتەدى. اسىرەسە كونفەرەنتسيا بارىسىندا دوكتورانتتار اراسىندا بايقاۋ وتە قىزىقتى بولدى. ولار وزدەرىنىڭ ديسسەرتاتسيالىق جۇمىستارىنىڭ مازمۇنىن 3 مينۋتقا سىيدىرىپ ايتىپ بەردى. اتالعان بايقاۋ ەندى جىل سايىن ەلىمىزدەگى جوعارى وقۋ ورىندارىنىڭ دوكتورانتتارى اراسىندا وتپەك.
جالپى العاندا, NU-دا بىرنەشە ءپان توعىسىندا 300-دەن استام عىلىمي جوبا جۇزەگە اسىپ جاتىر. ولاردىڭ دەنىن ەل ۇكىمەتى, ۋنيۆەرسيتەت جانە بيلل جانە مەليندا گەيتس قورى, «Aga Khan Foundation», ناتو-نىڭ بەيبىتشىلىك پەن قاۋىپسىزدىك ءۇشىن عىلىم باعدارلاماسى, ونەر جانە گۋمانيتارلىق عىلىمداردى زەرتتەۋ كەڭەسى (AHRC), «Chevron» جانە ت.ب. تانىمال حالىقارالىق ۇيىمدار قارجىلاندىرادى. عالىمداردىڭ جوبالارى سان الۋان تاقىرىپتاردى قامتيدى. مۇندا مولەكۋلالىق ۆيرۋسولوگيانى زەرتتەۋدەن باستاپ, ەرەكشە قاجەتتىلىكتەرى بار بالالاردى وقىتۋدىڭ يننوۆاتسيالىق ادىستەرىن ازىرلەۋگە دەيىن جوبالانعان. اسىرەسە بيولوگ دوس سارباسوۆ باستاعان NU عالىمدار توبى جاساعان قاتەرلى دەرتكە قارسى جاساعان ءدارى – تابىستى جوبانىڭ بىرەگەيى دەسەك بولادى. سوڭعى ءۇش جىلدا اتالعان عىلىمي توپ زەرتتەۋدىڭ سەنىمدىلىگىن دالەلدەپ, 1 جانە 2 فازالاردىڭ كلينيكالىق سىناقتارىن وتكىزۋگە عىلىم جانە جوعارى ءبىلىم مينيسترلىگىنەن ماقساتتى قارجىلاندىرۋ الدى. سىناق بارىسىندا بارلىق ناۋقاستا قاتەرلى ىسىك ۇدەرىسىنىڭ تۇراقتىلىعى بايقالعان. دالىرەك ايتقاندا, 15 ادامنىڭ بىرىندە قاتەرلى ىسىك 30 پايىزعا ازايعان. كلينيكالىق زەرتتەۋلەر كەلەسى جىلى دا جالعاسادى.
سونىمەن قاتار NU جانىنداعى اقىلدى جۇيەلەر مەن جاساندى ينتەللەكت ينستيتۋتى (ISSAI) ازىرلەگەن «ISSAI KAZ-LLM» قازاق تىلىنە ارنالعان ۇلكەن تىلدىك مودەلى دە كوپشىلىك قىزىعۋشىلىعىن تۋدىردى. بۇل جوبا مەملەكەت باسشىسىنا ەكى اپتا بۇرىن ۇسىنىلدى. مۇنى جاساعان توپ مۇشەلەرى 150 ميللياردتان استام تاڭبالاۋىشتى (ياعني سوزدەر نەمەسە ىشكى سوزدەر) جيناپ, وڭدەپ جانە سينتەزدەگەن. جوبا بيىل ءساۋىر ايىندا باستالدى.
ء«بىزدىڭ كوماندامىز بۇل جوبانى «Meta»-نىڭ «Llama» ارحيتەكتۋراسىنا سۇيەنە وتىرىپ جاسادى. ولار جوعارى ءونىمدى جۇيەلەر مەن رەسۋرستارى شەكتەۋلى ورتالارعا وڭتايلاندىرىلعان 8 ميلليارد جانە 70 ميلليارد پارامەترلى «ISSAI KAZ-LLM»-ءنىڭ ەكى نۇسقاسىن دايىندادى. بۇل مودەل قازاقستاننىڭ يننوۆاتسياعا, دەربەستىككە جانە تەحنولوگيالىق ەكوجۇيەسىنىڭ وسۋىنە ۇمتىلىسىن كورسەتەدى», دەيدى ISSAI ديرەكتورى, پروفەسسور حۋسەين اتاكان ۆارول.
يننوۆاتسيا جانە كوممەرتسيالاندىرۋ
عىلىمي ازىرلەمەلەردى كوممەرتسيالاندىرۋ – ۋنيۆەرسيتەتتىڭ نەگىزگى مىندەتىنىڭ ءبىرى. اسىرەسە ستارتاپتاردى قولداۋ باعدارلامالارى, اكسەلەراتورلار جانە گرانتتىق بايقاۋلار يننوۆاتسيالىق يدەيالاردى تابىستى بيزنەس جوبالارعا اينالدىرۋعا كومەكتەسەدى. ونەركاسىپتىك كومپانيالارمەن سەرىكتەستىك تە ازىرلەمەلەردى ناقتى وندىرىسكە ەنگىزىپ, ەل ەكونوميكاسىنىڭ باسەكەگە قابىلەتتىلىگىن ارتتىرۋعا ىقپال ەتەدى.
وسى جەلتوقسان ايىندا ۇكىمەت باسشىسى ولجاس بەكتەنوۆكە 10 عىلىمي ازىرلەمەنى ودان ءارى كوممەرتسيالاندىرۋ ۇسىنىلدى. مىسالى, ۋنيۆەرسيتەتتەگى مەديتسينالىق زەرتتەۋلەر مەن روبوتتەحنيكاداعى شەبەرلىك ورتالىعىنىڭ (CEMRR) عالىمدارى تسەرەبرالدى سال اۋرۋى مەن ينسۋلتتان امان قالعان ادامداردى وڭالتۋ ءۇشىن» Astana Gait» ەكزوسكەلەتىن جاساپ شىعاردى.
«قازىر ءبىز ەكزوسكەلەتتى ارنايى تەحنيكالىق سىناقتان وتكىزىپ جاتىرمىز. بۇل ءونىم ەلىمىزدە مەديتسينالىق قۇرال رەتىندە تىركەلەدى. ءبىز اۋرۋحانا جانە جەكە كلينيكالارمەن ۇزاقمەرزىمدى كەلىسىمشارت جاساي الامىز. اتالعان قۇرال ينسۋلتتان زارداپ شەككەن ادامدارعا وتە قاجەت. سونداي-اق جۇرگىزىلگەن زەرتتەۋ مەن سىناقتاردان كەيىن ونىڭ تسەرەبرالدى سال اۋرۋىنا شالدىققان ناۋقاستارعا جارامدى ەكەنىن انىقتادىق. ماقساتىمىز – ەلىمىزدە وسىنداي قۇرىلعىنى ءوزىمىز جاساپ, حالىققا قاجەتتى ەم-دوم جۇرگىزۋ. مەنىڭ ويىمشا, عىلىمي ناتيجەلەردى كوممەرتسيالاندىرۋ قاجەت. بۇل بولاشاقتا ءارتۇرلى سالا بويىنشا يننوۆاتسيالىق وزىق شەشىمدەردى گەنەراتسيالاي الاتىن عىلىمي ورتا قۇرۋدا بىزگە ۇلكەن كومەك بەرەدى», دەيدى NU تۇلەگى, «CEMRR» زەرتتەۋشىسى شىڭعىس داۋلەتباەۆ.
عالىمداردىڭ ايتۋىنشا, ەلىمىزدە 2025 جىلى 375 ناۋقاس جاياۋ جۇرەتىن روبوتقا مۇقتاج بولماق, ونىڭ قۇنى 170 ميلليون دوللاردى قۇرايدى. قازىر زەرتتەۋشىلەر «عىلىم قورى» اق-نا گرانتتىق قارجىلاندىرۋعا ءوتىنىم دايىنداپ جاتىر. كەلەسى جىلى ولار الەمدەگى باسقا قۇرالدارمەن سالىستىرعاندا قۇنى تومەن ەكزوسكەلەت ءوندىرىسىن ىسكە قوسۋدى كوزدەيدى.
NU ستۋدەنتتەرى جاساعان تاعى ءبىر جوبا – تاۋ-كەن كومپانيالارىنا جۇمىس تيىمدىلىگىن ارتتىرۋعا كومەكتەسەدى. جاس زەرتتەۋشىلەر ۇيمە شايمالاۋ كەزىندە ۆوبلەرلەردىڭ ونىمدىلىگىن انىقتاۋ ءۇشىن اۆتوماتتاندىرىلعان جۇيەنى پايدالانادى. ستارتاپ اقش, رەسەي, كانادا, اۋستراليا ,قىرعىزستان, وزبەكستان نارىعىنا شىعۋدى عانا ەمەس, 42 ميلليون اقش دوللارىن قۇرايتىن الەۋەتتى نارىق كولەمىمەن مەتالدى ءوندىرۋدىڭ ۇقساس ءادىسىن قولداناتىن 230-دان استام كومپانيانى قامتۋدى جوسپارلاپ وتىر. بۇل جوبانى ەلىمىزدە 20 تاۋ-كەن ءوندىرۋشى كومپانيا جۇزەگە اسىرا الادى.
شىندىعىن ايتقاندا, Nazarbayev University-ءنىڭ «NURIS» يننوۆاتسيالىق كلاستەرى اياسىندا كوپتەگەن جوبا قولداۋ تاپقان. 2017 جىلدان باستاپ ۋنيۆەرسيتەت اۋماعىندا «تەحنوپارك» جۇمىس ىستەيدى. وندا رەزيدەنت كومپانيالار جوعارى بىلىكتى ماماندار مەن زاماناۋي زەرتحانالارعا قول جەتكىزە الادى. ماسەلەن, مۇندا دونورلىق ورگانداردى ساقتاۋ جانە تاسىمالداۋ ءۇشىن جاسالعان بىرەگەي «ALEM» قۇرىلعىسىنىڭ ءپروتوتيپى قۇراستىرىلعان. قۇرىلعىنىڭ كلينيكاعا دەيىنگى زەرتتەۋلەرىن اتاقتى حيرۋرگ, «University Medical Center» كورپوراتيۆتىك قورىنىڭ باسقارما توراعاسى يۋري پيانىڭ جەتەكشىلىگىمەن وتاندىق عالىمدار مەن دارىگەرلەر توبى جۇرگىزدى. بۇعان «جۇرەك ورتالىعى» قورى قولداۋ كورسەتتى.
كلينيكاعا دەيىنگى زەرتتەۋلەر اياسىندا 33 وپەراتسيا جاسالدى, ونىڭ 12-ءسى جۇرەكتى ترانسپلانتاتسيالاۋمەن بايلانىستى. سونىمەن قاتار عىلىمي توپ مۇشەلەرى قۇرىلعىمەن جۇرەك پەن وكپەگە عانا ەمەس, باۋىرعا دا سىناق وتكىزدى. جوبا اۆتورلارىنىڭ ايتۋىنشا, مۇنداي قۇرىلعىنى جاساۋ شۇعىل قاجەتتىلىكتەن تۋىنداعان. ويتكەنى ترانسپلانتاتسيا 4 مىڭنان استام پاتسيەنت ءومىرىن ۇزارتۋعا ءارى قۇرىلعىنىڭ ساپاسىن جاقسارتۋعا كومەكتەسەدى.
ء«بىز اعزادان تىس ورگانداردى ەمدەۋ تۋرالى گيپوتەزانى انىقتادىق. ياعني تەحنيكا مەن قۇرىلعىنى ونكولوگيادا, پەرفۋزيونولوگيادا, كەۋدە حيرۋرگياسىندا, ۋرولوگيادا جانە گەپاتوبيليارلى حيرۋرگيادا قولدانۋعا بولادى. بۇل ءارتۇرلى ورگان پاتولوگيالارىنىڭ تەرمينالدىق ساتىسىن ەمدەۋدە جاڭا مۇمكىندىكتەردى اشادى. ءبىز كەلەسى جىلى كلينيكالىق زەرتتەۋلەردى ەنگىزىپ, جەرگىلىكتى دەڭگەيدە ءوندىرىستى ىسكە قوسۋدى جوسپارلاپ وتىرمىز. بۇل NU مەديتسينا مەكتەبى ستۋدەنتتەرى مەن دارىگەرلەرىنىڭ عىلىمي-زەرتتەۋ قىزمەتىندە قۋاتتى عىلىمي-تەحنولوگيالىق بازاعا اينالادى», دەدى قوعامدىق قوردىڭ ديرەكتورى مۇرات زاۋىروۆ. ونىڭ ايتۋىنشا, اتالعان قۇرىلعى كەلەسى جىلى جاپونيانىڭ وساكا قالاسىندا وتەتىن «Expo 2025» كورمەسىنە ۇسىنىلادى.
ۋنيۆەرسيتەت عالىمدارىنىڭ تاعى ءبىر توبى العاش رەت ءۇلبى مەتاللۋرگيالىق زاۋىتىندا اتوم ەلەكتر ستانتسيالارى ءۇشىن كۇردەلى تسيركوني قورىتپالارىن وڭدەۋدىڭ فرانتسۋز تەحنولوگياسى بويىنشا عىلىمي جوبامەن اينالىسادى. قازىر بۇل تەحنولوگيانى يمپلانتتاردى وندىرۋدە قولدانۋ زەرتتەلىپ جاتىر.
سونداي-اق سۋ رەسۋرستارىن يميتاتسيالىق مودەلدەر مەن ونلاين باقىلاۋ قۇرالدارىن قولدانۋ ارقىلى نەمىس-قازاق زەرتتەۋ جوباسى ىسكە اسىپ وتىر. مۇنى تولىق ەنگىزۋ كەلەسى جىلى باستالادى. قازىر NU الاڭىندا جاساندى ينتەللەكت ارقىلى سۋ تاسقىنى قاۋپىن باقىلايتىن «SUDS» دەپ اتالاتىن تۇراقتى قالالىق درەناج جۇيەسىنىڭ ەلەمەنتتەرى ورناتىلعان.سونىمەن قاتار نيكەل, كوبالت, مارگانەتس سياقتى وتاندىق شيكىزات نەگىزىندە ليتي-يوندى اككۋمۋلياتورلارعا ارنالعان ماتەريالداردى ءوندىرۋ بويىنشا قاناتقاقتى جوبا دا وندىرىستىك سەرىكتەستىگىن انىقتاۋ ۇستىندە. پروفەسسور جۇماباي باكەنوۆ باستاعان عالىمدار توبى كاتودتى ماتەريالداردىڭ پرەكۋرسورلارىن ءوندىرۋ تەحنولوگياسىن جاسادى. ەندى ونىڭ تاجىريبەلىك نۇسقاسىن ىسكە قوسىپ, ءوندىرىس ورنىن سالۋدى كوزدەپ وتىر. بۇل جوبانىڭ مەملەكەتىمىز ءۇشىن ستراتەگيالىق ماڭىزى زور. سەبەبى ول ەلدىڭ يمپورتتان ەنەرگەتيكالىق تاۋەلسىزدىگىن نىعايتۋعا, كاتودتى ماتەريالدار ءوندىرىسى ءۇشىن شيكىزاتتى وتاندىق جەتكىزۋ تىزبەگىن دامىتۋعا, سونداي-اق ەكولوگيالىق تازا ەنەرگەتيكانى دامىتۋعا ىقپال ەتەدى.
«Qarmet» اق-مەن بىرلەسىپ, جي-ءدى قولداناتىن گەنەراتورلار مەن ترانسفورماتورلاردىڭ ەلەكتر قوزعالتقىشتارىنىڭ جاعدايىن باقىلاۋ بويىنشا تاعى ءبىر قاناتاقتى جوبا جۇزەگە اسادى. بۇعان دەيىن NU عالىمدارى ونىڭ العاشقى ءپروتوتيپىن جاساپ, ۋنيۆەرسيتەت كامپۋسىندا سىناقتان وتكىزدى.
كوشباسشىلار دايارلانادى
Nazarbayev University ماقساتىنىڭ ءبىرى – ويى وزىق دارىندى جاستاردى وقۋعا تارتۋ. سوڭعى 14 جىلدا ءبىلىم ۇياسىنان ينجەنەرلىك, عىلىمي-گۋمانيتارلىق, مەديتسينا, بيزنەس, ءبىلىم جانە مەملەكەتتىك ساياسات ماماندىقتارى بويىنشا 10 مىڭنان استام ستۋدەنت تۇلەپ ۇشتى. وسى تۇلەكتەردىڭ 90 پايىزدان استامى ەلىمىزدىڭ دامۋىنا زور ۇلەس قوسىپ وتىر. ۋنيۆەرسيتەتتىڭ باستى مىندەتى – تۇلەكتەردى ەلىمىزدىڭ ەكونوميكالىق جانە الەۋمەتتىك دامۋىنا ۇلەس قوساتىنداي تابىستى مانساپ جەتەتىن قاجەتتى ءبىلىم بەرۋ. NU ۆيتسە-پرەزيدەنتى قاديشا دايروۆانىڭ ايتۋىنشا, وقۋ ورنىندا تالانتتى جاستارعا بارلىق جاعداي جاسالعان. ء«بىز ستۋدەنتتەرىمىزگە حالىقارالىق, باتىستىق دەڭگەيدەگى ءبىلىم بەرۋدىڭ بارلىق ارتىقشىلىعىن پايدالانۋعا مۇمكىندىك بەرەمىز. شىندىعىن ايتقاندا, ساپالى ءبىلىم ارزان بولمايدى. بىراق باسقا شەتەلدىك ۋنيۆەرسيتەتتەرمەن سالىستىرعاندا, وتاندىق ۋنيۆەرسيتەت تيىمدىرەك كورىنەدى. ءبىز تۇلەكتەرىمىزدىڭ قول جەتكىزگەن جەتىستىكتەرىمەن ماقتانامىز. ولاردا دۇنيەجۇزىلىك ەكونوميكالىق فورۋم انىقتاعان بولاشاقتىڭ 10 داعدىسى بار», دەيدى ق. دايروۆا.
ۋنيۆەرسيتەت تۇلەكتەرى كوبىنەسە KPMG, تەڭىزشەۆرويل, «BI Group», «Ernst & Young», قازاقستان ۇلتتىق بانكى جانە «PwC» سياقتى ەڭ ءىرى ۇيىمدارعا قىزمەتكە ورنالاسادى. ولاردىڭ جۇمىسقا ورنالاسۋ دەڭگەيى 98 پايىزدى قۇرايدى.
بيىل NU تالاپكەرلەر ءۇشىن اقىلى نەگىزدە وقۋدىڭ جاڭا مۇمكىندىگىن كەڭەيتتى. بۇل رەتتە مەملەكەت بولەتىن گرانت سانى بۇرىنعى دەڭگەيدە ساقتالىپ, قارجىلىق تۇراقتىلىق پەن بيۋدجەت قاراجاتىنان تاۋەلسىزدىك ءۇشىن اقىلى وقىتۋ ەنگىزىلدى.
الداعى جىلى Nazarbayev University-ءنىڭ قۇرىلعانىنا 15 جىل تولادى. قازىر وقۋ ورنى وسى ايتۋلى وقيعانى جوعارى دەڭگەيدە اتاپ ءوتۋ ءۇشىن الدىنا جاڭا مىندەتتەر قويدى. ايتالىق, «Times Higher Education»-تەگى پوزيتسياسىن ۇزدىك 300-گە دەيىن جاقسارتىپ, ۋنيۆەرسيتەت ينستيتۋتسيونالدىق, مەكتەپ جانە باعدارلاما دەڭگەيىندە, سونىڭ ىشىندە «QAA», «AACSB» جانە «ABET» ەڭ بەدەلدى ۇيىمدارىنان حالىقارالىق اككرەديتاتسيادان وتۋگە نيەت تانىتىپ وتىر. مۇنداي مازمۇندى ءىس-شارالار ەلىمىزدەگى بىرەگەي جوعارى وقۋ ورىننىڭ نارىقتاعى ۇستانىمىن نىعايتىپ, جوعارى اكادەميالىق ستاندارتتارىن بيىكتەتە تۇسەدى.
