وڭىرلىك جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسى كۋرچاتوۆ قالاسىنىڭ كارىز سۋلارى ەرتىس وزەنىنە قۇيىلىپ جاتقانىن راستادى. «كۋرچاتوۆ ۆودوكانال» مەكەمەسىنە قاراستى كارىز جۇيەسىنىڭ جەراستىنداعى قۇبىرلارى جارىلىپ, سالدارىنان قالدىق سۋ وزەنگە تولاسسىز اعىپ كەتىپ جاتىر.
«كۋرچاتوۆ قالاسىنان ەرتىس وزەنىنە اعىندى سۋلاردىڭ اعۋى جونىندەگى بەينەماتەريال دەرەكتەرىن انىقتاۋ ماقساتىندا اباي وبلىسى ەكولوگيا دەپارتامەنتىنىڭ ماماندارى شىعارىندىلار ورنىنا ارنايى باردى. اعىندى سۋلاردى اعىزۋ دەرەگى راستالدى. وسىعان وراي «كۋرچاتوۆ ۆودوكانال» شجق كمك-عا قاتىستى تەكسەرىس جۇرگىزىلەتىن بولادى», دەپ حابارلادى باسقارمادان.
پاۆلودار قالالىق سانيتارلىق-ەپيدەميولوگيالىق باقىلاۋ باسقارماسى ەرتىس وزەنىنەن حيميالىق, باكتەريولوگيالىق, پارازيتولوگيالىق كورسەتكىشتەرى بويىنشا سۋ سىنامالارىن الدى. تالداۋ ناتيجەلەرى الداعى ۋاقىتتا بەلگىلى بولادى. دەپارتامەنت ماماندارى ەرتىس وزەنىنە كارىزدىڭ قالدىق سۋلارىن تولاسسىز جىبەرىپ جاتقان كۋرچاتوۆ قالاسىنىڭ كوممۋنالدىق مەكەمەسى بۇعان دەيىن دە بىرنەشە مارتە جاۋاپكەرشىلىككە تارتىلعانىن مالىمدەپ وتىر. جىل باسىنان كاسىپورىن ەكولوگيالىق زاڭنامالاردى بۇزعانى ءۇشىن 10 ملن تەڭگەدەن استام ايىپپۇل تولەگەن. «كۋرچاتوۆ ۆودوكانال» مەكەمەسىنە بىرنەشە مارتە جوسپارلى تەكسەرۋ جۇرگىزىلىپ, بىرقاتار زاڭ بۇزۋشىلىق انىقتالعان. ءبىرىنشى تەكسەرىستە كارىز جۇيەسىندەگى سۋدى تازارتقىشتار بيولوگيالىق تازارتۋدى جەتكىلىكتى دەڭگەيدە جۇرگىزبەيتىنى ءمالىم بولعان. ەكولوگيا كودەكسىنىڭ 90-بابى بويىنشا اكىمشىلىك ءىس قوزعالىپ, ۇيىمعا 258 440 تەڭگە ايىپپۇل سالىنعان. كەلەسى كەزەكتى تەكسەرىستە شىعىس قازاقستان وبلىسى ەكولوگيا دەپارتامەنتىنىڭ زەرتحانالىق-تالداۋ باقىلاۋ ءبولىمىنىڭ ماماندارى اعىندى سۋلاردى ەرتىسكە جىبەرەتىن №2 قۇبىردا كارىز قالدىقتارىنىڭ مولشەرى وتە كوپ ەكەنىن انىقتاعان. ونداعى قالدىق مولشەرى ەكولوگيالىق رۇقسات شەگىندە بەلگىلەنەتىن قورشاعان ورتاعا ەميسسيالار نورماسىنان اسىپ تۇسكەن. وسىعان وراي كاسىپورىن 9 817 439 تەڭگە ايىپپۇل تولەگەن. قازىردە اباي وبلىسىنداعى ەكولوگيا دەپارتامەنتىنىڭ ماماندارى «كۋرچاتوۆ ۆودوكانال» مەكەمەسىنە قاتىستى جوسپاردان تىس تەكسەرىس تاعايىنداپ, باستاعالى وتىر.
ەرتىستىڭ سۋىن اۋىزسۋ رەتىندە پاۆلودار, ەكىباستۇز, اقسۋ قالالارىمەن قوسا, قاراعاندى وبلىسى دا پايدالانىپ وتىر. ساتباەۆ اتىنداعى كانال ارقىلى اعاتىن وزەن سۋى جاقىن جىلدارى استانا قالاسىنا دەيىن جەتەدى دەگەن جوسپار بار. سوندىقتان بۇل ماسەلە ەكولوگيالىق اپات رەتىندە باعالانىپ, دابىل قاعىلۋى كەرەك دەپ ويلايمىز.
پاۆلودار وبلىسى
