سۋرەتتى تۇسىرگەن – جەڭىس ىسقاباي
بۇقارالىق سپورت نىسانىنىڭ اشىلۋىنا وبلىس اكىمى بەيبىت يساباەۆ, ۇستەل تەننيسى فەدەراتسياسىنىڭ ۆيتسە-پرەزيدەنتى ەلسيار قاناعاتوۆ, اتلانتا وليمپياداسىنىڭ جۇلدەگەرى ماۋلەن مامىروۆ, ەلىمىزدىڭ تۇڭعىش «بارىسى» ۇلان رىسقۇل باستاعان سپورت ارداگەرلەرى مەن قالا تۇرعىندارى قاتىستى.
«مەملەكەت باسشىسى بيىلعى جولداۋىندا «جاستارىمىز دەنى ساۋ, مىقتى ازامات بولىپ ءوسۋى كەرەك. سوندىقتان ۇلت ساۋلىعىن ساقتاۋ ءۇشىن بۇقارالىق سپورتتىڭ ماڭىزى ايرىقشا», دەپ اتاپ ءوتتى. وسى ورايدا سپورتتىق ينفراقۇرىلىمدى جاقسارتۋعا ەرەكشە كوڭىل ءبولىنىپ, بالالار مەن جاسوسپىرىمدەردىڭ سپورتپەن شۇعىلدانىپ, جان-جاقتى جەتىلۋىنە جاعداي جاسالىپ كەلەدى. بۇل رەتتە سپورتتىق نىسانداردى سالۋعا مەملەكەتپەن قاتار جەكە ينۆەستورلاردىڭ دا بەلسەندى قاتىسا باستاعانى قۋانتادى», دەگەن ب.يساباەۆ ورتالىقتى سالۋعا قارجىلاي قولداۋ كورسەتكەن «جەتىسۋ قولداۋ» قوعامدىق قورىنا العىس ءبىلدىردى.
بۇقارالىق سپورتتى دامىتۋعا باعىتتالعان نىسان حالىقارالىق تالاپتار مەن ستاندارتتارعا سايكەس سالىنعان. مۇندا كەز كەلگەن دەڭگەيدەگى جارىستاردى وتكىزۋگە مۇمكىندىك بار.
جالپى, بالالار مەن جاسوسپىرىمدەرگە ارنالعان وبلىستىق سپورت مەكتەبىندە 613 وقۋشى تاربيەلەنىپ جاتىر, سونىڭ 131-ءى ۇستەل تەننيسىمەن اينالىسادى. مەكتەپتە 24 جاتتىقتىرۋشى جۇمىس ىستەيدى. جالپى اۋدانى 2193 شارشى مەتر بولاتىن ەكى قاباتتى عيماراتتىڭ ۇستەل تەننيسىنە ارنالعان ۇلكەن زالىندا 12 ۇستەل قويىلعان, الداعى ۋاقىتتا ونىڭ سانىن كوبەيتۋگە دە مۇمكىندىك جاسالعان, سول سياقتى 250 ورىندىق تريبۋناسى, شاحمات پەن توعىزقۇمالاققا ارنالعان زالى بار. جاتتىعۋ زالى, ماسساج بولمەسى, جۋىناتىن بولمەلەر, باسقا دا قاجەتتى اكىمشىلىك, تۇرمىستىق ءۇي-جايلار قاراستىرىلعان. جوباعا 1,3 ملرد تەڭگە ينۆەستيتسيالىق قاراجات جۇمسالدى.
«تالدىقورعانداعى ۇستەل ويىندارى مەن سپورتتىق تۋريزم باعىتىندا جۇمىس ىستەپ تۇرعان وبلىستىق مەكتەپ بۇعان دەيىن جالدامالى عيماراتتا وتىرعان. ەندى كاسىبي جانە اۋەسقوي سپورتشىلار كەز كەلگەن ىڭعايلى ۋاقىت پەن قولايلى جاعدايدا ۇستەل تەننيسىمەن اينالىسىپ, شاحمات نەمەسە توعىزقۇمالاق ويناي الادى. مۇنىڭ ءبارى بۇقارالىق سپورتتى دامىتۋعا, سپورتتىق جەتىستىكتەردى جاقسارتۋعا ىقپال ەتەدى», دەيدى وبلىستىق ۇستەل ويىندارى مەن سپورتتىق تۋريزم بويىنشا مامانداندىرىلعان بالالار مەن جاسوسپىرىمدەر سپورت مەكتەبىنىڭ اعا جاتتىقتىرۋشىسى نۇرلان دۇيسەنبينوۆ.
جەتىسۋدا 233 سەكتسيادا تۇراقتى نەگىزدە 11 592 تۇرعىن, سونىڭ ىشىندە جاستار دا ۇستەل تەننيسىمەن اينالىسادى. ارنايى سەكتسيالار الاكول, اقسۋ, ەسكەلدى, قاراتال, كەربۇلاق, پانفيلوۆ, سارقان اۋداندارىندا, تالدىقورعان قالاسىندا اشىلعان. بۇل سەكتسيالاردا 146 جاتتىقتىرۋشى بار. سونداي-اق مەملەكەتتىك سپورتتىق شىعارماشىلىق تاپسىرىس نەگىزىندە ۇستەل تەننيسىنەن 17 سەكتسيادا 583 بالا اينالىسادى.
بيىل جەرگىلىكتى بيۋدجەتتەن 9 سپورتتىق نىساننىڭ قۇرىلىسىنا 3,7 ملرد تەڭگە قاراجات ءبولىندى. سونىڭ ىشىندە التاۋىنىڭ قۇرىلىسى اياقتالدى. اتاپ ايتقاندا, سارقان اۋدانى المالى اۋىلىندا, الاكول اۋدانى لەپسى اۋىلىندا, تەكەلى قالاسىندا دەنە شىنىقتىرۋ-ساۋىقتىرۋ كەشەنى, پانفيلوۆ اۋدانى ءۇشارال اۋىلىنداعى سپورت كەشەنى, تالدىقورعان قالاسىندا «جەتىسۋ» كاسىبي ۆولەيبول كلۋبىنا ارنالعان ەلىمىزدە تەڭدەسى جوق ۆولەيبول ورتالىعى جاڭادان سالىندى, ينۆەستور ەسەبىنەن سپورتشىلارعا ارنالعان ءتورت قاباتتى تۇرعىن ءۇي تۇرعىزىلدى.
وبلىستا حالىقتىڭ مىڭ ادامعا شاققاندا سپورتتىق ينفراقۇرىلىممەن قامتاماسىز ەتىلۋى 64%, دەنەشىنىقتىرۋ, سپورتپەن جۇيەلى تۇردە اينالىساتىن حالىقتىڭ ۇلەسى وبلىس حالقى جالپى سانىنىڭ 42%-ىن قۇرايدى. بيىل جەتىسۋلىق سپورتشىلار 1344 مەدال جەڭىپ العان.
جەتىسۋ وبلىسى
