فوتولار: اقوردا
قازاقستاننىڭ توراعالىق مىندەتى تولىق ورىندالدى
شاعىن قۇرامداعى سەسسيادا قازاقستاننىڭ ۇيىمعا توراعالىعى كەزىندە قويىلعان مىندەتتەردىڭ ءبارى ورىندالعانىن ايتقان قاسىم-جومارت توقاەۆ:
«ۇيىمنىڭ جارعىلىق ورگاندارىنىڭ وتىرىستارى, اسكەري وقۋ-جاتتىعۋ جيىندارى جانە پروفيلاكتيكالىق وپەراتسيالار جوسپارلى تۇردە ۇيىمداستىرىلدى. سىرتقى ىستەر جانە قورعانىس مينيسترلەرى ۇجىمدىق قاۋىپسىزدىكتىڭ وزەكتى ماسەلەلەرىن قاراستىردى. قاۋىپسىزدىك كەڭەسى حاتشىلارى مەن پارلامەنت سپيكەرلەرىنىڭ دەڭگەيىندە كەزدەسۋلەر ءوتتى. ۇيىمنىڭ قوسىمشا جانە جۇمىس ورگاندارىنىڭ كەڭەستەرى وتكىزىلدى. ۇقشۇ قىزمەتىنىڭ ءتۇرلى باعىتتارى بويىنشا كونسۋلتاتسيالار جاسالدى. سەسسيا ارالىق كەزەڭدە بىرقاتار ماڭىزدى قۇجات قابىلداندى. بۇلار حالىقارالىق ىنتىماقتاستىق, قورعانىس سالاسىنداعى ىقپالداستىق, سونداي-اق ۇجىمدىق قاۋىپسىزدىكتىڭ وزەكتى سىن-قاتەرلەرى مەن قاۋىپتەرىنە قارسى ءىس-قيمىل ماسەلەلەرىن قامتيدى. ۇلى جەڭىستىڭ 80 جىلدىعىن اتاپ وتۋگە قاتىستى دايىندىق جۇمىستارىنا ايرىقشا ءمان بەرىلدى», دەدى.
جيىن بارىسىندا حالىقارالىق جانە وڭىرلىك قاۋىپسىزدىك ماسەلەلەرى تالقىلاندى. بۇعان قوسا قازاقستان رەسپۋبليكاسىنىڭ 2024 جىلى ۇقشۇ-عا توراعالىعى قورىتىندىلاندى جانە الداعى كەزەڭنىڭ جوسپارى ناقتىلاندى.
سىن-قاتەرلەرگە قارسى كۇرەس تەتىكتەرى جولعا قويىلدى
ۇقشۇ ۇجىمدىق قاۋىپسىزدىك كەڭەسىنىڭ كەڭەيتىلگەن قۇرامداعى وتىرىسىنىڭ سەسسيا جۇمىسىن اشقان پرەزيدەنت قاسىم-جومارت توقاەۆ سويلەگەن سوزىندە قازاقستاننىڭ ۇقشۇ-عا توراعالىعى اياسىندا ۇيىم جارعىسىنا ساي ىنتىماقتاستىق باعىتتارى بويىنشا 60-قا جۋىق ءىس-شارا ۇيىمداستىرىلعانىن, حالىقارالىق ارەنادا كەلىسىلگەن ۇستانىمداردى ىلگەرىلەتۋ بويىنشا سەرىكتەستەرمەن بىرلەسە جۇمىس جۇرگىزىلگەنىن ايتتى.
«بيىل قابىلدانعان ساياسي قۇجاتتار لەگىنە ۇقشۇ-عا مۇشە مەملەكەتتەردىڭ جالپى باعالاۋى نەگىز بولدى. ولاردىڭ ىشىندە حالىقارالىق اقپاراتتىق قاۋىپسىزدىك, عارىش سالاسىنداعى ىنتىماقتاستىق ماسەلەلەرى مەن تاياۋ شىعىستاعى احۋالعا بايلانىستى, سونداي-اق بەلورۋسسيانى باسقىنشىلاردان ازات ەتۋدىڭ 80 جىلدىعىنا وراي قابىلدانعان مالىمدەمەلەر بار. جىل بويى ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىنىڭ اسكەري دايىندىعىنا مۇقيات نازار اۋدارىلدى», دەپ ايتقان مەملەكەت باسشىسى قاسىم-جومارت توقاەۆ ۇقشۇ-عا مۇشە ەلدەردىڭ بىتىمگەرلىك كۇشتەرىنىڭ دايىندىق دەڭگەيى مەن جاۋىنگەرلىك ماشىعىن جەتىلدىرۋ جۇمىستارى جۇرگىزىلىپ جاتقانىن, قىركۇيەك-قازان ايلارىندا ەلىمىزدە «مىزعىماس باۋىرلاستىق-2024» ۇقشۇ بىتىمگەرشىلىك كۇشتەرىنىڭ كوماندالىق-شتابتىق وقۋ-جاتتىعۋلارى مەن «جارتاس-2024» ۇقشۇ ارنايى وقۋ جيىنى وتكىزىلگەنىن, اسا قاۋىپتى نىساندارداعى كۇردەلى اپاتتىق-قۇتقارۋ جۇمىستارىن جۇرگىزۋدىڭ بىرلەسكەن ءىس-قيمىلى پىسىقتالعانىن اتاپ ءوتتى.
قاسىم-جومارت توقاەۆ جىل بويى وزەكتى سىن-قاتەرلەرگە قارسى ءىس-قيمىل ماسەلەسىنە ەرەكشە دەن قويىلعانىن, قازاقستان ايقىنداعان باسىمدىقتار جۇيەلى جۇزەگە اسىرىلعانىن اتاپ ايتتى.
«قازاقستان مەن ۇقشۇ-عا مۇشە باسقا دا ەلدەر اۋماعىندا ءبىر ۋاقىتتا «ناەمنيك», «كانال», «نەلەگال» جانە «پروكسي» سەكىلدى ارنايى وپەراتسيالاردىڭ ءتۇرلى كەزەڭدەرى ءوتتى. بۇل ءىس-شارالار حالىقارالىق تەرروريزمگە, ەسىرتكى ساۋداسىنا, زاڭسىز كوشى-قونعا جانە اقپاراتتىق ورتاداعى سىن-قاتەرلەرگە قاتىستى قاۋىپتىڭ الدىن الۋدى كوزدەيدى. بيىل ءبىزدىڭ باستامامىزبەن العاش رەت زاڭسىز قارۋ-جاراق, وق-ءدارى اينالىمىنا جانە ۇيىمداسقان ترانسۇلتتىق قىلمىسقا قارسى ءىس-قيمىل جونىندە كونسۋلتاتسيالار ءوتتى. ۇقشۇ اياسىندا ارناۋلى جۇمىس توبىن قۇرۋ ماسەلەسى پىسىقتالىپ جاتىر. قازاقستان توراعالىعىنىڭ ۇيلەستىرۋىمەن تاجىك-اۋعان شەكاراسىن نىعايتۋ جونىندەگى ۇقشۇ-نىڭ ماقساتتى مەملەكەتارالىق باعدارلاماسىن دايىنداۋ جۇمىستارى اياقتالدى. قۇجاتتى ازىرلەۋ 2013 جىلى باستالعان ەدى. بۇگىن ءبىز ۇيىمنىڭ وڭتۇستىك شەبىندەگى قاۋىپسىزدىكتى نىعايتۋعا باعىتتالعان وسى ماڭىزدى شەشىمگە قول قويامىز», دەدى مەملەكەت باسشىسى.
ەسكە سالايىق, قازاقستان 2024 جىلدىڭ 1 قاڭتارىنان باستاپ ۇقشۇ-عا توراعالىق ەتتى.
دەكلاراتسيا قابىلدانىپ, بىرقاتار قۇجاتتارعا قول قويىلدى
ۇيىمنىڭ جانە ونىڭ بارلىق مۇشەلەرىنىڭ مۇددەسى ءۇشىن ۇجىمدىق قاۋىپسىزدىك جۇيەسىن ودان ءارى جان-جاقتى دامىتۋعا باعىتتالىپ قابىلدانعان قۇجاتتار ءتىزىمى:
ۇقشۇ-نىڭ تاجىك-اۋعان شەكاراسىن نىعايتۋ جونىندەگى ماقساتتى مەملەكەتارالىق باعدارلاماسى بەكىتىلدى.
پرەزيدەنتتەر سونداي-اق 1941-1945 جىلدارداعى ۇلى وتان سوعىسىنداعى جەڭىستىڭ 80 جىلدىعى تۋرالى مالىمدەمە قابىلدادى جانە بۇل داتانى 2025 جىلى اتاپ ءوتۋ جونىندەگى ءىس-شارالار جوسپارىن بەكىتتى.
