قازاقستان سپورتشىلارى دەربەس دەلەگاتسيا رەتىندە جازعى وليمپيادا ويىندارىنا سەگىزىنشى مارتە قاتىستى. تورتجىلدىقتىڭ باستى باسەكەسى ءبىزدىڭ ەل قۇراماسىنىڭ 1 التىن, 3 كۇمىس, 3 قولا يەلەنىپ, جالپى كوماندالىق ەسەپتە 43-ورىنعا تۇراقتاۋىمەن ەستە قالدى.
بۇل جولعى جازعى وليمپيادا ويىندارىنىڭ ەرەكشەلىگى رەسمي اشىلۋ سالتاناتى سپورت نىسانىندا ەمەس, سەنا وزەنىنىڭ ۇستىندە ءوتۋى بولدى. بايراقتى دوداعا سپورتتىڭ 25 تۇرىنەن 92 ليتسەنزيانى يەلەنگەن 80 سپورتشى قاتىستى.
جەتىستىگىمىز – جەتى جۇلدە
جارىستىڭ العاشقى كۇنى ەلدوس سمەتوۆ 60 كەلىدە التىننان القا تاعىپ, ەڭسەمىزدى بيىككە كوتەردى. وسىلايشا ول تاۋەلسىز قازاقستان تاريحىندا دزيۋدودان وليمپيادا چەمپيونى اتانعان تۇڭعىش قازاق سپورتشىسى اتاندى. دزيۋدودان 66 كەلى سالماق دارەجەسىندە بەلدەسكەن عۇسمان قىرعىزباەۆتىڭ قولا جۇلدەسى دە التىنعا بەرگىسىز. 60 كەلىدە سەگىز جىل كۇرەسكەن قىرعىزباەۆتىڭ بۇيىرماعان وليمپيادا جولداماسى 66 كەلىدە قولىنا ءتۇستى.
كوركەم گيمناستيكادان تاريحي كۇمىس مەدالدى ەنشىلەگەن ناريمان قۇربانوۆتىڭ جەڭىسىن ەرەكشە اتاپ وتكەن ءجون بولار. ناريمان ات ۇستىندەگى جاتتىعۋدى ەڭ ءبىرىنشى بولىپ ورىنداپ, 15.433 ۇپاي الدى. ول بازالىق قيىندىعى 6.7-گە تەڭ جاتتىعۋدى ءساتتى ورىنداپ شىقتى. بۇل جەتىستىك قازاقستان تاريحىنداعى سپورتتىق گيمناستيكاداعى تۇڭعىش مەدال بولدى.
الەكساندرا لە پاريجدەگى وليمپيادا ويىندارىندا يسلام ساتپاەۆپەن بىرگە پنەۆماتيكالىق ۆينتوۆكادان 10 مەتر قاشىقتىققا ارالاس جۇپتىق نىسانادان كوزدەۋ سايىسىندا قولا مەدال جەڭىپ الدى. قولا جۇلدە ءۇشىن قازاقستان مەن گەرمانيا كومانداسى اراسىنداعى تارتىس 17-5 ەسەبىمەن اياقتالعان ەدى.
ەركىن كۇرەستەن بەلدەسكەن مىقتىلار كوپ, سولاردىڭ اراسىنا سىنالاپ كىرىپ قانا قويماي, ەكىنشى ۇزدىك بولۋ ەكىنىڭ ءبىرىنىڭ قولىنان كەلە بەرمەيدى. پاريج كىلەمىندە دەمەۋ جادىراەۆ الەمنىڭ ەكى دۇركىن چەمپيونى اقجول ماحمۇتوۆتى (قىرعىزستان) جەڭىپ, التىنعا جەتە الماي, كۇمىستى قورجىنعا سالدى.
ايتا كەتەيىك, سپورتتىق ورمەلەۋدەن ءامىر مايمۇراتوۆ ىرىكتەۋ كەزەڭىندە 4,89 سەكۋندتىق ناتيجەمەن وليمپيادا رەكوردىن جاڭارتقان ەدى.
وسىلايشا ۇلتتىق قۇراما وليمپيادا ويىندارىندا 1 التىن, 3 كۇمىس, 3 قولا جۇلدەمەن كوماندالىق ەسەپتە 43-ورىنعا تابان تىرەدى. بارلىعى 126 مەدال (40 التىن, 44 كۇمىس, 42 قولا) جيناعان اقش قۇراماسى توپ باستاسا, التىنىنىڭ سانى اقش-پەن بىردەي, كۇمىسى مەن قولاسى از قىتاي (27 كۇمىس, 24 قولا) ەكىنشى ورىن يەلەندى. ازيالىق جانە ءبىر ەل – جاپونيا (20, 12, 13) 45 مەدالمەن ۇزدىك ۇشتىكتى تۇيىندەدى.
بيىل قازاقستان قۇراماسى ءۇشىن پاريجدەگى XVII پاراليمپيادا ويىندارىندا مپورتشىلار توعىز مەدال الىپ, توكيوداعى ۇزدىك كورسەتكىشىن جاڭارتتى.
پاۋەرليفتينگتەن 54 كەلى سالماقتا سىنعا تۇسكەن سپورتشىمىز داۆيد دەگتيارەۆ 188 كەلى كوتەرىپ التىن مەدالدى جەڭىپ الدى. دەگتيارەۆ ەل تاريحىنداعى ەكى دۇركىن پاراليمپيادا چەمپيونى بولعان العاشقى سپورتشى اتاندى.
سونىمەن قاتار, پاراليمپيادالىق دزيۋدودان 48 كەلى سالماقتا اقمارال ناۋاتبەك چەمپيون اتاندى. اقمارال ناۋاتبەكتەن بولەك ەرعالي شامەي كۇمىس; ال دايانا فەدوسوۆا, زارينا رايفوۆا جانە جۇرقامىرزا شۇكىربەكوۆ قولا مەدالدى قورجىنعا سالدى. ودان بولەك نىسانا كوزدەۋدەن ەركىن عابباسوۆ, جۇزۋدەن نۇرداۋلەت جۇماعالي كۇمىس السا, جەڭىل اتلەتيكادان داستان مۇقاشبەكوۆ قولا مەدال ەنشىلەدى.
2024 جىلعى پاراليمپيادا ويىندارىنا 9 سپورت تۇرىنەن 33 ليتسەنزيا العان قازاقستان قۇراماسى پاريجگە 44 سپورتشى الىپ باردى.
وسىلايشا, قازاقستاننىڭ پاراليمپيادا قۇراماسى پاريجدەگى جارىستى رەكوردپەن اياقتادى.
