بۋماكول اۋىلدىق وكرۋگىنە قاراستى وبلاۆكا اۋىلى شاعىن بولعانىمەن, شەكارانىڭ ىرگەسىندە تۇرعان ستراتەگيالىق ەلدى مەكەن. مەملەكەتتىك شەكارا ءدال اۋىل جانىنان اعاتىن جايىق وزەنى ارقىلى وتەدى. وسىدان 10 جىل بۇرىن رەسپۋبليكا قازىناسىنان قوماقتى قارجى ءبولىنىپ, وزەننىڭ جىل سايىن سۋ قۇلاتىپ كەلە جاتقان جاعالاۋى بەكىتىلگەن ەدى. اۋىلدا 228 ەرەسەك تۇرعىن بار. جاقىندا مۇندا جاڭا مەديتسينالىق پۋنكت پايدالانۋعا بەرىلدى. جاڭا نىسان قۇرىلىسىنا 160 ملن تەڭگە جۇمسالعان. جوبا «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا جۇزەگە استى. قۇرىلىس-مونتاج جۇمىسى بيىلعى قىركۇيەك ايىندا عانا باستالسا دا, مەردىگەر «ۋرالسكستروينۆەست» كومپانياسى مەديتسينالىق پۋنكتتى از ۋاقىت ىشىندە ساپالى ەتىپ سالىپ شىقتى.
– ءبىزدىڭ بۇعان دەيىن پايدالانىپ كەلگەن عيماراتىمىز 1950-جىلدارى سالىنعان كونە ءۇي ەدى. قازىر كىرىپ وتىرعان جاڭا عيماراتىمىزدىڭ اۋماعى 155 شارشى مەتر. مۇندا دارىگەرگە دەيىنگى قاراۋ, ەم-شارا, فيزيوتەراپيالىق كابينەتتەر, تەحنيكالىق بۇرىش بار. قاجەتتى قۇرال-جابدىق دايىن. شتاتتا مەدبيكە, تەحنيكالىق قىزمەتكەر, كۇزەتشى, ەكى قازاندىق وپەراتورى جۇمىس ىستەيمىز. اۋىل تۇرعىندارىنىڭ دەنساۋلىعى ۇدايى نازارىمىزدا. ءدال قازىر اۋىلدا ءبىر جاسقا دەيىنگى 2 بالا, 14 جاسقا دەيىنگى 48 بالا بار. ءبىز بۇل جەردە ناۋقاستاردى قابىلداپ, تەكسەرىپ, فۋنكتسيونالدىق مىندەتتەرىمىزگە كىرەتىن ەم-شارالاردى جۇرگىزەمىز, – دەيدى مەدبيكە گۇلنار تەمىرعاليەۆا. 40 جىلعا جۋىق ەڭبەك ءوتىلىنىڭ 35 جىلىن وسى اۋىلدا مەدبيكە بولىپ وتكەرگەن گۇلنار تەمىرعاليقىزى – ءوز ءىسىنىڭ جەتىك مامانى.
اۋىلداعى جاڭا نىساننىڭ اشىلۋ سالتاناتىنا ءبورلى اۋدانى اكىمىنىڭ ورىنباسارى مۇقتار نۇرماقوۆ قاتىسىپ, جاڭا مەديتسينالىق پۋنكتتىڭ ەل يگىلىگىنە قىزمەت ەتۋىنە تىلەك ءبىلدىردى. اۋىل تۇرعىندارى اتىنان ءسوز العان مەيرام تاتاەۆ مەملەكەت تاراپىنان جاسالىپ جاتقان سان سالالى قامقورلىقتار ءۇشىن العىس ايتتى.
سول كۇنى ءبورلى اۋدانىنداعى اقسۋ اۋىلى تۇرعىندارى دا ءدال وسىنداي سۋ جاڭا مەديتسينالىق پۋنكتكە يە بولىپ, قۋانىشقا بولەندى. اقسۋ اۋىلدىق وكرۋگىنە قاراستى اقسۋ, جاڭاقونىس اۋىلدارىندا 510 ادام تۇرادى. ەندى ولار باس اۋىرىپ, بالتىر سىزداسا اۋدانعا سابىلماي, جەڭىل-جەلپى سىرقات بولسا ءوز اۋىلىندا ساپالى ەم الادى. اۋىلعا بيىل عانا جولدامامەن كەلگەن مەدبيكە گۇلنار عۇسمانوۆاعا قىزمەتتىك پاتەر بەرىلگەن. جاس مامانعا الاڭسىز قىزمەت ەتەتىن بارلىق جاعداي جاسالعان.
– ءبىزدىڭ ءبورلى اۋدانىندا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى وتە جاقسى جۇزەگە اسىپ كەلەدى. بىلتىر عانا اقساي قالاسىنىڭ ىرگەسىندەگى ارالتال شاعىن اۋدانىندا امبۋلاتوريا پايدالانۋعا بەرىلدى. بيىل كۇزدەن بەرى قاراعاندى اۋىلىندا فەلدشەرلىك-اكۋشەرلىك پۋنكت, جاڭاقونىس, وبلاۆكا, اقسۋ اۋىلدارىندا امبۋلاتوريا ىسكە قوسىلدى. بۇل جۇمىس بولاشاقتا دا جالعاسادى. بۇعان قوسا اۋىلدا تۇراتىن مەديتسينا قىزمەتكەرلەرى ءۇشىن «سوبول» ماركالى 6 اۆتوكولىك بەرىلدى, – دەيدى ءبورلى اۋداندىق اۋرۋحاناسىنىڭ ديرەكتورى التىناي بايمۇراتوۆا.
باتىس قازاقستان وبلىسى
