جارىستىڭ سالتاناتتى اشىلۋىندا پاريج وليمپياداسىنىڭ كۇمىس جۇلدەگەرى دەمەۋ جادىراەۆ پەن بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزباەۆ بوزكىلەمدە بەلدەسەتىن جاس سپورتشىلاردىڭ جارىسىنا ساتتىلىك تىلەپ, مەرەكەمەن قۇتتىقتادى.
«سالاماتتى ءومىر سالتىن قالىپتاستىرىپ, ۇلت دەنساۋلىعىن نىعايتۋداعى باستى مىندەت – بالالاردى جۇيەلى دەنەشىنىقتىرۋ, سپورتپەن شۇعىلدانۋعا بارىنشا تارتۋىمىز قاجەت. جارىستاردىڭ ءجيى وتكىزىلۋىنىڭ ناتيجەسىندە سپورتتىڭ ءار تۇرىمەن اينالىسۋعا تالپىنعان بالالار كوبەيىپ, ولاردىڭ سپورتقا قىزىعۋشىلىعى ارتىپ كەلەدى. بۇگىنگى جاس سپورتشىلار ەرتەڭگى ۇلكەن سپورت الەمىنە العاشقى قادامدارىن جاساپ جاتىر. بۇلاردىڭ قاتارىنان دا دەمەۋ جادىراەۆ, ازامات ءدۇمبىروۆ, بەكجان مىرزاليەۆ سىندى چەمپيوندار شىعارىنا سەنەمىز. ءدۇبىرلى دوداعا ءتىپتى كورشىلەس قىرعىزستاننان دا بالۋاندار كەلگەنى قۋانتادى. حالىقارالىق ارەنالاردا ەلىمىزدىڭ ابىرويىن اسقاقتاتۋ ءۇشىن سپورت سەكتسيالارىنا اتا-انالار بالالارىن كوبىرەك جىبەرسە, نۇر ۇستىنە نۇر بولادى», دەدى كەگەن اۋدانىنىڭ اكىمى ن.تەڭىزباەۆ.
«سپورتشىلاردى جەڭىسكە جەتكىزەتىن – ەڭبەكقورلىق. جوعارى دايىندىق پەن ىنتا-جىگەر بولسا, الىنبايتىن قامال جوق. بالا كەزىمدە وليمپيادا چەمپيوندارى مەن باسقا دا اتاقتى سپورتشىلارعا قاراپ, سولار سياقتى بولۋعا ۇمتىلاتىنمىن. بالالاردىڭ بىزگە دە سولاي قارايتىنىنا قۋانىشتىمىن, ءدان ريزامىن», دەدى د.جادىراەۆ.
تارتىستى باسەكەگە بارلىعى 16 كوماندا, 350-دەن اسا بالۋان قاتىستى. ەكى كۇنگە سوزىلعان جارىستىڭ ناتيجەسىندە ءوز سالماق دارەجەلەرىندە تالعار وڭىرىنەن كەلگەن قۋانىش نۇراسىل, داۋلەت ەرنۇر, تالعات ءنۇرالىم, مەيرامبەك مانسۇر جەڭىمپاز اتاندى. سونداي-اق كەگەن اۋداندىق سپورت مەكتەبىنىڭ تاربيەلەنۋشىلەرى بايقۇرمان رامازان, باقيقوجا يبراگيم, قاراساي اۋدانىنان قاتىسقان ورىنباي مەيىرجان, قىرعىزستاننان كەلگەن سۇلتان بەيشەباەۆ, الماتىلىق كيم روللان ۇزدىك دەپ تانىلدى.
الماتى وبلىسى
