فوتو: gov.kz
ەكونوميكالىق رەفورما جانە وڭىرلىك دامۋ كوميتەتىنىڭ توراعاسى ن.سابيليانوۆ الدىمەن, كولىك مينيسترلىگىنىڭ ەلدەگى جولداردىڭ قاناعاتتانارلىق ۇلەسى 87 پايىز دەگەن دەرەگىمەن كەلىسپەيتىنىن ايتتى.
سەبەبى, جەرگىلىكتى جولداردىڭ تەك 31 مىڭ شاقىرىمىندا نەمەسە 44 پايىزىندا اسفالت-بەتون جابىنى توسەلگەن. ال قالعان 39 مىڭ شاقىرىمىندا نەمەسە 56 پايىزىندا قيىرشىق, ۇساق تاستار مەن توپىراق توسەلىپ جاتىر. دەپۋتات ەكىنشى ايتىلعان تيپتەگى جولداردى قاناعاتتانارلىق دەڭگەيگە قوسپاۋدى سۇرادى.
«وسىعان بايلانىستى قيىرشىق, ۇساق تاستار مەن توپىراق توسەلگەن جولداردى قاناعاتتانارلىق جاعدايداعى جولدارعا جاتقىزباۋ ءۇشىن اۆتوجولداردىڭ ساپاسىن باعالاۋ ولشەمشارتتارىن قايتا قاراۋ قاجەت دەپ ەسەپتەيمىز. ناتيجەسىندە ءبىز جەرگىلىكتى ماڭىزى بار اۆتوموبيل جولدارىنىڭ ناقتى جاي-كۇيى تۋرالى بىلەتىن بولامىز», دەدى نۇرتاي سابيليانوۆ.
ول قاتىساتىن «قازاۆتوجول» ۇلتتىق كومپانياسى» اكتسيونەرلىك قوعامىنىڭ اتقاراتىن فۋنكتسياسىن قايتا قاراۋدى دا ۇسىندى.
«مەملەكەت 100% قاتىساتىن «قازاۆتوجول» ۇلتتىق كومپانياسى» اكتسيونەرلىك قوعامى اۆتوموبيل جولدارىنىڭ ۇلتتىق وپەراتورى بولىپ تابىلادى. بىراق ول ءبىر ۋاقىتتا 2 فۋنكتسيا اتقارادى, اتاپ ايتقاندا, اۆتوموبيل جولدارىن سالۋ جانە ولاردى رەكونسترۋكتسيالاۋ, جوندەۋ مەن كۇتىپ-ۇستاۋدىڭ ۇيىمداستىرىلۋ بارىسى مەن ساپاسىن باقىلاۋ. ياعني, ول جولدى ءوزى سالىپ, ءوزىن-ءوزى باقىلايدى ەكەن. وسىنداي جاعداي جول اكتيۆتەرى ساپاسىنىڭ ۇلتتىق ورتالىعىندا دا ورىن الۋدا, ول جوبالارعا ۆەدومستۆولىق ساراپتامانى ءوزى جۇرگىزەدى, تاڭداۋ تۇرىندەگى قۇرىلىسقا ۇسىنىستاردى ءوزى بەرەدى جانە مەردىگەر ۇيىمداردىڭ جۇمىسىنان كەمشىلىكتەردى ءوزى تابادى. ءسويتىپ, مۇددەلەر قاقتىعىسى تۋىندايدى», دەدى دەپۋتات.
ماجىلىسمەن جولداردى تەحنيكالىق قاداعالاۋ قىزمەتىنىڭ السىزدىگىنە دە توقتالدى. مەملەكەت باسشىسى 2029 جىلعا دەيىن ءتورت مىڭ شاقىرىمنان استام اۆتوموبيل جولدارىن ساپالى تۇردە رەكونسترۋكتسيالاۋ مىندەتىن قويىپ وتىر. بۇگىنگى تاڭدا مەملەكەت باسشىسىنىڭ تاپسىرماسىنا سايكەس «ۇزاققا سوزىلعان قۇرىلىس» جوبالارىن ىسكە اسىرۋ بويىنشا اۋقىمدى جۇمىستار 90%-عا اياقتالدى, ولار: «قاراعاندى - بالقاش-الماتى» (885 كم), «اتىراۋ - رف شەك. (استراحانعا)» (217 كم), «اقتوبە - قاندىاعاش» (96 كم), سونداي-اق «تالدىقورعان - وسكەمەن» (768 كم), جالپى ۇزىندىعى شامامەن 2 مىڭ شاقىرىم جول (1966 كم-دەن 1960 كم-گە جول قامتاماسىز ەتىلگەن). سونداي-اق, ن.سابيليانوۆ قۇرىلىسى ۇزاققا سوزىلعان رەسپۋبليكالىق ماڭىزى بار اۆتوجولداردىڭ ماسەلەسىن ورتاعا سالدى.
«قالباتاۋ - مايقاپشاعاي» تاس جولىن جوندەۋ 2019 جىلدان بەرى بەس جىلعا جۋىق ۋاقىت جۇرگىزىلىپ كەلەدى. بىراق جوندەۋ جۇمىستارى ءالى كۇنگە دەيىن اياقتالعان جوق. ۇزىندىعى 412 كم بولاتىن رەسپۋبليكالىق ماڭىزى بار «قىزىلوردا – جەزقازعان» اۆتوجولى ەڭ ۇلكەن ماسەلە بولىپ وتىر. وسى ۋچاسكەنى جوندەۋ جۇمىستارىن اياقتاۋدى جەدەلدەتۋ قاجەت. سونىمەن قاتار, مىسالى, رەسپۋبليكالىق ماڭىزى بار قاراعاندى - اياگوز - بۇعاز اۆتوجولىنىڭ جاي-كۇيى قاناعاتتانارلىق جاعدايدا ەمەس ءارى ونىڭ جەكەلەگەن ۋچاسكەلەرىندە ءتىپتى اسفالت جابىنى مۇلدەم جوق, شۇڭقىر-شۇڭقىر. بۇل ماسەلە وسى ءوڭىردىڭ تۇرعىندارى اراسىندا ءجيى كوتەرىلەدى. بيىل جوندەۋ جۇمىستارى باستالدى, ەندى باقىلاۋدى كۇشەيتۋ كەرەك», دەدى دەپۋتات.
ن. سابيليانوۆ ەلدىڭ كولىك-لوگيستيكا الەۋەتىن دامىتۋعا ايتارلىقتاي اسەر ەتەتىن سالاداعى وسى ماسەلەلەردى شەشۋ ءۇشىن جاۋاپتى مينيسترلىك ناقتى شارالار قابىلداۋى قاجەت ەكەنىنە نازار اۋداردى.
