ۋاقىت تالابىنا ساي بوي كوتەرگەن ورتالىقتا جاستارعا بىلىكتى ماماندار پسيحولوگيالىق جانە زاڭگەرلىك كومەك بەرەدى. جاڭا ورتالىقتا قارجىلىق ساۋات بويىنشا كەڭەستەر ۇسىنىلادى. سونداي-اق جۇمىسقا ورنالاسۋعا قولداۋ كورسەتىلەتىنى كوپتىڭ كوڭىلىن ءوسىردى. ەندى اۋدان جاستارى بۇل ماسەلەلەردى ەش قيىندىقسىز شەشۋگە مۇمكىندىك العانى اقيقات.
جالپى, جاستار ورتالىقتارىنىڭ اشىلۋى الماتى وبلىسىندا جىل باسىنان بەرى قارقىندى دامىپ كەلەدى. بۇعان دەيىن قوناەۆ قالاسى مەن كەگەن اۋدانىندا وسىنداي ورتالىقتار ىسكە قوسىلسا, جەلتوقسان ايىندا رايىمبەك اۋدانىندا تاعى ءبىر ورتالىق اشىلماق. ال كەلەسى جىلى قاسكەلەڭ قالاسىندا جاڭا ورتالىقتىڭ قۇرىلىسىن باستاۋ جوسپارلانىپ وتىر.
«قازىرگى تاڭدا الماتى وبلىسىندا 14 پەن 35 جاس ارالىعىنداعى 420 مىڭنان اسا جاس بار. بۇرىن جاستارعا ارنالعان, قيىن كەزدە كومەك كورسەتىپ, باس قوساتىن ورتالىقتار بولماعان ەدى. ءبىز بۇل ماسەلەنى كەزەڭ-كەزەڭىمەن شەشىپ جاتىرمىز. الداعى ۋاقىتتا وبلىستىڭ بارلىق اۋدانىندا جاستار ءۇشىن زاماناۋي ينفراقۇرىلىم قۇرۋدى جوسپارلاپ وتىرمىز. بۇل جاستارمەن جۇيەلى جۇمىس جۇرگىزۋگە مۇمكىندىك بەرەدى», دەيدى وبلىستىق جاستار ساياساتى ماسەلەلەرى باسقارماسىنىڭ باسشىسى ءمادي احمەتوۆ.
كوۆوركينگ ورتالىقتارى ءوڭىر جاستارىن الەۋمەتتەندىرۋدىڭ ماڭىزدى الاڭىنا اينالىپ كەلەدى. مۇندا بيزنەس-ترەنينگتەر, شەبەرلىك ساباقتارى, كورمەلەر, كەزدەسۋلەر مەن ءتۇرلى ۇيىرمەلەر تەگىن وتكىزىلەدى.
قوناەۆ قالاسى مەن كەگەن اۋدانىندا اشىلعان ورتالىقتاردا جىل باسىنان بەرى 9 مىڭنان اسا جاستى قامتىعان 700-گە جۋىق ءىس-شارا ۇيىمداستىرىلعان. شارالار نەگىزىنەن ينتەللەكتۋالدى, IT جانە كرەاتيۆتى سالالارعا باعىتتالعان. سونداي-اق بۇل ورتالىقتاردا بيزنەس جەلى قۇرۋ بويىنشا كەزدەسۋلەر, تانىمال تۇلعالارمەن سۇحباتتار جانە شەبەرلىك ساباقتارى وتكىزىلىپ كەلەدى.
بالقاش اۋدانىندا اشىلعان جاڭا ورتالىق وسى باعىتتاعى جۇمىستاردى جالعاستىرا وتىرىپ, جاستاردىڭ الەۋەتىن ارتتىرۋعا ىقپال ەتەدى.
الماتى وبلىسى
