فوتو: اقوردا
ء«بىز ەكىجاقتى قارىم-قاتىناستى نىعايتۋعا مۇددەلىمىز. ەكى ەل اراسىنداعى ىقپالداستىقتىڭ كەلەشەگى زور دەپ سانايمىن. ول ءۇشىن ۇكىمەتتەر ءوزارا ءتيىمدى ىنتىماقتاستىقتىڭ جاڭا مۇمكىندىكتەرىن قاراستىرۋعا بار كۇش-جىگەرىن سالادى. سونىمەن قاتار حالىقارالىق وزەكتى ماسەلەلەرگە قاتىستى ۇستانىمدارىمىز ۇقساس. ءبىز باستى حالىقارالىق قۇرىلىمدارداعى, ەڭ الدىمەن, بۇۇ جانە يسلام ىنتىماقتاستىق ۇيىمىنداعى ءسىزدىڭ ەلىڭىزدىڭ وكىلدەرىمەن بايلانىستى كۇشەيتۋگە دايىنبىز», دەدى مەملەكەت باسشىسى.
بۇل رەتتە قاسىم-جومارت توقاەۆ ەكى ەلدىڭ اۋىل شارۋاشىلىعى, تاۋ-كەن ونەركاسىبى, تسيفرلاندىرۋ جانە كولىك-لوگيستيكا باعىتتارى بويىنشا ءوزارا قارىم-قاتىناسىن دامىتۋدا الەۋەتى زور ەكەنىنە نازار اۋداردى.
ۋمارۋ سيسوكۋ ەمبالو قازاق جەرىندە كورسەتىلگەن سىي-قۇرمەت ءۇشىن قاسىم-جومارت توقاەۆقا ريزاشىلىعىن ءبىلدىردى.
«قازاقستانمەن تىعىز قارىم-قاتىناس ورناتۋدىڭ ءمانى زور. مەن بۇعان دەيىن ەلىڭىزگە پرەمەر-مينيستر رەتىندە كەلگەن ەدىم. بۇرناعى جىلدارى گۆينەيا-بيساۋدىڭ ستۋدەنتتەرى قازاقستاندا وقىعان بولاتىن. ولاردىڭ باسىم بولىگى تەحنيكالىق ماماندىق بويىنشا ءبىلىم الدى. ءبىز وسى باعىتتاعى ىنتىماقتاستىقتى جالعاستىرعىمىز كەلەدى. سەبەبى قازاقستاننان ۇيرەنەرىمىز كوپ», دەدى گۆينەيا-بيساۋ پرەزيدەنتى.
كەزدەسۋ بارىسىندا مەملەكەتتەر باسشىلارى جاھاندىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
