كونفەرەنتسيانى تۋريزم جانە سپورت ءمينيسترىنىڭ ورىنباسارى سەرىك جاراسباەۆ اشىپ, قاراتاي تۇرىسوۆتىڭ 90 جىلدىق مەرەيتويى پارلامەنتتە, الماتىداعى قانىش ساتباەۆ اتىنداعى ۇلتتىق تەحنيكالىق ۋنيۆەرسيتەتتە, جامبىل وبلىسىندا سالتاناتتى تۇردە اتالىپ وتكەنىن, ەڭبەك جولىن قاراپايىم گەولوگ بولىپ باستاپ, كەڭەس وداعى دەڭگەيىندە لاۋازىمدى قىزمەتتەر اتقارعان تۇلعانىڭ ونەگەلى عۇمىرى عيبراتقا تولى ەكەنىن جەتكىزدى.
مەملەكەت جانە قوعام قايراتكەرى قۋانىش سۇلتانوۆ «ەل اعاسى» دەگەن تاقىرىپتا بايانداما جاساپ, ەلىمىزدەگى تاۋەلسىزدىككە دەيىنگى ءھام تاۋەلسىزدىكتەن كەيىنگى ساياسي ۇردىستەردى قاراتاي تۇرىسوۆسىز ەلەستەتۋ مۇمكىن ەمەستىگىن, قاراپايىم عانا اۋىل بالاسىنىڭ كەڭەس وداعىنىڭ استاناسى ماسكەۋگە بارىپ وقىپ, قانىش ساتباەۆ سەكىلدى گەولوگ بولىپ ورالعانى, جەر قويناۋىندا جاتقان بايلىقتى ەل يگىلىگىنە جاراتۋعا بار كۇش-جىگەرىن جۇمساعانى تۋرالى ونەگەگە تولى اڭگىمەسىن ايتتى.
«قاراتاي تۇرىسوۆ اعامىزدىڭ بۇكىل ءومىرى – ۇرپاققا ونەگە. ول كىسىنىڭ ومىردەن وزعانىنا جيىرما جىل بولسا دا, ەلى ءبىر ساتكە ۇمىتىپ, ەسىنەن شىعارعان جوق. قارەكەڭنىڭ ەسىمى مەموريالدىق تاقتالاردا جازىلىپ, بىرنەشە قالانىڭ كوشەلەرىنە, جوعارى وقۋ ورىندارىنىڭ كافەدرالارىنا اتى بەرىلىپ جاتىر. نەگە؟ قاراتاي اعامىز – قانىش ساتباەۆتان كەيىن 3 مىڭ شاقىرىم جولدى جاياۋ كەزىپ, جەزقازعان دالاسىن شارلاپ شىققان گەولوگ. ول كىسىنىڭ سول ەڭبەگىن بۇكىل ارقا جۇرتى بىلەدى. تورعاي دالاسىنىڭ حالقى اعامىزدى قالاي قۇرمەتتەيتىنىنە تالاي مارتە كۋا بولدىق», دەيدى ق.سۇلتانوۆ.
جيىن سپيكەرلەرى قاراتاي تۇرىسوۆ گەولوگيا سالاسىنداعى ءونىمدى ەڭبەگى ارقىلى كوزگە ءتۇسىپ, 29 جاسىندا قاراجال قالالىق پارتيا كوميتەتىنىڭ ءبىرىنشى حاتشىسى بولىپ ساياسي قىزمەتكە كەلگەنىن, قايراتكەر تۇلعا ساتىلاي ءوسىپ, تورعاي وبلىستىق پارتيا كوميتەتىنىڭ حاتشىسى, رەسپۋبليكا ونەركاسىپ باقىلاۋ كوميتەتى توراعاسى, قازاقستان كاسىپوداقتارى توراعاسى, قازاقستان كومپارتياسى ورتالىق كوميتەتى ونەركاسىپ حاتشىسى, بۇكىلوداقتىق كاسىپوداق كوميتەتىنىڭ حاتشىسى قىزمەتتەرىن ابىرويمەن اتقارعانىن, سول كەزدەگى رەسپۋبليكا باسشىسى دىنمۇحامەد قوناەۆ تۇرىسوۆتىڭ ءبىلىمى مەن بىلىگىن جوعارى باعالاعانىن, بۇكىلوداقتىق كاسىپوداق كوميتەتىنىڭ حاتشىسى قىزمەتىندە ءجۇرىپ, بىرىككەن ۇلتتار ۇيىمىنىڭ مىنبەرىنەن كەڭەس وداعىنىڭ اتىنان سويلەگەن تۇڭعىش قازاق تا وسى قاراتاي تۇرىسوۆ ەكەنىن جەتكىزدى.
اباي اتىنداعى مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, قالامگەر ساۋىتبەك ابدراحمانوۆ «قاراتاي تۇرىسوۆ – مەملەكەت قايراتكەرى» تاقىرىبىندا بايانداما جاسادى. باياندامادا قالامگەر قاراتاي تۇرىسوۆتىڭ تۇلعاسىن كەڭ ماسشتابتا باعالاۋ كەرەكتىگىنە توقتالدى. قاراتاي تۇرىسوۆ 250 ميلليون حالقى بار, الەمنىڭ 1/6 بولىگىن الىپ جاتقان كەڭەس وداعى اتتى سوتسياليستىك مەملەكەتتىڭ ساياسي تۇلعاسى بولعانىن, قاراتاي تۇرىسوۆ كەڭەس وداعى دەڭگەيىندە لاۋازىمدى قىزمەت اتقارعان تۇرار رىسقۇلوۆتان كەيىنگى ەكىنشى قازاق ەكەنىن, مۇنداي لاۋازىمعا تۇركى بالاسىنان ساناۋلى ازاماتتار عانا قول جەتكىزگەنىن, قاراتاي تۇرىسوۆتىڭ ىسكەرلىگىنە ءادىل باعانى ەكونوميكا عىلىمدارىنىڭ دوكتورى, كسرو مينيسترلەر كەڭەسى توراعاسىنىڭ ورىنباسارى لەونيد ابالكيننىڭ بەرگەنىن ايتتى.
«قازاق بالاسى ءۇشىن قاراتاي تۇرىسوۆتىڭ 1987 جىلى بىرىككەن ۇلتتار ۇيىمى مىنبەرىنەن سويلەگەندە, جەر تاعدىرىن, ەكولوگيا كەساپاتىن, يادرولىق پوليگون ماسەلەسىن كوتەرگەنى, سول جىلى اقش پەن كسرو اراسىندا وتكىزىلگەن العاشقى تەلەكوپىر جۇزدەسۋدە كوممۋنيستىك مينيسترلەر اۋىز اشا الماي قالعان ساتتە كەڭەس وداعى جوعارعى كەڭەسىنىڭ دەپۋتاتى رەتىندە امەريكالىق كونگرەسسمەندەرمەن پىكىرتالاسقا ءتۇسىپ, ءوز ويىنان تايساقتاي اشىق ايتقانى بۇل كۇنگە اڭىزعا اينالعان. تۋعان حالقى ءۇشىن ماڭداي تەرىن توگىپ, ارتىندا اڭىز قالدىرعان ساياسي تۇلعانىڭ ەسىمىن ۇلىقتاۋ ۇرپاققا مىندەت دەپ بىلەمىز», دەيدى قاتىسۋشىلار.
قاراتاي تۇرىسوۆ قازاق ەلىنىڭ تۇڭعىش تۋريزم, دەنە شىنىقتىرۋ جانە سپورت ءمينيسترى, قازاقستان رەسپۋبليكاسى ورتالىق سايلاۋ كوميسسياسىنىڭ, پارلامەنت ءماجىلىسىنىڭ قارجى جانە بيۋدجەت كوميتەتىنىڭ توراعاسى بولعان جىلدارداعى ەڭبەگى حاقىندا مەملەكەت جانە قوعام قايراتكەرى قىلىشبەك ىزباسقانوۆ, حالىقارالىق تەلەۆيدەنيە جانە راديو اكادەمياسىنىڭ اكادەميگى, «دارىن» مەملەكەتتىك جاستار سىيلىعىنىڭ لاۋرەاتى, قوعام قايراتكەرى ماحات سادىق, دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعىنىڭ ديرەكتورى قىدىربەك رىسبەك سىندى ازاماتتار ماعىنالى ەستەلىك ايتتى.
