فوتو: elordainfo.kz
قالالىق دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن جانە استانا قالاسى اكىمدىگىنىڭ قولداۋىمەن ءوتىپ جاتقان اشىق بىرىنشىلىكتە جاسوسپىرىمدەر سىنعا ءتۇسىپ جاتىر.
«بيىلعى دوداعا 583 سپورتشى قاتىسىپ جاتىر. ولاردىڭ 197-ءسى – قىز, 386-سى – ۇلدار. باسەكەگە استانادان بولەك, الماتى قالاسى, پاۆلودار, اقتوبە, شىعىس قازاقستان, اقمولا وبلىستارىنان سپورتشىلار كەلدى. قاتىسۋشىلار ءارتۇرلى قاشىقتىقتار بويىنشا جەكە جانە ەستافەتالىق سايىستا جۇلدەگە تالاسادى», دەدى جۇزۋدەن استانا قالاسىنىڭ اعا باپكەرى اننا گەرشەۆيچ.
جارىس جەڭىمپازدارى مەن جۇلدەگەرلەر 12-14 جەلتوقسان كۇندەرى ارالىعىندا انىقتالادى.
جارىستىڭ ءبىرىنشى كۇنى ەستافەتالىق جارىس, 50 مەترگە باتتەرفلياي, 200 مەترگە براسس, 100 مەترگە ەركىن ءجۇزۋ جانە 200 مەترگە شالقالاي ءجۇزۋ ءادىسى بويىنشا ءوربيدى. ەكىنشى جانە ءۇشىنشى كۇندەرى سپورتتىق باسەكەدە 50 مەترگە ەركىن ءجۇزۋ, شالقالاي ءجۇزۋ, براسس, 100 مەترگە باتتەرفلياي, شالقالاي ءجۇزۋ جانە براسس, 200 مەترگە ەركىن ءجۇزۋ, باتتەرفلياي, كەشەندى ءجۇزۋ بويىنشا سىنعا تۇسەدى.
اشىق بىرىنشىلىكتە ۇزدىك كورىنگەن سپورتشىلار ۇلتتىق قۇراماعا كىرۋگە مۇمكىندىك الاتىنىن ايتا كەتۋ كەرەك.
