فوتو: ۆيدەودان كادر
پوليتسيانىڭ مالىمەتىنشە, 10 جەلتوقساندا نۇرىموۆ بۇزاقىلىق جاسادى جانە كولىك قوزعالىسىنا كەدەرگى كەلتىردى دەگەن ايىپپەن ۇستالعان.
«ول قوعامدىق ورىندا جانە پوليتسيا قىزمەتكەرلەرىنە ادەپسىز سوزدەر ايتىپ, پىشاقپەن قورقىتىپ, بوتەننىڭ مۇلكىنە قاساقانا زيان كەلتىرگەن. سونداي-اق ءىس-ارەكەتىن توقتاتپاي, اينالاسىنداعىلارعا, ونىڭ ىشىندە كامەلەتكە تولماعاندارعا قاۋىپ توندىرە وتىرىپ, ازاماتتاردىڭ قوعامدىق ءتارتىبى مەن تىنىشتىعىن بۇزۋدى جالعاستىرعان. بۇزاقىلىق فاكتىسى بويىنشا سوت وعان 15 كۇندىك اكىمشىلىك قاماۋعا الۋدى تاعايىندادى», دەدى پوليتسيا.
بۇل رەتتە پوليتسەيلەر بوتەننىڭ مۇلكىنە قاساقانا زيان كەلتىرۋ فاكتىسى بويىنشا قىلمىستىق ءىس قوزعادى.
«10 جەلتوقساندا ەڭبەكشىقازاق اۋدانى, ازات اۋىلىندا بولعان زاڭسىز ارەكەتتەردىڭ سالدارىنان اۆتوكولىك يەسىنە اكىمشىلىك جاۋاپكەرشىلىك شەگىنەن ايتارلىقتاي اسىپ تۇسەتىن جانە قىلمىستىق سارالاۋعا اكەپ سوعاتىن ماتەريالدىق زالال كەلتىرىلگەنى انىقتالدى. قازىرگى ۋاقىتتا وقيعانىڭ بارلىق ءمان-جايىن انىقتاۋ ماقساتىندا جان-جاقتى, تولىق جانە وبەكتيۆتى تەرگەۋ امالدارى جۇرگىزىلىپ جاتىر», دەدى پوليتسيا.
پوليتسيانىڭ مالىمەتىنشە, 10 جەلتوقسان كۇنى ساعات 15:30-دا ازات اۋىلىندا جەرلەۋ ءراسىمى كەزىندە «قوعامدىق تارتىپكە جانە باسقالاردىڭ, سونىڭ ىشىندە كامەلەتكە تولماعان بالالاردىڭ قاۋىپسىزدىگىنە قاۋىپ توندىرەتىن» وقيعا بولعان.
ەستەرىڭىزگە سالا كەتەيىك, قارجاۋباي نۇرىموۆتىڭ وتباسىنداعى جانتۇرشىگەرلىك وقيعالار تىزبەگى قازاننىڭ 4-ىنە قاراعان ءتۇنى ونىڭ كوز الدىندا 16 جاستاعى ۇلى شەرزات بولاتتى اياۋسىز ولتىرگەننەن كەيىن باستالعان بولاتىن.
قىلمىس جاسادى دەگەن كۇدىكپەن 11 ادام ۇستالىپ, ۋاقىتشا قاماۋعا الىندى. كىسى ءولتىرۋدى تەرگەۋدى قازاقستاننىڭ ىشكى ىستەر ءمينيسترى ەرجان سادەنوۆ قولعا الدى.
بىرنەشە كۇننەن كەيىن, 12 قازانعا قاراعان ءتۇنى ازات اۋىلىندا شەرزات بولاتتىڭ وتباسىنىڭ ءۇيى ورتەندى. باس پروكۋراتۋرا ءۇيدى ورتەپ جىبەرگەن جاۋاپتىلاردى تابۋعا ۋادە بەرگەنىمەن, بۇگىنگى كۇنگە دەيىن كىنالىلەر تابىلماي وتىر.
9 جەلتوقساندا شەرزات بولاتتىڭ اعاسىنىڭ ءمايىتى تابىلدى. الدىن الا مالىمەت بويىنشا, ەر ادام وزىنە قول جۇمساۋ تۋرالى حات قالدىرىپ, سۋيتسيد جاساعان.
