بيىل «زەردەلى» ورتالىقتارى مەن مەكتەپتەر جەلىسىنىڭ قۇرىلعانىنا 10 جىل تولدى. وسى ارالىقتا استانا, الماتى, شىمكەنت قالالارى مەن وبلىستاردا 7 مەكتەپ, 48 ورتالىق اشىلعان. ونىڭ نەگىزىن قالاۋشى, ۇزدىك پەداگوگ – ىرىسبەك ءماۋىت. ونىڭ ايتۋىنشا, قازىر بۇل مەكتەپتەر مەن ورتالىقتاردا 20 مىڭنان اسا وقۋشى ءبىلىم الىپ, 1 200 مۇعالىم ەڭبەك ەتەدى.
«مەنىڭ ماقساتىم – بالالارعا ماتەماتيكا مەن IT جانە اعىلشىن ءتىلىن تەرەڭدەتىپ وقىتىپ, قازاق تىلىندە ءبىلىم بەرىپ, ۇلتتىق تاربيەنى بويعا سىڭىرەتىن «ۇزدىك 50 مەكتەپ اشۋ». اسىرەسە نازارباەۆ زياتكەرلىك مەكتەبى سىندى ۇزدىكتەرگە اشىق باسەكە ورناتىپ, ءبىلىم سالاسىنىڭ دامۋىنا ۇلەسىمدى قوسسام دەيمىن», دەدى ول.
سونداي-اق «زەردەلىنىڭ» نەگىزگى قىزمەتىنىڭ ءبىرى – اۆتورلىق وقۋلىقتار شىعارۋ. وسى باعىتتا «زەردەلى» باسپاسى قۇرىلعان. بۇگىنگە دەيىن اتالعان باسپادان جۇزگە جۋىق اۆتورلىق جيناق جارىق كوردى. كىتاپتار مازمۇنى بويىنشا ماتەماتيكا, جاراتىلىستانۋ, تاريح جانە قازاق, ورىس, اعىلشىن ءتىلى پاندەرىنە توپتاستىرىلعان. بۇل ەڭبەكتەر وقۋشىلاردىڭ لوگيكالىق ويلاۋ قابىلەتىن دامىتىپ, ولاردى وليمپياداعا ازىرلەپ, جوعارى وقۋ ورىندارىنا تۇسۋگە دايىندايدى.
ءىس-شارا بارىسىندا قادىرلى قوناقتار «زەردەلى» ءبىلىم ۇيىمدارىنىڭ ون جىل ىشىندە قول جەتكىزگەن جەتىستىكتەرى تۋرالى جىلى لەبىزدەرىن ءبىلدىردى. «10 جىلدا جارىق كورگەن 100 كىتاپتىڭ» لەنتاسىن قيدى. سونىمەن بىرگە مازمۇندى شارا سوڭىندا «زەردەلى» مەكتەپتەرىندە قىزمەت ىستەيتىن 35 پەداگوگكە سينگاپۋرعا تاجىريبە الماسۋعا سەرتيفيكات تابىس ەتىلدى.
