جەڭىلدەتىلگەن يپوتەكا: دەپوزيت ءوسىپ, جارنا كولەمى تومەندەيدى

باعدارلامادا ءبىرشاما وزگەرىس بار

«ناۋرىز» باعدارلاماسىنا سايكەس, سالىمشى دەپوزيتىندە ءۇي الۋى ءۇشىن 1 ملن تەڭگە كولەمىندە قاراجات بولۋى كەرەك. دەگەنمەن بۇل سوما ازاماتتاردىڭ ءوتىنىشى قابىلدانعان سوڭ, ءۇي الۋىنا جەتپەيدى. سوندىقتان بانك بۇل سومانى كوتەرۋ تۋرالى ويلانا باستاعان. تالقىعا سالعان.

– كونكۋرستان وتكەن سالىمشى از ۋاقىت ىشىندە پاتەر قۇنىنىڭ 20%-ىن سالۋعا ءتيىس. قازىر 2,5 مىڭنان استام ءوتىنىشتىڭ 39%-ىندا عانا 20%-دى قۇرايتىن جارنا بار. سوندىقتان كەلەسى جىلى باعدارلاماعا قاتىسۋ ءۇشىن سالىمشىلاردىڭ دەپوزيتىندە 2 ملن تەڭگە بولۋىن ۇسىنامىز. بۇل باعدارلامانى جۇزەگە اسىرۋدى تەزدەتەدى. اتالعان شارا سا­لىم­شىلاردى قورعاۋ ءۇشىن جا­سالىپ وتىر. سالىمشىلار اق­شا ىزدەپ, ۇيىنە جوندەۋ جاساپ جۇرمەۋى كەرەك. كونكۋرستان وت­كەن سوڭ, بىردەن باسپاناسىنا قو­نىستانۋى كەرەك, – دەپ ءتۇسىندىردى بانك توراعاسى ل.يبراگيموۆا.

ايتپاقشى, شىلدە ايىندا كونكۋرستان وتكەن ازاماتتارعا 20 پايىزدىق سوماعا قاتىستى تالاپتاردى ورىنداۋعا 6 اي بەرىل­گەن. دەسە دە, بانك باسشىسىنىڭ سوزىنشە, كەيبىر قاتىسۋشىلار سول ۋاقىتتان بەرى اتالعان قارا­جاتتى جيناي الماعان.

«ناۋرىز» يپوتەكالىق باع­دار­لاماسى بويىنشا تازا ارلەۋ­دەگى پاتەرلەرگە العاشقى جارنا كولەمى تومەندەتىلىپ, مينيمال دە­پوزيت مولشەرى ارتادى. بۇل وزگەرىس كەلەر جىلدىڭ 1 قاڭتا­رىنان باستاپ كۇشىنە ەنەدى. كەلە­سى جىلى باعدارلاماعا 300 ملرد تەڭگە ءبولۋ جوسپارلانىپ وتىر.

– تالداۋ بارىسىندا ەكى ما­سەلە انىقتالدى. بىرىنشىدەن, كوپتەگەن ساتىپ الۋشى پاتەردىڭ دايىن بولعانىن قالايدى. سەبەبى جوندەۋ شىعىندارى كوبەيەدى. وسىعان بايلانىستى بانك تۇرعىن ءۇي-قۇرىلىس كومپانيالارى قاۋىمداستىعىمەن بىرنەشە كەزدەسۋ وتكىزدى. ەندى تازا ارلەۋدەگى پاتەرلەر بويىنشا باستاپقى جارنا 20%-دان 10%-عا دەيىن تومەندەيدى. بۇل – ىنتالاندىرۋ شاراسى, – دەدى بانك باسشىسى.

سونداي-اق «وتباسى بانك» جەڭىلدەتىلگەن «ناۋرىز» باعدار­لاماسىن 2025 جىلى دا جال­عاستىرۋ ءۇشىن 200 ملرد تەڭگەنىڭ وبليگاتسياسىن شىعارماقشى.

– باعدارلامالاردى جالعاس­تىرۋ ءۇشىن 2025 جىلى قوسىمشا 200 ملرد تەڭگەنىڭ وبليگاتسياسىن شىعارامىز. بانك وبليگاتسيالاردى 14-15%-دان نارىقتىڭ باعامىمەن شىعارادى. 7%-عا دەيىن مەملەكەتتەن سۋبسيديالانادى. ءبىرىنشى رەت 24 قاڭتاردا بيۋدجەتتەن 8 ملرد 180 ملن تەڭگە ءبولۋدى سۇرايمىز. 2025 جىلى «ناۋرىز» باعدارلاماسىنىڭ تابىس­تى جۇزەگە اسۋىنا بيۋدجەت قا­راجاتىن ءبولۋ ۇدەرىسىن تەزدەتۋدى ۇسىنامىز. اتالعان باعدارلاما جاس وتباسىلار اراسىندا سۇرانىسقا يە. سوندىقتان بانك وسى جۇمىستاردى ءارى قاراي جالعاستىرۋدى جوسپارلايدى, – دەدى.

سىياقى بەرىلمەۋى مۇمكىن

ءبىراز ۋاقىت بۇرىن «وت­­با­سى بانكتىڭ» دەپوزيتتەر­گە تو­لەنەتىن مەملەكەتتىك سىي­اقى­نى الىپ تاستايتىنى تۋرالى اق­پا­رات تاراعان ەدى. بريفينگ­تە باس­قارما توراعاسى ءلاززات يبرا­گي­موۆا مەملەكەتتىك سىياقى دە­­پو­­زيت اشىپ, يپوتەكاعا نەسيە را­سىمدەيتىن ازاماتتارعا بە­رى­لەتىنىن ايتتى. ال دەپوزيت اشىپ, ارتىنشا سالىنعان قارا­جاتىن شىعارىپ الاتىن­دارعا بەرىلمەۋى مۇمكىن.

دەمەك الداعى ۋاقىتتا «وت­با­سى بانك» دەپوزيتتەرىندەگى مەملەكەتتىك سىياقى تولەۋگە قاتىستى نورما وزگەرەدى. قازىر بانك سالىمشىلارىنا بەرىلەتىن مەملەكەتتىك سىياقىنىڭ كولەمى – 75-80 ملرد تەڭگە. ال نورمالارعا وزگەرىس ەنسە, ەل بيۋدجەتىنە تۇسە­تىن سالماق ازايماق.

– مەملەكەتتىك سىياقى كولەم جىل سايىن ارتىپ كەلەدى. ەل بيۋدجەتىنە ايتارلىقتاي سالماق ءتۇسىپ وتىر. قازىرگى نورمالارعا سايكەس, سالىمشى 3 جىل بويى اقشا جيناپ, دەپوزيتىن شەشىپ السا, ول جينالعان سومانى سىي­اقى­مەن بىرگە, تولىق كولەمدە شىعارا الادى. ءبىز وسى ماسەلەگە تالداۋ جۇرگىزىپ جاتىرمىز. مە­نىڭ­شە, ءبارى ءادىل بولۋى كەرەك. مەم­­لەكەتتىك سىياقى ەڭ مۇق­­­تاج, پا­تەر الۋعا نيەتتى ادام­­­دار­­عا بەرىلۋگە ءتيىس. بانك وسىن­­­­داي وز­گەرىستەردى كوزدەيدى. مەم­­­­لەكەتتىك سىياقى بانكتەن يپو­تە­­­كاعا ءۇي الاتىن ادامدارعا عا­نا بەرى­لۋى كەرەك, – دەيدى ل.يبراگيموۆا.

ءتورت وبلىستا پاتەر تاپشىلىعى سەزىلمەك

بانك توراعاسىنىڭ ايتۋىنشا, كەلەر جىلى 4 وبلىستا پاتەر تاپشىلىعى سەزىلۋى مۇمكىن. سەبەبى «ناۋرىز» جانە «وتاۋ» باعدارلامالارى بويىنشا 68 700 ۇسىنىم بەرىلگەن. دەگەنمەن سولتۇستىك قازاقستان, پاۆلودار, قىزىلوردا, اتىراۋ وبلىستارىندا تۇرعىن تاپشىلىعى بايقالادى. بۇل كەلەسى جىلى دا قايتالانۋى ىقتيمال. ال «Baspana Market» پورتالىنا ىلىنگەن پاتەرلەردىڭ باعاسى ءبىر جىل بويى وزگەرمەيدى.

– 2024 جىلدىڭ باستى باع­دارلاماسى «ناۋرىز جانە «وتاۋ» بولدى. اتالعان باعدارلامالار ىسكە قوسىلعاننان كەيىن نارىقتا تۇرعىن ءۇي باعاسىنىڭ كوتەرىلۋىن بولدىرماۋ ماقساتىندا «Baspana Market» پورتالىندا برونداۋ قولعا الىندى. قۇرىلىسشىلار وسى پورتالعا ءوز پاتەرلەرىن قويعان­دا 12 اي بويى پاتەر باعا­سىن وسىرمەۋگە ءتيىس. قازىر پورتالدا 921 نىساننان تۇراتىن 19 مىڭعا جۋىق پاتەر بار, – دەدى توراعا.

ەسكە سالا كەتەيىك, بيىل «ناۋ­رىز» بەن «وتاۋ» باعدار­لاما­لارى ارقىلى 9 370 وتباسى جاڭا باسپانا الدى.

– «وتباسى بانكتىڭ» باستى ماقساتىنىڭ ءبىرى – سالىمشىلاردى جاڭا تۇرعىن ۇيمەن قامتاماسىز ەتۋ. بانك 11 ايدىڭ ىشىندە 32 895 زاەم بەردى. جالپى سوماسى 571 ملرد تەڭگە بولدى. ونىڭ ىشىندە كەزەكتە تۇرعان سا­لىمشىلارعا 7 861 زاەم بەرىل­دى. «وتباسى بانك» وپەراتورى بولىپ ەسەپتەلەتىن باسقا يپوتە­كالىق باعدارلامالاردا 25 034 وتباسى جاڭا پاتەرگە كىردى. ونىڭ 40%-ى «ناۋرىز» بەن «وتاۋ» باعدارلامالارىنا تيەسىلى. وسى ارقىلى 9 370 وتباسى جاڭا باس­پانالى بولدى. جالپى سوماسى – 240 ملرد تەڭگە. باعدارلامانى ناقتى جۇزەگە اسىرۋ ماۋسىم ايى­نان باستالدى. كەلەسى جىلدىڭ باسىندا جالعاسادى, – دەگەن ەدى ل. يبراگيموۆا.