سۋرەت: Bloomberg
«Tesla», «Skype» جانە «SpaceX» سياقتى الپاۋىتتاردىڭ ينۆەستورى تيم درەيپەر وسى ستارتاپقا 1 ملن دوللار كولەمىندە ينۆەستيتسيا قۇيۋعا دايىن. كاسىپكەردىڭ جالعىز شارتى – كومپانيا 2024 جىلدىڭ سوڭىنا دەيىن 300 مىڭ دوللار كولەمىندە تابىسقا جەتىپ, ىشكى نارىقتا سۇرانىسقا يە ەكەنىن دالەلدەۋى كەرەك.
«TrustMe» – سيليكون القابىنداعى اكسەلەراتور نۇسقاسى بويىنشا الەمدەگى ەڭ ۇزدىك 10 ستارتاپ قاتارىنا ەنگەن, SMS ارقىلى 90 سەكۋندتا ماڭىزدى كەلىسىمشارتتارعا قول قويۋعا مۇمكىندىك بەرەتىن «TrustContract» قىزمەتىن ۇسىناتىن, 2 000-نان استام كومپانياعا كومەكتەسىپ ۇلگەرگەن كومپانيا. بۇل باستامانىڭ ەكولوگياعا اسەرى تۋرالى دا ايتپاي كەتپەسكە بولماس. ويتكەنى قاعاز شىعىنىن ازايتۋ – تەحنولوگيا مەن ەكولوگيالىق تيىمدىلىك تۇرعىسىنان وتە ماڭىزدى شارا.
«شوتىمدا جەتكىلىكتى اقشا بولعان كەزدە IT سالاسىندا ءوزىمدى سىناپ كورگىم كەلدى. تەحنولوگيالار ارقىلى قوعامعا پايدامدى تيگىزە الاتىنىمدى ءتۇسىندىم. وسىلايشا, ادامدار مەن كومپانيالار ءوزارا ارەكەتتەسكەن ءتۇرلى مەكەمەلەر تۋرالى شىنايى پىكىر قالدىرا الاتىن ەكوجۇيە – «TrustMe» تۇجىرىمداماسىن ويلاپ تاپتىم. كاستدەۆ وتكىزدىك, گيپوتەزامىز راستالدى جانە ءونىم جاساۋعا كىرىستىك. «TrustContract» بيزنەس-ۇدەرىستەردى جاقسارتۋدى عانا ەمەس, سونىمەن قاتار بارلىق زاڭدى تالاپتارعا ساي تولىق قاۋىپسىزدىكتى قامتاماسىز ەتەدى. بۇل – كىشىگىرىم كاسىپتەن ۇلكەن كومپانيالارعا دەيىن پايدالى رەسۋرس. قازىر ءاربىر ازاماتتىڭ قولداۋى – وتاندىق تەحنولوگيالاردىڭ الەمدىك ارەنادا دا مويىندالۋىنا ۇلكەن كومەك», دەيدى «TrustMe» سەرۆيسىنىڭ نەگىزىن قالاۋشى شىڭعىس داۋلەتباەۆ.
جەكە كاپيتالى 2 ملرد دوللارعا باعالانعان تيم درەيپەر بۇكىل سالالارعا اسەر ەتە الاتىن ستارتاپتاردى ىزدەيدى. «ونىڭ ينۆەستيتسيا قۇيۋى – تەك قارجىلىق قولداۋ ەمەس, ءبىر جاعىنان ستارتاپتىڭ ساپاسى مەن الەۋەتىن مويىنداۋ», دەيدى كومپانيا وكىلدەرى.
شىڭعىستىڭ ايتۋىنشا, باستى كليەنتتەرى – شاعىن جانە ورتا بيزنەس سۋبەكتىلەرى. تارقاتا ايتقاندا, كولىك تاسىمالى, ساۋدا-ساتتىق, تۋريزم, تاعى باسقا باعىتتار. قازىر ەلىمىزدە شامامەن ءبىر جارىم ميلليون جەكە كاسىپكەر مەن 600 مىڭ كومپانيا بار, سونىڭ اراسىنان 700 سۋبەكتى – «TrustContract» كليەنتتەرى. كۇنىنە 200 كومپانيا وسى پلاتفورمانى پايدالانىپ, قول قويادى. قازىرگە دەيىن «TrustContract» كومەگىمەن 100 مىڭنان استام كەلىسىمشارت جاسالعان.
