فوتو: inbusiness.kz
بيىل شەت اۋدانىندا تۇرعىن ءۇي قۇرىلىسى قارقىندى ءجۇردى, اۋدان ورتالىعىنىڭ ىرگەسىنەن جاڭا شاعىن اۋدان بوي كوتەردى. سونىڭ ناتيجەسىندە 60 وتباسى جاڭا باسپاناعا قول جەتكىزدى. ونىڭ ىشىندە ءبىر بولىگى تاۋنحاۋس تۇرعىنى بولىپ شىعا كەلدى. بيۋدجەت قارجىسىنا سالىنعان 24 پاتەرلى كوپقاباتتى تۇرعىن ءۇي مەن 36 پاتەرلى تاۋنحاۋس كىلتى يەلەرىنە سالتاناتتى جاعدايدا تابىس ەتىلدى. اۋدان اكىمى مۇحيت مۇحتاروۆ قۋانىش يەلەرىن قونىستويىمەن ارنايى قۇتتىقتادى.
– ءاربىر تۇرعىننىڭ باستى ماسەلەسى – باسپانالى بولۋ. ەل پرەزيدەنتى وسىعان ەرەكشە نازار اۋدارىپ, ۇكىمەتكە ناقتى تاپسىرما جۇكتەدى. تاپسىرما نەگىزىندە, وبلىس اكىمدىگىنىڭ قولداۋىمەن اۋدانىمىزدا جاڭا تۇرعىن ۇيلەر قۇرىلىسى جوسپارعا سايكەس, جۇيەلى جۇرگىزىلىپ كەلەدى. الداعى ۋاقىتتا اقادىر كەنتىندە 42 پاتەر, اقجال كەنتىندە 8 پاتەر پايدالانىلۋعا بەرىلەدى. تاۋەلسىزدىك كۇنىنە وراي تاعى دا كەزەكتە تۇرعاندارعا ءۇيدىڭ كىلتىن تابىستايمىز, – دەدى مۇحيت سايلاۋ ۇلى.
مۇنىمەن قوسا, اۋدانداعى ءتورت بىردەي ەلدى مەكەندە الەۋمەتتىك وسال توپتار مەن كوپبالالى وتباسى ساناتىندا تۇرعانداردى تۇرعىن ۇيمەن قامتاماسىز ەتۋ ماقساتىندا رەسپۋبليكالىق «سامۇرىق قازىنا» اق-نان ءبىرىنشى نارىقتاعى جالپى سانى 170 تاۋنحاۋس جانە جەر ۇيلەر ساتىپ الۋعا قاراجات بولىنگەن, بۇل باعىتتاعى جۇمىستار دا قالىپتى جۇرگىزىلىپ جاتىر.
ءوز كەزەگىندە مەملەكەتتىك باعدارلامامەن باسپانالى بولعاندار اۋدان اكىمدىگىنە ريزاشىلىعىن ءبىلدىردى. جالعىزباستى انا الما تاجىباەۆانىڭ ءۇي كەزەگىندە تۇرعانىنا 15 جىل بولعان ەكەن, ەندى تاۋنحاۋستىڭ تۇرعىنى. ءوز ءۇيى اپاتتى جاعدايدا بولعان سوڭ جەرگىلىكتى اكىمدىك الدىمەن ۋاقىتشا تۇرۋعا ءۇي بەردى. ەندى, مىنە, ءۇش بولمەلى ۇيگە قول جەتكىزىپ وتىر.
نۇرگۇل يبراحيموۆانىڭ دا ءۇي كەزەگىنە تىركەلگەنىنە 10 جىلداي ۋاقىت بولىپتى. «سابىر ءتۇبى – سارى التىن», دەپ كۇتىپ ءجۇردىم. ەكى بولمەلى ءۇيدىڭ كىلتىن الىپ, قۋانىشقا كەنەلىپ قالدىق. ەندى ءبىز جاڭا شاعىن اۋداننىڭ تۇرعىنىمىز», دەدى نۇرگۇل.
ەرلى-زايىپتى ەرلان-گۇلدەن مۇستافيندەر دە ءوز شاڭىراعىن ۇزاق كۇتكەندەردىڭ ءبىرى. ولار «قونىستويدى قىس بويى اتاپ وتەتىن بولدىق», دەيدى مەرەيلەنىپ.
اقسۋ-ايۋلىنىڭ ىرگەسىنەن بوي كوتەرگەن جاڭا شاعىن اۋدان تۇرعىندارىنىڭ ارمانى ورىندالىپ, شاڭىراق شاتتىعىن تويلاۋعا كۇن كەزەگىنە تۇرىپ جاتىر. ويتكەنى قۇدايى كورشى بولعان ولار قازاق سالتىمەن ءبىر-بىرىنە ەرۋلىك بەرۋگە قىزۋ كىرىسىپ كەتتى.
قاراعاندى وبلىسى,
شەت اۋدانى,
اقسۋ-ايۋلى اۋىلى
