Cاۋمالى الەمدى شارلاعان فەرمادا ەكى مىڭنان استام جىلقى بار. جىلقىلارىن ساۋىن كەزىندە ارنايى تەمىر قورشاۋعا قامايدى. بيە جەلىنىنە ساۋىنشىنىڭ قولى تيمەيدى. اپپاراتپەن ءيدىرىپ, ساۋىپ الادى. ءبىر ساۋعاندا 3-4 ليتر ءسۇت بەرەدى. جەمشوبىن ۋاقتىلى بەرگەندىكتەن كۇنىنە بەس مەزگىل ساۋىلادى.
ءسۇت ماشيناسى بيە ءسۇتىنىڭ ساپاسىن قاز-قالپىندا ساقتاپ, زاۋىتقا, ياعني سۋبليماتسيا ۇدەرىسىن جۇرگىزۋگە جىبەرەدى. بيە ءسۇتىنىڭ دارۋمەنى مەن ميكروەلەمەنتىنىڭ قالپى بۇزىلماي, سول جەردە كەپتىرىلىپ, ۇنتاقتالادى.
– وندىرىستەگى ءار كەزەڭدى ءجىتى باقىلاۋعا الامىز. ءسۇتتىڭ ءار ۇدەرىستەن وتكەنىن ءبىزدىڭ ماشىقتانعان تەحنولوگتەر نازاردا ۇستاپ, ساپاسىن قاداعالاپ وتىرادى. سۋبليماتسيا ۇدەرىسىنەن سوڭ ءسۇت مۇزداتىلادى. سوسىن كەپتىرىلەدى. وسى كەزەڭنەن سوڭ ءونىم دايىن بولادى. ابدەن تەكسەرىستەن وتكەن سوڭ ۇنتاقتى ارنايى گەرمەتيكالىق پاكەتتەرگە ورايمىز. ول دا ۇلكەن جۇمىس. ءونىمنىڭ بالعىندىعىنا, قۇنارى مەن ساقتاۋ مەرزىمىنىڭ ۇزارۋىنا بۇل پاكەتتەردىڭ وزىندىك پايداسى بار, – دەيدى شارۋاشىلىق باسشىسى سەرىك ءجۇنىسوۆ.
2 000 جىلقى از بايلىق ەمەس. سايكەسىنشە, شارۋاشىلىقتىڭ جايىلىم جەرى دە, شابىندىعى دا, ەگىستىك القابى دا بار. 11 000 گەكتار جەرگە ءشوپ ەگەدى. كاسىپكەر ەگىستىك القابىنان ءونىم كولەمىن ارتتىرۋعا دەن قويعان. ءۇيىر-ءۇيىر جىلقىسىن وسى ەگىستىكتەن تۇسكەن ونىممەن ءوسىرىپ وتىر. ەگىندى كۇتىپ-باپتايتىن بىلىكتى اگرونومدار مەن ساقاداي ساي تەحنيكالار – شارۋانىڭ باستى كۇشى.
بيىل اۆتوماتتاندىرىلعان سۋارۋ جۇيەسىن قۇرۋ ءۇشىن اۋقىمدى جۇمىستار قولعا الىنعان. ەندى بۇدان بىلاي داقىلداردى قولمەن ەمەس, ارنايى اۆتوماتتاندىرىلعان قۇرىلعى ارقىلى سۋارادى. سۋارۋ سالاسىنىڭ ماماندارىمەن بىرلەسە سورعى ستانساسى ورناتىلىپ, ماگيسترالدىق قۇبىرلار تارتىلدى. سۋ بەرۋ جۇيەلەرى دە جاسالدى. ءارى جوعارى ساپاداعى اۆتوماتتاندىرىلعان جابدىق قويىلدى. وسى جۇمىستار اياقتالعاننان كەيىن سۋارۋ جۇمىستارىن جۇرگىزىپ تە كورىپتى. جاڭاشا تاسىلمەن سۋارىلعان ءونىمدى دە الىپ ۇلگەرگەن.
– جوبا اياقتالعاننان كەيىن ونى ىسكە قوستىق. ساپاسى دا, جۇمىس ىستەۋ ۇلگىسى دە كوڭىلىمىزدەن شىقتى. وسى اۆتوماتتاندىرىلعان سۋارۋ جۇيەسىنىڭ ارقاسىندا ءونىم كولەمى ارتىپ, ساپا ەداۋىر جوعارىلادى. ويتكەنى ەگىستىكتىڭ ساي-سالاسىنا سۋ باردى. ءارى وزىق اۋىل شارۋاشىلىعى تەحنيكاسىن ساتىپ الىپ, ءوندىرىستى جاڭعىرتۋعا قادام جاسادىق. بۇل ءوندىرىس قۋاتتىلىعى ارتتى دەگەندى اڭعارتادى. زاماناۋي تەحنيكانىڭ ارقاسىندا اۋىل شارۋاشىلىعى جۇمىستارى ءبىرشاما جەڭىلدەدى. GPS جانە اۆتوماتتى باسقارۋ جۇيەلەرىمەن جابدىقتالعان تەحنيكالارىمىز ەگۋ, سۋارۋ جانە جيناۋ قىزمەتىن مۇدىرمەي اتقارادى. بۇرىنعىداي ەمەس, جاڭا تەحنيكالار كومەگىمەن شىعىنىمىز ازايىپ, ەگىن ساپاسى ارتىپ, ىرىسىمىز مولايدى, – دەيدى شارۋاشىلىق جەتەكشىسى.
كەلەر جىلى كاسىپورىن ءوزىنىڭ كوكونىس قويماسىن سالماقشى. بۇگىنگى كۇنى قويمانىڭ ىرگەتاسى قۇيىلىپ, قابىرعاسى قالانعان. قويمادا توننا-توننا كارتوپ پەن ءتۇرلى كوكونىس قورى ساقتالادى. وسى جەردەن ونىمدەرىن نارىققا شىعارىپ, كاسىپورىن شىعىنىن ازايتىپ, تابىسىن ارتتىرامىز دەپ جوسپارلاپ وتىر. مۇنىمەن قوسا, س ۇلى, ارپا سەكىلدى ءداندى داقىلداردى ساقتاۋ ءۇشىن جاڭا استىق قويماسى سالىنىپ جاتىر. زاماناۋي كليماتتىق باقىلاۋ جۇيەسىمەن جابدىقتالعان قويما ءونىم ساپاسىن جوعالتپايدى. ۇزاق ۋاقىت قالپىن بۇزباي ساقتاۋعا مۇمكىندىك بەرەدى. سايكەسىنشە, جاڭا جۇمىس ورنى اشىلىپ, اۋىل جۇرتى ەكى قولعا ءبىر كۇرەك تابادى.
قاراعاندى وبلىسى,
وساكاروۆ اۋدانى
