فوتو: ۆيدەودان كادر
«بۇگىن ساعات 15:30-دا ازات اۋىلىندا جەرلەۋ ءراسىمىن وتكىزۋ كەزىندە قوعامدىق ءتارتىپ پەن اينالاسىنداعىلاردىڭ, ونىڭ ىشىندە كامەلەتكە تولماعان بالالاردىڭ قاۋىپسىزدىگىنە قاۋىپ توندىرگەن وقيعا ورىن الدى. ازامات ن., پروكۋروردىڭ زاڭدىلىقتى ساقتاۋ تۋرالى تۇسىندىرمەلەرىن ەلەمەستەن, ءوزىن وتە اگرەسسيۆتى ۇستاي باستادى, اينالاسىنداعىلارعا قاۋىپ ءتوندىرىپ, سۋيتسيد جاسايمىن دەپ قورقىتتى. سونداي-اق, پوليتسيا قىزمەتكەرىنە پىشاقپەن شابۋىل جاسادى. ونىڭ مىنەز-قۇلقى وزىنە دە, اينالاسىنداعىلارعا دا قاۋىپ ءتوندىردى. ازامات ن. جاعدايىنا الاڭداعان تۋىستارى مەن ادۆوكاتتارىنىڭ ءوتىنىشى بويىنشا ونىڭ ءومىرى مەن اينالاسىنداعىلاردىڭ ومىرىنە زيان كەلتىرمەۋ ماقساتىندا پوليتسيا قىزمەتكەرلەرى ونى ۇستاۋ ءۇشىن شارالار قابىلدادى», دەپ حابارلادى الماتى وبلىسى پوليتسيا دەپارتامەنتىنىڭ ءباسپاسوز قىزمەتى.
قازىرگى ۋاقىتتا ول پوليتسيا بولىمىنە جەتكىزىلدى, ونىمەن پسيحولوگتار جۇمىس ىستەپ جاتىر.
«پوليتسيا جاعدايدى تۇراقتاندىرۋ بويىنشا جۇمىستى جالعاستىرۋدا جانە ازاماتتاردى سابىرلى بولۋعا شاقىرادى. ازاماتتاردان تەك رەسمي دەرەككوزدەرگە سەنۋدى سۇرايمىز جانە جالعان مالىمەتتەردى تاراتۋ قىلمىستىق جاۋاپكەرشىلىككە دەيىن اكەلۋى مۇمكىن ەكەنىن ەسكە سالامىز», دەلىنگەن حابارلامادا.
ايتا كەتەيىك, 2024 جىلعى 4 قازاندا تالعاردا جاپپاي توبەلەس بولىپ, سالدارىنان16 جاستاعى شەرزات پولات پىشاق جاراقاتىنان قايتىس بولدى. قوعامدىق رەزونانس تۋدىرعان ءجاسوسپىرىمدى ءولتىرۋ فاكتىسى بويىنشا قر قىلمىستىق كودەكسىنىڭ بەس بابى بويىنشا تەرگەۋ ءجۇرىپ جاتىر, 11 كۇدىكتى قاماۋعا الىندى.
سونىمەن قاتار, كەشە, 9 جەلتوقساندا تالعاردىڭ شەتىنەن شەرزات پولاتتىڭ اعاسىنىڭ ءمايىتى تابىلعان ەدى. الدىن الا مالىمەت بويىنشا, 30 جاستاعى نۇرعانات عايىپباەۆ اسىلىپ ولگەن. كەيىنىرەك الماتى وبلىستىق پوليتسيا دەپارتامەنتى 16 جاستاعى ءجاسوسپىرىمنىڭ اعاسىنىڭ ولەرىنەن بۇرىن جازعان حاتىن جاريالادى.
