جولدى تاپسىرۋ سالتاناتىنا «قازاۆتوجول» ۇلتتىق كومپانياسى» اكتسيونەرلىك قوعامى باسقارماسىنىڭ توراعاسى دارحان يماناشەۆ, وبلىس اكىمىنىڭ ءبىرىنشى ورىنباسارى ازامات تايجانوۆ, بالقاش قالاسىنىڭ اكىمى ساپار ساتاەۆ پەن جولدى سالعان مەردىگەر كومپانيانىڭ قىزمەتكەرلەرى قاتىستى.
سالتاناتتى راسىمدە العاشقى بولىپ قۇتتىقتاۋىن جەتكىزگەن «قازاۆتوجول» ۇلتتىق كومپانياسى» اكتسيونەرلىك قوعامى باسقارماسىنىڭ توراعاسى دارحان يماناشەۆ «قاراعاندى-بالقاش» كۇرە جولىنىڭ ءتورت جولاعى تولىعىمەن اشىلعاندىعىن ايتىپ, جولاۋشىلارعا اق جولىن تىلەدى.
– قاراعاندى قالاسىنان بالقاش قالاسىنا دەيىنگى ارالىقتا جاڭا اسفالت توسەلىپ, ءتورت جولاقتى جول تولىعىمەن اشىلدى. جول قوزعالىسى قاۋىپسىزدىگىن قامتاماسىز ەتۋ ءۇشىن توسقاۋىل قورشاۋلارى دا تالاپقا ساي تولىعىمەن ورناتىلدى. «قاراعاندى-بالقاش» كۇرە جولىنىڭ جالپى ۇزىندىعى – 363 شاقىرىم. كۇرە جول I ساناتقا يە جانە ءتورت جولاقتان تۇرادى. اۆتوبانعا 4 ملن تونناداي اسفالتبەتون توسەلىپتى. ونىڭ 610 مىڭ تونناسىن بيىل. قايتا قۇرۋ جۇمىستارى اياسىندا 11 كوپىر, اۋىل شارۋاشىلىعى تەحنيكاسى وتەتىن 32 جول وتكەلى, كولىك ايرىعى جانە تەمىرجول وتكەلىنىڭ قۇرىلىسى تولىعىمەن اياقتالدى. جالپى «ورتالىق-وڭتۇستىك» دالىزىنە جاتاتىن رەسپۋبليكالىق ماڭىزى بار «استانا-الماتى» كۇرە جولىنىڭ ۇزىندىعى – 946 شاقىرىم. 4 جولاقتى ساپالى جولدىڭ اشىلۋى جول اپاتىنىڭ ورىن الۋىن توقتاتادى. كەلەسى جىلدان باستاپ, اقىلى جول جۇيەسى ىسكە قوسىلادى, – دەدى د.سەرىك ۇلى.
جولاۋشىلار ءۇشىن 18 دەمالىس بەكەتى, 24 ايالداما, 1452 جارىق باعانى ورناتىلدى. قازىرگى ۋاقىتتا بۇل باعىتپەن كۇنىنە جوبامەن 18 مىڭ كولىك قاتىنايدى. جازدا 25 مىڭ كولىككە دەيىن ءجۇرىپ وتەدى.
ءبىزدىڭ جاپ-جاڭا كۇرەجول ەلىمىزدىڭ سولتۇستىگى مەن وڭتۇستىگىن عانا بايلانىستىرىپ وتىرعان جوق. رەسەي, قىتاي, قىرعىزستان مەن وزبەكستان اراسىنداعى ماڭىزدى ترانزيتتىك باعىتتاردىڭ ءبىرى. ەندى سايكەسىنشە ەلىمىزدىڭ كولىك الەۋەتى ارتىپ, جولاۋشى تاسىمالىنىڭ قاۋىپسىزدىگى ازايىپ, بالقاش كولىندەگى تۋريزم تۇلەيدى.
– بۇل جولدى ءبىزدىڭ قاراعاندى ءۇشىن عانا ەمەس, بارلىق ەلىمىزگە ماڭىزدى جول دەپ ايتۋعا بولادى. كوپتەن كۇتكەن «قاراعاندى-بالقاش» اراسىنداعى جول تورابى پايدالانۋعا بەرىلىپ وتىر. جولدىڭ جاقسارۋى ەلىمىزدىڭ ەكونوميكاسىنىڭ ودان ءارى وسۋىنە ۇلەسىن قوسادى. وسى جىل وبلىس بويىنشا 1032 شاقىرىم جول جوندەۋدەن ءوتتى. وسى جولداردىڭ بارلىعى ەلدىڭ يگىلىگىنە تاپسىرىلدى. وسى ورايدا «قاراعاندى-بالقاش» جول تورابىنا ۇلكەن ۇلەسىن قوسقان «قازاۆتوجول» ۇلتتىق كومپانياسى» اكتسيونەرلىك قوعامى باسقارماسىنىڭ توراعاسى دارحان سەرىك ۇلى باستاعان ۇجىمعا, مەردىگەر كومپانياعا العىس بىلدىرەمىن, – دەدى ايماق باسشىسىنىڭ ءبىرىنشى ورىنباسارى ا.تايجانوۆ.
بالقاش قالالىق ارداگەرلەر كەڭەسىنىڭ توراعاسى تايتولەۋ جۇمانوۆ اق باتاسىمەن مارتەبەلى مەيماندار بىرجاقتى ءجۇرۋ جولىنىڭ بەلگىسىن سالتاناتتى تۇردە اشتى. ەندى الماتى باعىتىنا بەت العان جولاۋشىلار بالقاشقا كىرىپ, باعدارشامعا توقتاپ, كەپتەلىستە كىدىرمەيدى. ءدال وسى تۇستان اينالىپ وتەدى.
ۇلتتىق كومپانيانىڭ باسشىسى 288 شاقىرىمدى الىپ جاتقان 4 جولاقتى «بالقاش-بۋرىلبايتال» جولى الداعى 10 كۇن ىشىندە اشىلاتىندىعىن جەتكىزدى. مۇنىمەن قوسا ۇكىمەت ەلدەگى 5 مىڭ شاقىرىم اۆتوجولدى جاڭعىرتۋعا قازاقستاننىڭ دامۋ بانكىنەن 1 ملرد دوللارعا جۋىق نەسيە العاندىعى, قارجى «قازاۆتوجول» ۇك» اق-عا ءتيىستى كەلىسىم شەڭبەرىندە بولىنەتىندىگىن دە ايتا ءوتتى. بۇل جۇمىستى 2024-2027 جىلدار ارالىعىندا ىسكە اسىرۋ جوسپارلانىپ وتىرعان كورىنەدى.
بۇدان بولەك ۇلتتىق كومپانيا قاراعاندى-اياگوز-تارباعاتاي-بوعاز, اقشاتاۋ-اعادىر-ورتاۋ, قىزىلوردا-پاۆلودار-ۋسپەنكا-رف شەكاراسى جانە باستاۋ-اقتاۋ-تەمىرتاۋ سەكىلدى رەسپۋبليكالىق اۆتوجولداردىڭ ورتاشا جوندەۋ (123 شاقىرىم) جۇمىستارىن اياقتاپتى.
كومپانيانىڭ كەلەر جىلى ۇزىندىعى 513 شاقىرىمدى قۇرايتىن «قاراعاندى-جەزقازعان» اۆتوجولىن قايتا جاڭارتۋ بويىنشا جۇمىس جوسپارلارىندا بار ەكەن. جوبانىڭ بارلىق كەزەڭىندە ساپانى باقىلاۋدى كۇشەيتۋ ءۇشىن ەرسم مەحانيزمى قولدانىلاتىن بولادى. قۇرىلىس جۇمىستارى 2026 جىلعا جوسپارلانعان.
مۇنىمەن قوسا, جالپى ۇزىندىعى 412 شاقىرىمدى قۇرايتىن «جەزقازعان-قىزىلوردا» اۆتوجولىنىڭ قايتا جاڭارتۋ جۇمىستارى جالعاسىپ جاتىر. بيىل قىزىلوردا وبلىسى بويىنشا نەگىزگى جۇمىستار اياقتالىپ, 150 شاقىرىم كولىك قوزعالىسىنا بەرىلگەن. جول قۇرىلىسىن تولىعىمەن كەلەسى جىلى اياقتايمىز دەيدى. ال ۇلىتاۋ وبلىسىنا قاراستى شاقىرىمدى كۇردەلى جوندەۋدەن وتكىزۋ ءۇشىن دايىندىق جۇمىستارى باستالىپتى. اتاپ ايتساق, تەحنيكالاردى موبيليزاتسيالاۋ مەن ءوندىرىس بازالارىن قۇرۋ بويىنشا.
«قازاۆتوجول» ۇلتتىق كومپانياسى ەلىمىزدىڭ كولىك ينفراقۇرىلىمىنىڭ دامۋى مەن قاۋىپسىز جول قوزعالىسىن نىعايتۋ ءۇشىن اۋقىمدى ينفراقۇرىلىمدىق جوبالاردى جۇزەگە اسىرىپ وتىر.
قاراعاندى وبلىسى
