2014 جىلى س.امانجولوۆ اتىنداعى ۋنيۆەرسيتەتتە قۇرىلعان «شابىت» ستۋدەنتتەر تەاترىنان بۇگىندە جەتى بۋىن, 150-گە جۋىق تۇلەك ۇشىپتى. وسى ۋاقىت ىشىندە تەاتردىڭ جەتكەن جەتىستىگى, قويعان قويىلىمى از ەمەس. ولاردىڭ قاتارىندا «جەلتوقسان جەلى», «مەنىڭ ءومىرىم», «ماحاببات مۇڭى», «تابامىن سەنى», «ار ايناسى» سەكىلدى تۋىندىلار بار. ال «اي مەن ايشا», «قىز جيىرماعا تولعاندا», «ناركوم جۇرگەنوۆ», «بارمىسىڭ ماحاببات» جانە «رەپورتاج» اتتى قويىلىمدار دا تەاتر رەپەرتۋارىندا ەرەكشە ورىن الادى.
– وسى ۋاقىتقا دەيىن قانشاما جاس تالانتتارمەن جۇمىس ىستەدىم؟ اربىرەۋىنىڭ ورنى ەرەكشە. تەاتر قۇرىلا سالا ماقساتتى تۇردە جۇمىس ىستەدىك. ستۋدەنتتىك شاقتىڭ قىزىقتى ساتتەرىن ساحنالادىق. سويتە ءجۇرىپ, كورەرمەنگە وي سالۋعا تىرىستىق. بۇگىنگى قويىلىم دا كوپشىلىكتىڭ ويىنان شىعارى ءسوزسىز, – دەدى «شابىت» تەاترىنىڭ جەتەكشىسى ەرتاي حاسەنوۆ.
ماقساتتى تۇردە جۇمىس ىستەگەن تەاتر ۇجىمى ماسكەۋ قالاسىنداعى «ترەتي زۆونوك» اتتى V حالىقارالىق تەاترالدى فەستيۆالىندە II دارەجەلى ديپلوممەن ماراپاتتالعان. رەسپۋبليكالىق بايقاۋلاردا دا تۇعىردان تۇسپەگەن. قايبىر جىلدارى ديداحمەت ءاشىمحاننىڭ «كوك پەرىنىڭ كەردەڭى» قويىلىمىن قويىپ, ءىى ورىن العان. سونداي-اق وبلىس كولەمىندە وتەتىن مادەني, ادەبي كەشتەردە «شابىت» تەاترىنىڭ ستۋدەنتتەرى ورتادان تابىلىپ جاتادى.
بۇگىنگى «اق كەلىن» قويىلىمىندا ەكى جاس ءبىر-ءبىرىن ءسۇيىپ قالعانىمەن, اتا-اناسى قارسى بولعان. كەيىننەن جاستار قۋلىققا باسادى. كۇلپاشتىڭ ۇلى بىرەۋدىڭ ەركە-شولجاڭ قىزىن كەلىن قىلىپ تۇسىرمەك بولادى. ونىڭ ۇستىنە ول ورىس ءتىلدى بولىپ شىعادى. ىشىمدىككە دە جوق ەمەس. مۇنى كورگەن اناسى ات-تونىن الا قاشىپ, اۋەلگى قىزىڭ ءتاۋىر ەكەن دەپ, رايىنان قايتقان. ءسويتىپ ەكى جاس قوسىلىپ, ۇلان-اسىر توي جاسايدى. ساحناداعى تويدىڭ اتموسفەراسى كورەرمەنگە دە سەزىلىپ تۇرادى.
قويىلىمنان سوڭ تەاتر ۇجىمىن ۋنيۆەرسيتەت, كىتاپحانا, مۋزەي ۇجىمدارى قۇتتىقتاپ, سىي-سىياپاتتارىن جاسادى.
وسكەمەن
