وسى ۋاقىتقا دەيىن «قاينار» جشس مەكەمەسىنىڭ اياداي عانا جەرىندە اۋىلدىڭ ۋچاسكەلىك ينسپەكتورى, ۆەتينسپەكتسيا ماماندارى مەن اكىمدىك ماماندارى جۇمىس ىستەپ كەلدى. سودان ەسكى اكىمدىك عيماراتىن ءسۇرىپ تاستاپ, قابىرعاسىن كەڭەيتىپ قايتا تۇرعىزدى. جوعارىدا اتاپ وتكەن قىزمەتكەرلەردىڭ اربىرىنە جاڭا مەكەمەدەن ءاربىرىنىڭ كىرىپ شىعاتىن ەسىگى بولەك كابينەت بەرىلدى. ەندى پوشتا مامانى دا وسىندا وتىرادى. جاڭا اكىمدىك بارلىق قاجەتتى جابدىقپەن قامتاماسىز ەتىلدى.
جاڭا عيماراتتىڭ قۇرىلىسىنا مەملەكەتتىك بيۋدجەتتەن 13 ملن تەڭگە قاراجات ءبولىندى. ونىمەن قوسا «قاينار» جاۋاپكەرشىلىگى شەكتەۋلى سەرىكتەستىگى 22 ملن تەڭگە اۋدارىپ, دەمەۋشىلىك كورسەتكەن.
اكىمدىكتىڭ لەنتاسىن اۋدان اكىمى باقىتجان مۇقانوۆ, «قاينار» جشس باسشىسى سەيىتجاپپار نىعمەتوۆ پەن اتىمتاي جومارت قانات وتارباەۆ قيىپ, يگى لەبىزدەرىن ءبىلدىردى.
«ىنتىماق, بىرلىگى جاراسقان اۋىلىمىزبەن ءاردايىم ماقتانامىز. وسى ءبىر شارۋا كوپتەن بەرى ەل ازاماتتارىنىڭ ەسىندە ءجۇر ەدى. مىنە, جارقىراعان جاپ-جاڭا اكىمدىك ەل يگىلىگىنە قىزمەت اتقارادى. اكىمشىلىك اۋىلىمىزدىڭ جۇرەگى سەكىلدى. ويتكەنى بارلىق اۋىل ءۇشىن جاسالاتىن يگى قىزمەتتەر وسى جەردەن باستاۋ الىپ, شەشىم تابادى. اۋىلعا حال-قادەرىمىزشە قىزمەت ەتە بەرەمىز», دەيدى جومارت جۇرەك سەيىتجاپپار الشىنبەك ۇلى.
اۋىل اكىمى ازامات سادىقوۆ جاپ-جاڭا عيمارات تارتۋ ەتكەن اۋدان اكىمدىگى مەن «قاينار» جشس باسشىسىنا رياسىز العىسىن جەتكىزدى. اۋىلدىڭ شارۋا قوجالىقتارى تۋعان جەردىڭ وركەندەۋىنە زور ۇلەس قوسىپ وتىرعان سەيىتجاپپار نىعمەتوۆكە شاپاپ جاۋىپ, سايگ ۇلىك مىنگىزدى.
اۋىلىنا شاراپات توگىپ وتىرعان شارۋاشىلىق ەگىن ەگىپ قانا قويماي, مال تۇقىمىن اسىلداندىرۋمەن دە جۇيەلى اينالىسىپ كەلەدى. جىل سايىن وتاندىق جانە شەتەلدىك اۋىل شارۋاشىلىعىنا قاجەتتى تەحنيكانىڭ ءتۇر-ءتۇرىن ساتىپ الىپ وتىرادى. ويتكەنى جۇمىستىڭ نەگىزگى كۇشى سول. سەيىتجاپپار الشىنبەك ۇلى – قاشاننان اۋىلدىڭ الەۋمەتتىك جاعدايىنا الاڭداعان ازامات. اۋىلداعى دارىگەرلىك امبۋلاتوريا, مادەنيەت ءۇيى, مەيرامحانا, مونشا, ناۋبايحانا – شارۋاشىلىقتىڭ قارجىسىنا جاسالعان يگى ىستەر. اۋىلداعى بۇقارالىق سپورتتى دامىتۋ ءۇشىن كەشەندى سپورتزال سالىپ بەرگەن. شارۋاشىلىق دەمەۋشىلىگىمەن مەشىت تە بوي كوتەرگەن. مەملەكەت-جەكەمەنشىك سەرىكتەستىگى ارقىلى بالاباقشا دا جۇمىسىن اتقارىپ وتىر. بۇعان قوسا ىرگەلى شارۋاشىلىق اۋىلداعى ەل-جۇرتقا جۇمىس بەرىپ وتىر.
قاراعاندى وبلىسى,
نۇرا اۋدانى,
قاينار اۋىلى
