سۋرەتتى تۇسىرگەن – ج.جۇمانيازوۆ
جارىس شۆەيتساريالىق راپيد جۇيەسىندە 9 تۋردان تۇردى. ويىن ۋاقىتى العاشقى جۇرىستەن باستاپ 10 مينۋت 5 سەكۋندقا جالعاسادى. جەڭىمپازدار بارلىق تۋرلاردا جيناعان ۇپايلارىنىڭ كورسەتكىشىنە قاراي انىقتالدى. جارىس ماقساتى – وبلىستىڭ بارلىق ەلدى مەكەندەرىندەگى ءتۇرلى جاستاعى شاحمات اۋەسقويلارىنىڭ قىزىعۋشىلىعىن ارتتىرىپ, ويىنشىلاردىڭ كاسىبي دەڭگەيىن كوتەرۋ, بىلىكتىلىك نورمالارىن ورىنداۋ, وبلىس قۇراماسىنىڭ ساپىنا كىل مىقتىنى ىرىكتەۋ.
«شاحمات ويىنى بالانىڭ ويلاۋ قابىلەتىن دامىتۋعا كومەكتەسەدى. ويتكەنى بۇل – لوگيكالىق ويىن. ويىن بارىسىندا جاڭا كومبيناتسياعا نەگىزدەلگەن قادامدار ويلاپ تابىلادى. ياعني ينتەللەكتۋالدىق قابىلەتتىلىكتى ارتتىرۋدا تاپتىرماس سپورت ءتۇرى. اتا-انالار دا بالاسىن ەرتە جاستان دامىتۋعا كوڭىل بولەدى. باستى ماقساتىمىز – شاحماتتى بارلىق ەلدى مەكەندەردە تانىمال ەتۋ. سوندىقتان كەزەكتى جارىستى شالعاي جاقتاعى اۋىلداردا وتكىزۋگە تىرىستىق. وبلىسىمىزدا بۇل سپورت ءتۇرى جوعارى دەڭگەيدە دامىپ كەلەدى», – دەيدى الماتى وبلىستىق شاحمات فەدەراتسياسىنىڭ پرەزيدەنتى سارسەنعالي جانقۋاتوۆ.
جارىس بارىسىندا بالالار كەلەسى جىلى ەلىمىزدىڭ ءتۇرلى قالالارىندا وتەتىن جىلدام شاحماتتان قازاقستان كۋبوگىنە قاتىسۋ ءۇشىن ىرىكتەۋدەن ءوتۋ مۇمكىندىگىنە يە بولدى. جالپى, الماتى وبلىسى كۋبوگىنىڭ فينالدىق كەزەڭى تارتىستى ءوتتى. كوماندالىق ەسەپتە 1-ورىندى تالعار اۋدانى, 2-ورىندى قاراساي اۋدانى, 3-ورىندى ەڭبەكشىقازاق اۋدانى يەلەندى. ءوز جاس ساناتتارىندا ءاسيا ابدۋحاميد, داۋلەت دارمەنيار, ءامىر ابدۋحاميد, نۇريا بۇلانباەۆا, سۇلتان تويبول, التىناي التىنبەك, دىنمۇحامەد مەلس, كاميلا شاكەنوۆا, دياس تويبول, ءمادينا قادىر, زامانبەك ەرمەكوۆ چەمپيون اتاندى.
الماتى وبلىسى
