ءماجىلىستىڭ قاراۋىنا ءبىرىنشى وقىلىمدا دەپۋتاتتار باستاماشى بولعان «پوشتا تۋرالى» زاڭعا وزگەرىستەر مەن تولىقتىرۋلار ەنگىزۋ ۇسىنىلدى. بۇل وزگەرىستەر پوشتا بايلانىسى نارىعىن دامىتۋعا, پوشتا جونەلتىلىمدەرىن جەتكىزۋ مەحانيزمدەرىن جەڭىلدەتۋگە جانە جەتىلدىرۋگە, پوشتوماتتاردى ورنالاستىرۋ ءتارتىبىن ناقتىلاۋ مەن پوشتا سالاسىنداعى ۋاكىلەتتى ورگاننىڭ قىزمەتىن جەتىلدىرۋگە باعىتتالعان.
سونىمەن قاتار ماجىلىسكە دەپۋتاتتار ازىرلەگەن «مادەنيەت تۋرالى» زاڭعا وزگەرىستەر ەنگىزۋ جونىندەگى تاعى ءبىر زاڭ جوباسىن تالقىلاۋ ۇسىنىلادى. قۇجاتتا قازاق ءتىلىن مادەني قۇندىلىق رەتىندە ساقتاۋ جانە قورعاۋ بويىنشا بىرقاتار زاڭنامالىق شارانى قابىلداۋ كوزدەلگەن. سونداي-اق جاستاردىڭ عىلىمي جانە ءبىلىم بەرۋ الەۋەتىن ىنتالاندىرۋعا باعىتتالعان نورمالار, جەتىم بالالار مەن اتا-اناسىنىڭ قامقورلىعىنسىز قالعان بالالارعا تالىمگەرلىك ينستيتۋتىن رەتتەۋ ماسەلەلەرى ەنگىزىلگەن.
ءماجىلىس كۇن ءتارتىبىنىڭ جوباسىندا ديپلوماتيالىق قىزمەت ماسەلەلەرى جونىندەگى زاڭ جوبالارى, سونداي-اق ەۋرازيالىق ەكونوميكالىق وداق پەن وعان مۇشە مەملەكەتتەر اراسىنداعى يرانمەن جانە سينگاپۋرمەن ەركىن ساۋدا تۋرالى كەلىسىمدەردى راتيفيكاتسيالاۋ تۋرالى زاڭ جوبالارى بار. ەكىنشى وقىلىمدا اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلاردى, سونداي-اق ولاردى كونستيتۋتسيا نورمالارىنا سايكەستەندىرۋ ماسەلەلەرى بويىنشا تۇزەتۋلەردى تالقىلاۋ ۇسىنىلادى.
