استانا. 30 ءساۋىر. بەلگىلى مۋزىكانت, ەسترادامىزدىڭ جارىق جۇلدىزى باتىرحان شوكەنوۆتىڭ كەنەتتەن قايتىس بولۋى بارشا قازاقستاندىقتارعا اۋىر سوققى بولىپ ءتيدى. بۇگىندە ءانشىنىڭ تۋعان جەرى قىزىلوردا وڭىرىنەن باستاپ استانا, الماتى قالالارى مەن وزگە وبلىس ورتالىقتارىندا ونەر جۇلدىزىنىڭ قۇرمەتىنە ەسكە الۋ شارالارى وتۋدە. استانالىقتار سۇيىكتى انشىلەرىن ەسكە الۋ ءۇشىن ەسىل وزەنىنىڭ جاعالاۋىنا جينالۋدا. بۇل تۋرالى egemen.kz حابارلادى.
مارقۇمنىڭ رۋحىنا دۇعا باعىشتاپ, ەسكە الۋ ءۇشىن جاعالاۋعا جاس پەن كارى بىردەي كەلۋدە. جينالعاندار ءانشىنىڭ اندەرىن ورىنداپ, ارنايى ورىنعا گۇل شوقتارىن قويۋدا.
«قازاقتىڭ ءبىرتۋار ازاماتى ەدى. وكىنىشتەن وزەگىمىز ورتەنۋدە. «جازمىشتان وزمىش جوق» دەگەن بار. بىراق باتىرحان ولگەن جوق. ويتكەنى, ونىڭ ارتىندا وشپەس اسىل مۇراسى – ونەرى قالدى. جوعارى باعالايتىن انشىلەرىمنىڭ ءبىرى ەدى. اندەرى جۇرەككە جەتەتىن. وسى جاعالاۋدا ەسكە الۋ ءۇشىن ورىن اشىلدى دەگەندى ەستىپ, زيارات جاساۋعا, رۋحىنا دۇعامىزدى باعىشتاۋعا ارنايى كەلدىك. ۇلتىمىزدىڭ اتاق-ابىرويىن وسىرگەن ۇلىمىز عوي. اللا الدىنان جارىلقاسىن», – دەيدى جاسى 70-تەن اسقان شورتان بەكباەۆ ەسىمدى اتامىز.
ايتا كەتەيىك, باتىرحان شوكەنوۆ كەشە ماسكەۋدەگى ءوز پاتەرىندە جۇرەك تالماسىنان قايتىس بولدى. ونەر تارلانىن سوڭعى ساپارعا شىعارىپ سالۋ ءراسىمى ەرتەڭ ساعات 9:00-دە الماتى قالاسىندا مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا وتەدى.
ەلامان قوڭىر.
دەرەك: egemen.kz.
سۋرەت: ەرلان وماروۆ.
