كەش بارىسىندا نۇرحان احمەتبەكوۆ اتىنداعى مادەنيەت ءۇيىنىڭ جانىنداعى ء«مىردىڭ وعى» ءازىل-سىقاق وتاۋىنىڭ ونەرپازدارى سەيىت كەنجەاحمەت ۇلىنىڭ ينتەرمەديالارىن ساحنالادى. ال ساتيرا ساردارى ۇرپاقتارىنىڭ اتىنان سۆەتلانا سەيىتقىزى اكە جايىندا تولعانا سويلەپ, كوڭىل ەلجىرەتەر ساعىنىشتى ەستەلىكتەر ايتتى.
ءىس-شارا اياسىندا «سان ونەردىڭ ساربازى» اتتى كورمە اشىلىپ, كوپشىلىك قالامگەردىڭ كوزى تىرىسىندە ءوزى تۇتىنعان كەزدىگىن, قاعاز كەسەتىن پىشاعىن, راديوقابىلداعىشىن, ويۋلى كەسەسىن, كورگەندە كوزگە وتتاي باسىلاتىن اق قالپاعىن, دومبىراسىن, وزگە دە جەكە دۇنيەلەرىن تاماشالادى.
«سەيىت كەنجەاحمەت ۇلى – تەك ساتيريك جازۋشى, ەتنوگراف عالىم عانا ەمەس, كەشەگى ءوزى كوزىن كورگەن نۇرحان, احمەتحانداردىڭ جولىن جالعاپ, ايتىسقا دا قاتىسقان سۋىرىپ سالما اقىن. مىسالى, 1967 جىلى قوستاناي قالاسىنىڭ اتىنان ايتىسقا شىعىپ, رۋدنىي قالاسىنىڭ اقىنى نازيقا ەرعاليەۆامەن ءسوز قاعىستىرعان. سەيىت اعا ءوزىنىڭ حالقىن, ونىڭ ادەت-عۇرپىن, ءداستۇرىن, مادەنيەتىن ءسۇيدى. قالامگەر «تورعاي تاڭى» گازەتىندە قىزمەت ەتىپ جۇرگەندە سول كەزدەگى پارتيانىڭ يدەولوگيا جونىندەگى حاتشىسى وزبەكالى جانىبەكوۆ شاقىرىپ الىپ: «سەن ساتيرانى جازا بەرەسىڭ عوي, بىراق مىنا قازاقتىڭ ۇمىتىلىپ بارا جاتقان ادەت-عۇرىپ, سالت-ءداستۇرىن كىم جينايدى؟ وسى شارۋانى قولعا الساڭ, قايتەدى؟», دەگەن ۇسىنىس ايتادى. وسىلايشا, سەيىت اعامىز جىلدار بويى تالماي ىزدەنىپ, ۇلتىمىزدىڭ سالت-ساناسى, ءداستۇر-مادەنيەتى تۋرالى قازاق, ورىس, اعىلشىن تىلدەرىندە ءۇش تومدىق كىتاپ شىعارىپ كەتتى», دەيدى ارقالىقتاعى دالا ولكەسى تاريحى مۋزەيى ديرەكتورىنىڭ ورىنباسارى باتىرلان ساعىنتاەۆ.
قوستاناي وبلىسى
