مەكتەپ عيماراتى ءتورت قاباتتى. بۇل وبلىس مەكتەپتەرى اراسىنداعى ەڭ ۇلكەنى. اۋماعىندا بالالارعا ىڭعايلى بولۋ ءۇشىن قويىلعان پەريمەترلىك كىرەبەرىستەر, باستاۋىش سىنىپتار مەن جوعارى سىنىپتاعىلارعا ارنالعان جەكە كىرەبەرىستەر بار. مەكتەپ اۋلاسىندا ويىن, ۆوركاۋت, فۋتبول, باسكەتبول الاڭدارى, حوككەي كورتى, جۇگىرۋ الاڭى بار. اۋلانى كوگالداندىرۋعا ارنالعان اعاشتار قوڭىرجاي بەلدەۋلىك كليماتقا تاڭدالىپ الىنعان. جاڭا ءبىلىم وشاعىندا وسى اۋدانعا جاقىن «تريليستنيك», «Arena Park», «جاڭا ورتالىق», «اتامەكەن», «كومفورتنىي دوم», «ساپفير», «بايسانات», «Zaman», «امادينا», «Onix», «مەرەي» تۇرعىن ءۇي كەشەندەرىندە تۇراتىن وقۋشىلار ءبىلىم الىپ جاتىر.
قازىر مەكتەپتە 1 525 وقۋشى ءبىلىم الادى. ءالى دە وقۋشىلاردى مەكتەپكە قابىلداپ جاتىر. مۇندا بىردەن قاسىنداعى ءالىمحان ەرمەكوۆ اتىنداعى مەكتەپ-ليتسەيدەن 1 200 بالا اۋىستىرىلدى. مۇنىمەن قوسا, №102, 101 جانە 86 مەكتەپتەن دە قابىلداندى.
«جايلى مەكتەپتىڭ» سالىنۋىنا دانەكەر «Samruk-Kazyna Construction» كومپانياسى قۇرىلىس كەزىندە بارلىق ماتەريال وتاندىق تاۋار وندىرۋشىلەردەن ساتىپ الىناتىنىن ايتقان. سول تالاپ ساقتالىپ, سىرتقى قاسبەتىنە قاجەت ماتەريالدى دا وتاندىق ونىمنەن تاڭداعان. مەكتەپ ىشىنە قاجەتتى بارلىق ساپالى جابدىق تا ەلىمىزدىڭ جيھاز شىعارۋشىلارىنان.
وسىلايشا, 2 مىڭ وقۋشىعا ارنالعان «جايلى مەكتەپ» قالانىڭ وڭتۇستىك-شىعىس بولىگىندە ورنالاسقان ءتورت مەكتەپتىڭ جۇكتەمەسىن ازايتىپ وتىر.
– «جايلى مەكتەپتەردىڭ» جابدىقتارى مەن قۇرىلىس ماتەريالدارى جوعارى تالاپتارعا سايكەس تاڭدالىپ الىنعان. پرەزيدەنتتىڭ مەگا جوباسىن ساپالى ىسكە اسىرۋدا سپورتزالداردىڭ سانى باسقا مەكتەپتەردەن الدەقايدا ارتىق. مەكتەپتەردىڭ ديزاينى دا ەرەكشە, ءتىپتى باستاۋىش پەن ەرەسەك سىنىپتاردىڭ بولەك بلوكتاردا وقۋى سەكىلدى ماسەلەلەر دە ءجىتى قاراستىرىلعان. شالعايداعى اۋىلداردىڭ وزىندە جايلى مەكتەپتەردىڭ بوي كوتەرەتىنى بالالار ءۇشىن ۇلكەن ولجا بولعالى تۇر. بىزگە №103 مەكتەپتەن 40 مۇعالىم 40 سىنىپپەن اۋىسىپ كەلدى. جاس پەداگوگتەر كونكۋرس ارقىلى قابىلداندى. قازىردىڭ وزىندە 130-دان استام مۇعالىم جۇمىسقا قابىلداندى. جالپى, ءوزىم جاس ماماندارمەن جۇمىس ىستەگەندى ۇناتامىن. ويتكەنى جاستاردىڭ ينتەللەكتىسى جوعارى, ىزدەنىمپاز. جاستاردان دا ءدارىس الامىز, تاجىريبە الماسامىز, – دەيدى مەكتەپ ديرەكتورىنىڭ مىندەتىن اتقارۋشى گۇلدانا اساميدانوۆا.
«جايلى مەكتەپتە» تاعى ءبىزدىڭ كوزىمىزگە تۇسكەنى – مۇعالىمدەر مەن وقۋشىلاردىڭ تەگىس ءبىر ۇلگىدە ۇلتتىق كيىم كيگەنى. وقۋشىلار كيىمدەرىنىڭ وڭ جاق كەۋدەشەسىنە «الاش» بەلگىسىن, ۇستازدار كامزولدارىنىڭ بەلدەمشەسىنە, ەر مۇعالىمدەر جەلەتكەلەرىنىڭ سول جاعاسىنا ورنەك سالعان.
– اتا-انالاردىڭ كوبىسى مەكتەپ فورماسىنىڭ بىردەي بولعانىن قولدادى. بالالار اراسىندا «سەنىڭ كيىمىڭ قانداي؟» دەگەن ارتىق ساۋال بولمايدى. ۇستازداردىڭ وزدەرى «ەرتەڭ نە كيەمىن؟» دەپ باسىن قاتىرمايدى. ويتكەنى مەكتەپكە بىردەي فورما بەكىتتىك. «جايلى مەكتەپتىڭ» باستى ۇستانىمىنىڭ ءبىرى – ءبىلىم بەرۋشىلەر مەن الۋشىلارعا جايلىلىق سىيلاۋ. ءبىز ءۇشىن – ءبارى تەڭ. بالالار بارلىق نازارىن بىلىمگە, ۇلتتىق تاربيەگە بۇرسا دەگەن نيەت, – دەيدى گۇلدانا يبرايكەنقىزى.
باستاۋىش جانە جوعارعى سىنىپتار ءۇشىن بولەك بلوكتار بار. مەكتەپتىڭ ءار قاباتىندا كوۆوركينگ الاڭدارى بار بولعاندىقتان, وقۋشىلار ەمىن-ەركىن پىكىر الماسادى, اشىق اڭگىمەلەسەدى.
مۇنىمەن قوسا, شاحمات, توعىزقۇمالاق, دويبى سەكىلدى لوگيكاعا قاجەتتى قۇرال-جابدىقتاردىڭ ءبارى بار. وقۋشىلارعا جاساندى ينتەللەكت جايلى جان-جاقتى تۇسىندىرەتىن ەرسۇلتان تۇردىنوۆ – بەلسەندى جاس مامان. «جىل مۇعالىمى» اتانعان ول وقۋشىلاردى دويبىعا دايىنداپ جاتىر.
– وقۋشىلارعا شاحمات جانە ۇلتتىق ويىن توعىزقۇمالاقتان ساباق بەرەمىن. وقۋشىلار الداعى ۋاقىتتا وتەتىن وبلىستىق جارىستارعا دايىندىق ۇستىندە, – دەيدى حيميا ءپانىنىڭ مۇعالىمى, شاحماتتان سپورت شەبەرى ەرسۇلتان تۇردىنوۆ.
ءبىلىم الۋشىلاردىڭ كوبى تاڭەرتەڭگى اۋىسىمدا وقيتىندىقتان ولار تۇسكى ۋاقىتىن قوسىمشا ساباققا جۇمسايدى. مەكتەپ ىشىنەن اشىلعان ءتۇرلى ۇيىرمەگە بالالار اسا قىزىعۋشىلىقپەن قاتىسادى.
– قازىرگى تاڭدا 13 نەگىزگى جانە قوسىمشا دەنە تاربيەسىنە دايىندايتىن 4 ۇيىرمە مەن دەبات كلۋبى بار. ۇيىرمەگە قاتىساتىن وقۋشىلارعا وزدەرىمەن ۇيدەن ەشتەڭە اكەلىپ اۋرە بولمايدى. «جايلى مەكتەپتە» دومبىرا, دويبى, كۇرەس, حورەوگرافيا سەكىلدى قوسىمشا ساباقتار ءۇشىن قاجەتتى جابدىقتىڭ ءبارى بار. ساباعىن اياقتاعان وقۋشى ءوزىنىڭ ۇياشىق سورەسىنە كيىمدەرىن قويىپ, اۋىستىرىپ, تۇسكى اسىن ءىشىپ, ۇيىرمەگە الاڭسىز قاتىسا الادى. كوپ وقۋشىلار ۋاقىتىن وقىرمان زالىندا وتكىزەدى, – دەيدى مەكتەپ باسشىسى.
مەكتەپتىڭ جوعارى قاباتىنداعى وقىرمان زالىندا تەك كىتاپ وقۋمەن شەكتەلمەيدى, قوسىمشا ەلەكتروندى كىتاپپەن جۇمىس ىستەي الادى. كىتاپحانا مەڭگەرۋشىسى گۇلزات سەكەنقىزى كىتاپ قورىن ساقتايتىن ارنايى بولمە قاراستىرىلعانىن ايتادى. بيىل 1 500 بالا جاڭا وقۋلىقپەن قامتىلعان. قالعان 400-دەي كىتاپ سورەدە ساقتاۋلى.
مۇنىمەن قوسا, «جايلى مەكتەپتە» باستاۋىش جانە جوعارى سىنىپ وقۋشىلارى ءۇشىن وقۋ كابينەتتەرى, سانيتارلىق توراپتار مەن سپورت زالدىڭ بلوكتارى كەڭ. STEM-زەرتحانا, روبوتتەحنيكا, حورەوگرافيا زالدارىمەن قاتار ينكليۋزيا كابينەتتەرى دە بار.
– بارلىق ساباق تاقىرىپتىق كارتالارىمەن ەرەكشە. باسقا مەكتەپتەرمەن سالىستىرعاندا ءاربىر وقۋشىعا قولجەتىمدى, ءاربىر پارتادا گلوبۋستار مەن ينتەربەلسەندى تاقتا دا بار. وسى مۇمكىندىكتى پايدالانىپ, بەينەروليكتەر كورسەتەمىز. وقۋشىلار ءارتۇرلى پلاتفورمالاردا جۇمىس ىستەيدى. ماسەلەن, سىنىپتىڭ وزىندە گلوبۋستىڭ ءار ءتۇرى بار. وقۋشىعا دا مۇعالىمگە دە بارلىق مۇمكىندىك قاراستىرىلعان, – دەيدى مەكتەپكە ا.بايتۇرسىنوۆ اتىنداعى مەكتەپ-گيمنازياسىنان اۋىسىپ كەلگەن گەوگرافيا ءپانىنىڭ مۇعالىمى سالتانات سادىقوۆا.
«جايلى مەكتەپتىڭ» تاعى ءبىر ارتىقشىلىعى – ءار مۇعالىمدە جەكە كومپيۋتەر بار. مۇنداعى وقۋشىلار كابينەت اۋىستىرىپ, كوشىپ جۇرمەيدى. بارلىق كابينەت پەن زەرتحانالار موديفيكاتسيالانعان.
مەكتەپتە مۇمكىندىگى شەكتەۋلى وقۋشىلارعا ارنايى ليفت ورناتىلعان. ينكليۋزيۆتى سىنىپتار اراسىندا 6 بالا ءبىلىم الاتىندىقتان, ينكليۋزيۆتى بىلىمگە ەرەكشە ءمان بەرەدى. ويتكەنى مۇگەدەكتىگى بار بالالار ءۇشىن كەدەرگىسىز ورتا قۇرىلۋى قاجەت دەيدى مەكتەپ اكىمشىلىگى.
– «جايلى مەكتەپتىڭ» جيىن زالىنىڭ ءوزى كونتسەرت سارايىنا بەرگىسىز. مۇندا اپتاسىنا ءبىر مارتە تانىمدىق ساباق ءوتىپ تۇرادى. اسىرەسە باستاۋىش سىنىپ وقۋشىلارىنا – قازاقشا مۋلتفيلمدەر, 3-4-سىنىپ وقۋشىلارىنا – كوركەم فيلمدەر, 5-7-سىنىپتارعا – تانىمدىق ءارى تاريحي فيلمدەر كورسەتەدى. ال جوعارعى سىنىپ كوبىنەسە ۇلى عالىمدار, تۇلعالار جايىندا دەرەكتى فيلم تاماشالايدى, – دەيدى قازاق ءتىلى مەن ادەبيەتى ءپانىنىڭ مۇعالىمى, بىلىكتى ۇستاز مارتبەك كۇزەمباەۆ.
ءبىر مەزەتتە مەكتەپ اسحاناسىنان 480 بالا تاماقتانا الادى. مۇنداعى اس ءمازىرى دە مول. بالالار اس ءىشىپ بولعان سوڭ باتا قايىرادى. بۇل «جايلى مەكتەپ» اسحاناسىنىڭ جازىلماعان زاڭى.
بالالار قاۋىپسىزدىگى – «جايلى مەكتەپ» ۇستاناتىن باستى قاعيدا. كەز كەلگەن ۋاقىتتا قاۋىپ تونگەنىن سەزىنگەن وقۋشى پوليتسيا شاقىرۋ تەتىگىن باسا الادى. مۇنىمەن قوسا مەكتەپتىڭ ىشكى بولىگىندە 152 بەينەباقىلاۋ, عيماراتتىڭ سىرتىندا 30 بەينەباقىلاۋ كامەراسى ورناتىلعان.
مىنە, ءبىز كورگەن «جايلى مەكتەپتىڭ» يگىلىگى وسىنداي. مەكتەپ ۇجىمى جاقىندا عانا «مىرجاقىپ دۋلات ۇلى – الاش ارداقتىسى» اتتى عىلىمي-تانىمدىق كونفەرەنتسيا وتكىزدى. كونفەرەنتسيا نەگىزىندە الاش قايراتكەرىنە قاتىستى بىرنەشە جوبا قولعا الىناتىن بولدى. باستىسى جالىنداپ تۇرعان «جايلى مەكتەپ» مىرجاقىپتىڭ اتىن العىسى كەلەدى. ول كۇننىڭ دە اۋىلى الىس ەمەستىگىنە سەنگىمىز كەلەدى.
سونىمەن, وڭىرىمىزدە كەلەر جىلعا قاراي ءداپ وسىنداي 18 «جايلى مەكتەپ» سالىنادى. تورتەۋى – قاراعاندىدا قالاسىندا, ۇشەۋى – بۇقار جىراۋ اۋدانىندا, ەكەۋى – شەت اۋدانىندا جانە بىرەۋى – بالقاشتان اشىلادى. قالعان سەگىز مەكتەپ اباي, قارقارالى, پريوزەرسك, نۇرا كەنتىندە بوي كوتەرەدى. بۇل دەگەنىمىز – ءۇش اۋىسىمدى وقىتۋ, مەكتەپتەگى ورىن تاپشىلىعى سەكىلدى ماسەلەلەردى جويادى.
قاراعاندى وبلىسى
