سۋرەت: facebook.com/oquagartuministrligi/
مينيسترلىكتىڭ تاراتقان اقپاراتىنا سۇيەنسەك, اتالعان ءىسساپار قازاقستان پرەمەر-ءمينيسترىنىڭ تەحنيكالىق جانە كاسىبي ءبىلىم جۇيەسىندەگى ستۋدەنتتەرگە قولداۋ كورسەتۋ ءارى سالانى دامىتۋ ءۇشىن ەلىمىزدە ۇلتتىق قۇزىرەتتىلىك ورتالىعىن قۇرۋ تۋرالى تاپسىرماسىن جۇزەگە اسىرۋ اياسىندا ۇيىمداستىرىلدى. ع.بەيسەمباەۆتىڭ مامانداردى دايارلايتىن بىرەگەي وقۋ ورتالىعى – لۋ بان شەبەرحاناسىنا بارۋى جۇمىس ساپارى بارىسىنداعى ماڭىزدى ءىس-شارالاردىڭ ءبىرى بولدى. كەشەن ستۋدەنتتەردىڭ جاڭا وندىرىستىك جانە تسيفرلىق تەحنولگوگيالاردى, ينجەنەرلىك جوبالاۋدى مەڭگەرۋىنە مۇمكىندىك بەرەتىن زاماناۋي قۇرال-جابدىقتارمەن, وقۋ ماتەريالدارىمەن جاراقتاندىرىلعان. بۇل تاجىريبەنى ەلىمىزدە ۇلتتىق قۇزىرەتتىلىك ورتالىعىن اشۋ كەزىندە قولدانۋ جوسپارلانىپ وتىر, بۇل تەحنيكالىق جانە كاسىپتىك جۇيە ستۋدەنتتەرى ءۇشىن جاڭا مۇمكىندىكتەرگە جول اشادى.
تيانتسزيندە ع.بەيسەمباەۆ قىتايدىڭ جەتەكشى كوللەدجدەرىنىڭ وكىلدەرىمەن بىرنەشە كەلىسسوز وتكىزدى. تاراپتار ەكىجاقتى ىنتىماقتاستىقتى دامىتۋ جانە جۇمىسشى مامانداردى دايارلاۋدا تاجىريبە الماسۋ ماسەلەلەرىن تالقىلادى. سونداي-اق 48 مەملەكەتتىڭ سالالىق مينيسترلەرىنىڭ قاتىسۋىمەن وتكەن دۇنيەجۇزىلىك كاسىپتىك جانە تەحنيكالىق ءبىلىم بەرۋدى دامىتۋ جونىندەگى كونفەرەنتسياعا قاتىستى. وتىرىستىڭ پلەنارلىق سەسسياسىندا ءسوز سويلەگەن مينيستر قازاقستاندا كاسىبي-تەحنيكالىق ءبىلىم بەرۋ جۇيەسىن دامىتۋدىڭ ماڭىزدىلىعىنا توقتالىپ ءوتتى.
«قازاقستان پرەزيدەنتى جاريالاعان «جۇمىسشى ماماندىقتار جىلى» اياسىندا تەحنيكالىق جانە كاسىبي ءبىلىم جۇيەسىن ترانسفورماتسيالاۋ جۇرگىزىلىپ جاتىر. اسىرەسە كۇردەلى وندىرىستىك ماسەلەلەردى شەشۋ ءۇشىن قاجەت ەموتسيونالدىق ينتەللەكت, ينجەنەرلىك ويلاۋ سياقتى جۇمساق داعدىلاردى دامىتۋعا ەرەكشە نازار اۋدارىلىپ كەلەدى. حالىقارالىق تاجىريبەنى ەسكەرە وتىرىپ, زاڭنامالىق نورمالاردى جەتىلدىرۋگە, كوللەدجدەردى باسقارۋ جۇيەسىن كۇشەيتۋگە باسىمدىق بەرىلەدى. قازاقستان ءوز ستۋدەنتتەرىنىڭ باسەكەگە قابىلەتتىلىگىن ارتتىرۋ ءۇشىن مامان دايارلاۋ ۇردىسىنە الەمدىك كاسىبي قاۋىمداستىق پەن الدىڭعى قاتارلى ءبىلىم تەحنولوگيالارىن ەنگىزۋگە ۇمتىلىپ وتىر», دەپ مالىمدەدى ع.بەيسەمباەۆ.
سونداي-اق مينيستر قىتاي حالىق رەسپۋبليكاسىنىڭ ءبىلىم ءمينيسترى حۋاي تسزينپەنمەن ەكىجاقتى كەزدەسۋ وتكىزدى. تاراپتار ءبىلىم سالاسىندا قازاقستان-قىتاي ىنتىماقتاستىعىن ارتتىرۋ, تەحنيكالىق جانە كاسىپتىك بىلىمدە ەكى ەلدىڭ تاجىريبە الماسۋى ماسەلەسىن تالقىلادى.
