ونىڭ قاراعاندىداعى ىرگەلى ءارى ىلگەرى اباي اتىنداعى مەكتەپ-گيمنازياسىندا قىزمەت قىلۋى دا سودان. جاڭا مەكتەپتىڭ قۇرىلعانىنان باستاپ بۇگىنگى كۇنگە دەيىن ورلەۋىنە جاس پەداگوگتىڭ وزىندىك ۇلەسى بار.
ءبىرشاما تالانتتى وقۋشىلارى رەسپۋبليكالىق دودالاردان توپ جارىپ كەلدى. استانادا وتكەن شىعارماشىل وقۋشىلار اراسىنداعى «اقبەرەن» ءىح رەسپۋبليكالىق ونەر بايقاۋىندا شەشەندىك ونەر اتالىمىندا ەركەجان قانىش ەسىمدى وقۋشىسى ەكىنشى ورىن يەلەنگەن. كوپ ۇزاماي اقتاۋ قالاسىندا وتكەن ح رەسپۋبليكالىق «اقبەرەن» وقۋلارىنان ەركەجان شاكىرتى ءۇشىنشى ورىن الادى. مۇنىمەن قوسا V رەسپۋبليكالىق ء«ىشى – التىن, سىرتى – كۇمىس ءسوز جاقسىسى…» شەشەندىك ونەر بايقاۋىندا 10 سىنىپ وقۋشىسى دۇيسەن ابىلاي ءبىرىنشى ورىن السا, سيا ايبوتا ءۇشىنشى ورىنعا قول جەتكىزەدى. بۇل جاس مۇعالىم دايىنداعان وقۋشىلاردىڭ تەك رەسپۋبليكالىق سايىستاردان قول جەتكىزگەن جۇلدەلەرى. قالالىق, وبلىستىق سايىستاردان توپ جارىپ جۇرگەن شاكىرتتەرى دە جەتىپ ارتىلادى. ءوزى دە مەكتەپ وقىپ جۇرگەن كەزىندە ءسوز ونەرىنەن ءتۇرلى سايىسقا ءتۇسىپ, توپ جارىپ ءجۇرىپتى. اسىرەسە ماحامبەت پەن مۇقاعاليدى ءسۇيىپ وقىعان كورىنەدى. ەكەۋىنىڭ بارلىق ولەڭىن جاتقا ءبىلىپ, ونى ءورشىل رۋحپەن وقىعاندا تىڭدارماندى تاڭداي قاقتىراتىن تالانتتى بولعان. تالاپتى ۇستاز سودان بولار شاكىرتتەرىنىڭ جولىن اشىپ, شىعارماشىلىعىن دامىتامىن دەپ دامىل تاپپايدى.
ءبىلىم نەگىزىن بالا كەزىنەن مىقتاپ قالاعان ول مايقۇدىقتاعى ۇلت كوسەمى ءاليحان بوكەيحان اتىنداعى مەكتەپتىڭ تۇلەگى ءارى ماقتانىشى. ۇستاز بولۋعا جاستايىنان ۇمتىلدىرعان كۇمىس شماكوۆا مەن جاڭاگۇل نۇرمۇحانقىزىنىڭ ەسىمىن اۋزىنان تاستامايدى.
ە.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ فيلولوگيا فاكۋلتەتىندە ءبىلىمىن تەرەڭدەتكەن ونىڭ ستۋدەنتتىك جولى دا شىعارماشىل ورتامەن تىعىز بايلانىستا بولىپتى.
ونىمەن قوسا تۋعان اعاسى ءانۋار دا تاريح ءپانىنىڭ مۇعالىمى. اعاسىنان كورگەنى بار, ءوزىنىڭ تۇيگەنى بار جانگەلدى ءسويتىپ ۇستازدىق جولعا توپ ەتە قالعان.
ەڭبەك جولىن سۇرىپتاۋ كەنتىندەگى №12 جالپى ءبىلىم بەرەتىن مەكتەپتەن باستاعان. وسى جەردە ءجۇرىپ تاجىريبە جيناقتايدى. ساباق بەرۋدىڭ ءتۇرلى مەتوديكاسىن مەڭگەرەدى. مەكتەپتىڭ بەلسەندى ۇستازى بولعان ول اۋەلى بالالار بويىندا ۇلتتىق بولمىستى قالىپتاستىرۋدى كوزدەيدى. سول ءۇشىن جۇمىس جاسايدى. ءسويتىپ ءجۇرىپ مەكتەپ باسشىلىعىنىڭ رۇقساتىمەن ءبىلىم وشاعىندا ويشىل, رۋحاني قايراتكەر ءماشھۇر ءجۇسىپ اتىنداعى كونفەرەنتسيانى ۇيىمداستىرۋعا ۇيىتقى بولادى. ونداعى ماقساتى – مەكتەپكە ماشەكەڭنىڭ اتىن الىپ بەرۋ ەدى. بىراق كەيىننەن قالانىڭ وڭتۇستىك-شىعىس اۋدانىنا قونىس اۋدارعاندىقتان قازىرگى قىزمەت ەتىپ جۇرگەن اباي مەكتەبىنە اۋىسىپ, ويعا العان شارۋاسى اياقسىز قالادى. ەندى مىنانى قاراڭىز, سول ماشەكەڭ كەيىنگى ۋاقىتتا جانگەلدى ۇستازدىڭ تۇسىنە كىرىپ ءجۇر ەكەن. ول جايلى ءوزى بىلاي دەيدى:
«اباي مەكتەبىنە اۋىسىپ كەلىپ, قال-قادىرىمىز جەتكەنشە ساباعىمىزدى بەرىپ جۇردىك. شاكىرتتەرىم دە بيىكتەن كورىنىپ ءجۇر. بارلىعى ويداعىدان دا جاقسى. بىراق كەيىنگى ۋاقىتتا ۇلكەن قاسيەت يەسى ماشەكەڭدى كورىپ ءجۇرمىن. سودان ەندى ءتۇسىنىپ جاتىرمىن. باستاعان ءىسىمدى اياقسىز قالدىردىم. سول سەبەپتى ماشەكەڭنىڭ رۋحى مازالاپ ءجۇر. بۇلاي جاراماس. قازىر اباي مەكتەبىندە قىزمەتىمدى اتقارىپ جۇرسەم دە سول شارۋاعا كىرىستىم», دەيدى جاس مۇعالىم.
مىنە قازىر سول مەكتەپتىڭ اكىمشىلىگىمەن كەلىسىم ورناتقان ول قۇجاتىمەن زىر جۇگىرىپ ءجۇر. اينالىپ كەلگەندە بۇل دا ۇلتقا قىزمەت قىلۋدىڭ ايشىقتى ايعاعىنىڭ ءبىرى.
«ۇستاز تەك پاندىك ءبىلىم عانا بەرىپ قويماي, شاكىرتىنىڭ ومىرلىك كوزقاراسىن شاما-شارقىسى كەلگەنشە قالىپتاستىرۋعا تىرىسادى. وقۋشىلاردى الەمدە اشىلىپ جاتقان ءتۇرلى جاڭالىقتار قىزىقتىرادى. ءبىزدىڭ كەز كەلگەن تاقىرىپتا سويلەسە الۋىمىز ماڭىزدى. وسىنى تۇسىنە وتىرىپ, مەن ءار ساباققا تىڭعىلىقتى دايىندالامىن. ماسەلەن ادەبيەت الەمىندەگى سوڭعى جاڭالىقتاردى ءبىلىپ بارۋعا تىرىسامىن. سىنىبىمداعى وقۋشىلاردى كىتاپقا باسىلعان وتكەن تاريح قانا ەمەس, كەلەشەكتىڭ دە اڭگىمەسى قىزىقتىرادى. اسىرەسە وقۋشىلار ەكرانيزاتسيالانعان كوركەم تۋىندىلاردى كورەدى. ساباق ۇستىندە انيماتسيالىق فيلمدەر مەن ينتەللەكتۋال اۋديتورياعا لايىقتى كوركەم فيلمدەردى تالدايمىز. مۇنىڭ ءبارى مەنى ءسوزسىز قۋانتادى. مەكتەپ قابىرعاسىندا ءجۇرىپ-اق ورەلى تاقىرىپتاردى قوزعاي الاتىن شاكىرتتەرىمنەن زور ءۇمىت كۇتەمىن», دەيدى پەداگوگ-مودەراتور ج. كەنجەباي.
وسىدان كەلە جانگەلدى سەكىلدى بالالاردىڭ جانىنا ءبىلىم عانا ەمەس, ۇلتتىق تاربيە سىڭىرە الاتىن ەر مۇعالىمدەردىڭ قاتارى كوبەيسە دەيسىڭ, شىركىن!
