سۋرەت: ara24.kz
25 قاراشا مەن 10 جەلتوقسان ارالىعىندا وتەتىن بۇل اكتسيا بۇكىل ەل اۋماعىن قامتيدى. ايەلدەر مەن بالالاردىڭ قۇقىقتارىن قورعاۋعا باعىتتالعان ءىس-شارا اقجايىق وڭىرىندە دە باستاۋ الدى. ءباسپاسوز كونفەرەنتسياسىنا كەلگەن وبلىس اكىمىنىڭ گەندەرلىك ساياسات ماسەلەلەرى جونىندەگى شتاتتان تىس كەڭەسشىسى جانسۇلۋ تورەمۇراتوۆا, بقو پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى ارمان دۇيسەكەنوۆ, «اق وتاۋ» وتباسى ورتالىعى» قوعامدىق بىرلەستىگىنىڭ ءتورايىمى التىناي ەسقاليەۆا قوعامنىڭ نازارىن گەندەرلىك زورلىق-زومبىلىق ماسەلەسىنە اۋداردى.
ءىس-شارا تۇرمىستىق زورلىق-زومبىلىقتىڭ الدىن الۋ, ايەل مەن بالا قۇقىعىن قورعاۋعا باعىتتالعان. اكتسيا «بەيجىڭ دەكلاراتسياسى مەن ءىس-قيمىل پلاتفورماسىنىڭ 30 جىلدىعىنا وراي: ايەلدەرگە قاتىستى زورلىق-زومبىلىقتى توقتاتۋ ءۇشىن بىرىگەيىك» ۇرانىمەن وتەدى.
– اكتسيا اياسىندا مەملەكەتتىك ورگاندار, حالىقارالىق جانە ۇكىمەتتىك ەمەس ۇيىمدار ەلدىڭ بارلىق وڭىرىندە كوشپەلى كەزدەسۋلەر وتكىزىپ, تۇرعىندارعا تۇرمىستىق زورلىق-زومبىلىقتان قورعانۋ الگوريتمىن تۇسىندىرەدى. ەلىمىزدەگى داعدارىس ورتالىقتارى ارقىلى ايەلدەرگە قۇقىقتىق, پسيحولوگيالىق جانە الەۋمەتتىك كومەك بەرىلەدى. سونداي-اق LED-ەكرانداردا جانە كينوتەاترلاردا ارنايى بەينەروليكتەر ويناپ, «111» بىرىڭعاي مەملەكەتتىك سەنىم تەلەفونى ارقىلى زورلىق-زومبىلىق قۇرباندارىنا شۇعىل كومەك كورسەتىلەدى, – دەيدى جانسۇلۋ مەڭەشقىزى.
تۇرمىستىق زورلىق-زومبىلىق قۇرباندارىن قولداۋ ماقساتىندا ورال قالاسىنداعى مەملەكەتتىك داعدارىس ورتالىعىندا – 10 ورىن, ال اقساي قالاسىنداعى ۇكىمەتتىك ەمەس ۇيىم باسقاراتىن ورتالىقتا 9 ورىن جابدىقتالىپ, قىزمەت كورسەتىپ جاتىر. بيىل وڭىردە 379 ايەل وسى ورتالىقتاردىڭ كومەگىنە جۇگىنگەن ەكەن. ارمان قۇسايىن ۇلىنىڭ ايتۋىنشا, جىل باسىنان بەرى 35 ايەل پوليتسيا جولداماسىمەن ۋاقىتشا باسپانامەن قامتاماسىز ەتىلگەن.
ايەل مەن بالانى قورعاۋ – تەك مەملەكەتتىك ورگانداردىڭ مىندەتى ەمەس. قوعامنىڭ ءار ازاماتى وسى باعىتتاعى باستامالارعا بەلسەنە قاتىسۋعا ءتيىس.
باتىس قازاقستان وبلىسى
