ەجەلدەن قوڭسى ەلدەردىڭ كەيىنگى بۋىنىن جاقسىلىق پەن جارقىن كەلەشەك جولىنا جۇمىلدىرۋدى كوزدەيتىن سلەتتىڭ اشىلۋىنا قازاقستاننىڭ مادەنيەت جانە اقپارات ءمينيسترى ايدا بالاەۆا, رەسەي فەدەراتسياسى پرەزيدەنتى اكىمشىلىگىنىڭ شەتەلدەرمەن وڭىرارالىق جانە مادەني بايلانىستار جونىندەگى باسقارماسى باسشىسىنىڭ ورىنباسارى انتون رىباكوۆ, ەكى ەلدىڭ ۆولونتەرلىك قوزعالىس وكىلدەرى قاتىستى.
ا.بالاەۆا جينالعانداردى الداعى حالىقارالىق ۆولونتەر كۇنىمەن قۇتتىقتاي كەلە, مەملەكەت پەن ۆولونتەرلىك قاۋىمداستىق اراسىنداعى سەرىكتەستىكتىڭ ماڭىزىنا توقتالدى.
«قازاقستان پرەزيدەنتى قاسىم-جومارت توقاەۆ ۆولونتەرلەر قىزمەتىنە ۇلكەن كوڭىل ءبولىپ كەلەدى. اسىرەسە وسى سالاداعى حالىقارالىق ىنتىماقتاستىقتى دامىتۋعا باسا نازار اۋدارىپ وتىر. بۇگىن ءبىز قازاقستان مەن رەسەيدەگى ۆولونتەرلەر قوزعالىسى قۋاتتى شىعارماشىلىق كۇشكە اينالىپ, مەيىرىمدى ازاماتتاردىڭ جۇدىرىقتاي جۇمىلۋىنىڭ جارقىن ۇلگىسىنە, حالىقتار اراسىنداعى بايلانىستاردى نىعايتاتىن, ماڭىزدى الەۋمەتتىك ماسەلەلەردى شەشۋگە ىقپال ەتەتىن قوزعالىسقا اينالدى دەپ سەنىممەن ايتا الامىز», دەدى مينيستر.
سونداي-اق ا.بالاەۆا مەملەكەت باسشىسىنىڭ باستاماسىمەن 2020 جىلدىڭ ەلىمىزدە «ۆولونتەر جىلى» دەپ جاريالانعانىن, بۇل ەرىكتىلەر قوزعالىسىنا قۋاتتى سەرپىن بەرگەنىن ايتىپ, قازاقستانداعى ۆولونتەرلىكتى مەملەكەتتىك قولداۋ شارالارىنا توقتالدى.
مەملەكەتتىك ورگاندار جىل سايىن ۆولونتەرلەر قاۋىمداستىعىمەن بىرلەسىپ 50-دەن اسا جوبانى, باستامالاردى ىسكە اسىرۋ ءۇشىن 240 شاعىن گرانت بەرەدى. بۇگىندە ەلىمىزدە 240 مىڭنان اسا بەلسەندى ۆولونتەر بار, 740-تان اسا ۆولونتەرلىك ۇيىم جۇمىس ىستەپ وتىر, مىڭنان اسا باستاماشىل توپتاردىڭ دا ارەكەتى تابىسسىز ەمەس.
سونداي-اق جيىن بارىسىندا مينيستر 2025 جىلى تابيعاتتى قورعاۋعا باعىتتالعان ءىس-شارالاردى وزەكتى ەتۋ ماقساتىندا بىرلەسكەن ەكولوگيالىق اكتسيالار, كورمەلەر, سەمينارلار مەن كونفەرەنتسيالار وتكىزۋدى ۇسىندى.
ۆولونتەرلەر سلەتىندە ءسوز العان رەسەي فەدەراتسياسى پرەزيدەنتى اكىمشىلىگىنىڭ شەتەلدەرمەن وڭىرارالىق جانە مادەني بايلانىستار باسقارماسى باسشىسىنىڭ ورىنباسارى انتون رىباكوۆ قازاقستان تاراپىنا وسى جيىنعا ۇيىتقى بولعانى ءۇشىن العىسىن ءبىلدىردى.
«بىرلەسكەن جوبالاردى ساپالىق تۇرعىدا جاڭا دەڭگەيگە كوتەرۋدەگى نەگىزگى باستاماشىلاردىڭ ءبىرى – قازاقستان پرەزيدەنتى قاسىم-جومارت توقاەۆ. بۇل ءبىز ءۇشىن وتە ماڭىزدى. قازاقستان ۆولونتەرلەرمەن جۇمىس ىستەۋدە ۇلكەن تاجىريبەگە يە. ءبىز بۇل باعىتتى تولىق قولدايمىز جانە بۇگىنگى كەزدەسۋدىڭ ماڭىزدىلىعى كەلەر جىلى, ءبىز جوسپارلاعانداي, رەسەي مەن قازاقستان ۆولونتەرلەرىنىڭ «تاتۋ كورشىلىك» اتتى تولىققاندى فورۋمى وتەتىنىندە دەپ بىلەمىز. بۇل ءبىزدىڭ ەلدەرىمىز اراسىنداعى بىرلەسكەن جوبالار پورتفەلىن بايىتا تۇسەدى دەپ سەنەمىن. ۆولونتەرلىك يدەيانى ناسيحاتتاۋ مەن ۆولونتەرلىك قوزعالىسقا كوبىرەك ادام تارتۋ قوعامدى بىرىكتىرىپ, ءداستۇرلى مورالدىق جانە رۋحاني قۇندىلىقتاردى نىعايتۋعا ىقپال ەتەدى», دەدى ول.
سلەت اياسىندا ۆولونتەرلەرگە تانىمدىق دارىستەر, سەمينار-ترەنينگتەر ۇيىمداستىرىلدى. سونداي-اق رەسەيلىك قوناقتارعا الماتى قالاسىنداعى كوميۋنيتي ورتالىقتارىنىڭ جۇمىسى تانىستىرىلدى.
الماتى
