قىسقا باعدارلامانى جەرلەسىمىز ەكىنشى ورىنمەن قورىتىندىلاعان ەدى. كەلەسى كۇنى دە شايدوروۆ شابىسىنان جاڭىلعان جوق. ەركىن باعدارلامانى ءساتتى ورىنداپ شىققان ول كورەرمەن قوشەمەتىنە بولەندى. جارىس قورىتىندىسىندا 276,17 ۇپاي جيعان ميحايل كۇمىس مەدالدى موينىنا ءىلدى. ءدۇبىرلى دودا جاپونيانىڭ جۇلدىزى, كوماندالىق الەم چەمپيوناتىندا ءۇشىنشى ورىنعا تۇراقتاعان سيۋن ساتونىڭ جەڭىسىمەن اياقتالدى. ول 278,48 ۇپاي ولجالادى. قولا مەدالدى تەگى قىتايلىق, بىراق فرانتسيادا دۇنيەگە كەلگەن الەم چەمپيوناتىنىڭ قولا جۇلدەگەرى, ەۋروپانىڭ ەكى دۇركىن چەمپيونى ادام سياو حيم فا جەڭىپ الدى. ونىڭ كورسەتكىشى – 252,53 ۇپاي.
كەيىنگى كەزدەرى ميحايل شايدوروۆتىڭ ونەرى كوپشىلىكتىڭ كوڭىلىنەن شىعىپ ءجۇر. 20 جاستاعى الماتى قالاسىنىڭ تۋماسى وسىعان دەيىن جاستار اراسىنداعى الەم بىرىنشىلىگى (2023) مەن «Golden Spin of Zagreb» (2023) ءتۋرنيرىنىڭ كۇمىس جۇلدەگەرى, «قىتاي كۋبوگىنىڭ» (2023) قولا جۇلدەگەرى, «Challenge Cup» (2024) دوداسىنىڭ جەڭىمپازى اتاندى. قازىرگى كەزدە وليمپيادا, ەۋروپا چەمپيونى, مايتالمان مامان الەكسەي ۋرمانوۆتىڭ قول استىندا جاتتىعىپ جۇرگەن شايدوروۆ ISU-دىڭ دۇنيەجۇزىلىك رەيتينگىندە 12-ورىندا نىق تۇر.
