ءسىبىر جاراسىنان ولگەن سيىرعا قاتىسى بولعان 17 تۇرعىن كارانتينگە الىندى. ولاردىڭ ءبىرى 22 قاراشادا تاڭەرتەڭ دەنە قىزۋىنىڭ 37,5-كە كوتەرىلۋىنە بايلانىستى وبلىستىق №2 اۋرۋحاناعا جەتكىزىلدى.
باسىلىم مالىمەتىنشە, وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءالميرا سابىرعاليەۆانىڭ ايتۋىنشا, 20 قاراشادا 17 ادام باقىلاۋعا الىنعان.
- ولاردىڭ تالداۋ ناتيجەلەرى ءالى دايىن ەمەس. قىزۋى كوتەرىلگەن ناۋقاستىڭ جاعدايى قاناعاتتانارلىق. تەكسەرۋ ءۇشىن سىنامالار الىندى, ناتيجەلەرى ەرتەڭ دايىن بولادى. ءسىبىر جاراسى ادامنان ادامعا جۇقپايدى, - دەپ سەندىردى دەنساۋلىق ساقتاۋ باسقارماسىنىڭ وكىلى.
ۆەتەرينارلىق زەرتحانا جينالعان ماتەريالدارعا زەرتتەۋ جۇرگىزگەن. باكتەريولوگيالىق زەرتتەۋلەردىڭ ناتيجەلەرى جاقىن ارادا بەلگىلى بولادى.
ينفەكتسيانىڭ تارالۋىن بولدىرماۋ ماقساتىندا اقتوبەدەن ەپيزووتيكالىق توپ كەلىپ, بازارلاردا دەزينفەكتسيا جۇمىستارىن جۇرگىزە باستاعانى ايتىلدى.
