فوتو: ۇكىمەتتىڭ ءباسپاسوز قىزمەتى
Ansaldo Energia باس ديرەكتورى فابريتسيو فاببريمەن كەلىسسوزدەر بارىسىندا يننوۆاتسيالىق تەحنولوگيالاردى قولدانۋ ارقىلى ەنەرگەتيكالىق ينفراقۇرىلىمنىڭ تيىمدىلىگىن ارتتىرۋ شارالارى تالقىلاندى. بۇل باعىتتا يتاليالىق كومپانيانىڭ گاز جانە بۋ تۋربينالارىن ازىرلەۋ سالاسىنداعى تاجىريبەسى پەرسپەكتيۆالى سانالادى.
بۇرىن قابىلدانعان كەلىسىمگە سايكەس الماتى جەو-3 ءۇشىن ەكى گاز تۋربيناسى وندىرىلەتىن بولادى. وسىعان بايلانىستى تاراپتار ءوزارا ءتيىمدى ىنتىماقتاستىققا جانە قازاقستانداعى گاز تۋربينالىق قوندىرعىلار ءۇشىن كومپونەنتتەردى لوكاليزاتسيالاۋعا مۇددەلى. بۇل ەلىمىزدە گاز تۋربينالى گەنەراتورلىق قوندىرعىلار ءۇشىن ءارتۇرلى كومپونەنتتەر وندىرۋگە مۇمكىندىك بەرەدى جانە ەلەكتر ەنەرگياسىن وندىرۋگە ارنالعان جابدىقتار سالاسىندا جوعارى تەحنولوگيالىق جەتكىزۋ تىزبەگىن جاسايدى.
ال Maire Tecnimont كومپانياسىنىڭ پرەزيدەنتى الەسساندرو بەرنينيمەن كەزدەسۋدە كومىرسۋتەك شيكىزاتىن تەرەڭ وڭدەۋ جانە قوسىلعان قۇنى جوعارى, ساپالى ءارى باسەكەگە قابىلەتتى ءونىم شىعارۋدى ارتتىرۋ سالاسىنداعى ءوزارا ءىس-قيمىل قاراستىرىلدى. قازىرگى ۋاقىتتا قازاقستاندا الەمدىك نارىقتاردا سۇرانىسقا يە پوليمەرلەر مەن باسقا دا ماڭىزدى ونىمدەردى شىعاراتىن زاۋىتتار سالۋ بويىنشا اۋقىمدى جوبالار ىسكە اسىرىلىپ جاتىر.
ءوز كەزەگىندە, Maire Tecnimont پوليەتيلەن, بۋتاديەن, تۇراقتى اۆياتسيا وتىنىن ءوندىرۋ, سونداي-اق گاز ءبولۋ كەشەنىن سالۋ سالاسىنداعى ينۆەستيتسيالىق جوبالاردى ىسكە اسىرۋعا قاتىسۋعا مۇددەلى. ايتا كەتۋ كەرەك, تۇراقتى اۆياتسيا وتىنى جوباسى بويىنشا سەرىكتەستىك قازاقستانداعى اۆياتسيا سالاسىنداعى جاسىل تەحنولوگيالاردى دامىتۋعا ەلەۋلى ۇلەس قوسادى. اتالعان وتىندى ءوندىرۋ كومىرتەگى زياندى قالدىقتارىن ازايتۋعا, ەكولوگيالىق قاۋىپسىز ۇشۋدى ارتتىرۋعا جانە قازاقستاننىڭ جاھاندىق ەكولوگيالىق تەحنولوگيالار نارىعىنداعى پوزيتسياسىن نىعايتۋعا مۇمكىندىك بەرەدى.
كەزدەسۋلەردىڭ قورىتىندىسى بويىنشا پرەمەر-مينيستر ولجاس بەكتەنوۆ قايتا وڭدەۋگە باسا نازار اۋدارا وتىرىپ, ەكونوميكا قۇرىلىمىن ارتاراپتاندىرۋعا جانە وزگەرتۋگە باعىتتالعان اۋقىمدى ينفراقۇرىلىمدىق باستامالاردىڭ ماڭىزىن اتاپ ءوتتى. سونداي-اق بىرلەسكەن جوبالاردى ىسكە اسىرۋدىڭ بارلىق كەزەڭىندە ۇكىمەتتىڭ شەتەلدىك ينۆەستورلارعا جاردەم كورسەتۋگە ءازىر ەكەنىن راستادى.
