جاڭا البوم تاريحي زەرتتەۋلەردى زاماناۋي تەحنولوگيالارمەن ۇشتاستىرا وتىرىپ, قازاق مەملەكەتتىلىگىنىڭ باستاۋى بولعان جوشى ۇلىسىنىڭ ماڭىزدىلىعىن جان-جاقتى اشىپ كورسەتەدى. ەل پرەزيدەنتى قاسىم-جومارت توقاەۆتىڭ سوزىمەن ايتساق, «التىن وردا – ءبىزدىڭ مەملەكەتتىلىگىمىزدىڭ باستاۋى. جوشى حاننىڭ تۇلعاسىن تانۋ ارقىلى ءبىز ۇلتتىق تاريحىمىزدى جاڭا دەڭگەيدە باعالاي الامىز».
ءيا, جوشى حاننىڭ تۇلعاسى – ۇلى دالا تاريحىنىڭ التىن دىڭگەگى. ونىڭ باسقارۋىنداعى ۇلىق ۇلىس ەل اۋماعىنداعى مەملەكەتتىلىكتىڭ ىرگەتاسى ەكەنى ءسوزسىز. كىتاپ اۆتورى – جۋرناليست, دەرەكتى فيلمدەر اۆتورى مايا بەكباەۆا بۇل ەڭبەكتە تاريحي وقيعالاردى تەرەڭ تالداپ, جوشى حاننىڭ قازاق حالقىنىڭ قالىپتاسۋىنا قوسقان ۇلەسىن ايرىقشا سيپاتتايدى.
كىتاپتا تاريحي دەرەكتەر, فولكلورلىق مالىمەتتەر مەن زاماناۋي زەرتتەۋلەر تەرەڭنەن قابىسىپ, جۇيەلى بەرىلگەن. اۆتور بۇل ەڭبەگىندە جوشى حاننىڭ تاريحي ءرولى مەن ونىڭ قايشىلىققا تولى ءومىرىن جان-جاقتى باياندايدى. تاريحي قۇندىلىقتاردى جاڭا ۇرپاققا وزگەشە فورمامەن, تىڭ تاسىلمەن جەتكىزۋدى ماقسات ەتكەن.
جوبانىڭ نەگىزگى يدەياسىنىڭ اۆتورى – «Arman-PV» باسپاسىنىڭ باس ديرەكتورى ديدارا الينا كىتاپتىڭ ۇلتتىق تاريحتى تانۋ مەن ونى ۇرپاق جادىندا جاڭعىرتۋداعى ماڭىزىن ەرەكشە اتاپ ءوتتى.
«بۇل ەڭبەك تاريحي مۇراعا قۇرمەت كورسەتىپ قانا قويماي, ۇلتتىق سانا-سەزىمدى نىعايتاتىن قۋاتتى قۇرال ماقساتىندا جاسالدى. ۇلت تاريحىنداعى ايرىقشا تۇلعالار مەن وقيعالاردى بۇگىنگى ۇرپاق ءبىلۋى كەرەك», دەيدى ول.
ءيا, «جوشى حان. ۇلىق ۇلىستىڭ بيلەۋشىسى» البومى – ءداستۇرلى تاريحي ەڭبەكتەردەن وزگەشە. جوبا بارىسىندا جاساندى ينتەللەكت تەحنولوگياسى كىتاپتىڭ يلليۋستراتسيالارىن دايىنداۋ ءۇشىن قولدانىلعان. بۇل ءتاسىل تاريحي تۇلعالاردىڭ بەينەلەرىن زاماناۋي فورماتتا كورسەتۋگە جانە البومدى كوركەم ونەر تۋىندىسىنا اينالدىرۋعا مۇمكىندىك بەردى.
«Arman-PV» باسپاسى جوبانى جۇزەگە اسىرۋ بارىسىندا تاريحي دەرەكتەردى وقىرمانعا قىزىقتى ءارى كورنەكى تۇردە ۇسىنۋدى باستى ماقسات ەتكەن. جاڭا ەڭبەك جاستارعا تاريحتى ۆيزۋالدى قۇرالدار ارقىلى ءتۇسىندىرۋ, مۇعالىمدەرگە وقىتۋ ۇدەرىسىندە قوسىمشا رەسۋرس ۇسىنۋ, تاريحشىلارعا جاڭا دەرەككوزدەر مەن زاماناۋي زەرتتەۋ ادىستەرىن كورسەتۋ, حالىقارالىق اۋديتورياعا ەلىمىزدىڭ باي تاريحي مۇراسىن تانىتۋ باعىتتارىن قامتىعان.
ەندى ءبىر جاعىنان, اتالعان البوم تاريحي مۇرانى جاڭعىرتۋعا باعىتتالعان رۋحاني باعدار سىندى. جوشى حان تۇلعاسىنىڭ قازاق حالقىنىڭ تاريحىنداعى ورنى مەن ونىڭ ۇلىق ۇلىستىڭ قۇرىلۋىنداعى ءرولى تەك ۇلتتىق ماقتانىش قانا ەمەس, ۇرپاق ءۇشىن ماڭىزدى تانىم كوزى رەتىندە ۇسىنىلعان. بۇگىندە تاريحي مۇرانى تانۋ – بولاشاققا ۇمتىلعان ۇلت ءۇشىن باستى قادامداردىڭ ءبىرى ەكەنى ءسوزسىز. جاڭا تۋىندى تاريحي قۇندىلىقتاردى ساقتاپ قانا قويماي, ونى جاڭا ۇرپاققا ناسيحاتتاۋ ارقىلى ۇلتتىق رۋحتى نىعايتاتىن قۋاتتى قۇرالعا اينالدى.
تۇساۋكەسەر بارىسىندا بەلگىلى تاريحشىلار, جازۋشىلار, زەرتتەۋشىلەر, قوعام قايراتكەرلەرى جوشى حان تۇلعاسىنىڭ تاريحي مۇراسىن تانۋدىڭ وزەكتىلىگى تۋرالى وي ءبولىستى.
ايتا كەتەيىك, كىتاپ قازاق, ورىس جانە اعىلشىن تىلدەرىندە باسىلىپ شىقتى. بۇنىڭ ءوزى تاريحي ەڭبەكتىڭ تەك وتاندىق وقىرماندارعا عانا ەمەس, شەتەلدىك اۋديتورياعا دا باعىتتالعانىن كورسەتەدى. كىتاپ-البوم ۇلت مادەنيەتى مەن تاريحىن الەمدىك دەڭگەيدە ناسيحاتتاپ قانا قويماي, تاريحي تانىمنىڭ جاڭا ساتىسىنا كوتەرىلۋدىڭ ايقىن مىسالى بولدى.
تاريح پەن زاماناۋي تەحنولوگيانىڭ توعىسىندا دۇنيەگە كەلگەن ەرەكشە جوبا ەل تاريحىن زەرتتەۋشىلەر ءۇشىن تاپتىرماس دەرەككوز بولۋمەن قاتار, زاماناۋي وقىرماندى تاريحقا جاڭا قىرىنان قاراۋعا وي سالادى. وتكەننىڭ تاعىلىمى ارقىلى بولاشاققا جول سىلتەيتىن قۇندى ەڭبەك الەمدىك ارەنادا دا باعالاناتىنىنا سەنەمىز.
