فوتو: ۆەدومستۆو
سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنىڭ مالىمەتىنشە, اتالعان ۆەدومستۆو, ءماجىلىس دەپۋتاتتارى, ساراپشىلار قۇجاتتى پىسىقتاۋدى جالعاستىرىپ جاتىر. كودەكستىڭ جوباسىنا سايكەس, ەلدى مەكەندەردى جانە نىسانداردى قورعاۋ ءۇشىن جەرگىلىكتى اتقارۋشى ورگاندار بوگەتتەر, ءموبيلدى قورشاۋلار, اينالما ارنالار, ۋاقىتشا سۋ قويمالارىن سالۋ جۇمىستارىن جۇرگىزۋى كەرەك جانە تاسقىن مەن ەرىگەن سۋدان قورعانۋ تۇرعىسىندا ورمان ەكپەلەرىن وتىرعىزۋدى جۇزەگە اسىرۋى ءتيىس.
ءوز كەزەگىندە, باسسەيندىك جوسپارلار ەلىمىزدەگى 8 سۋ شارۋاشىلىعى باسسەينىنىڭ ارقايسىسىنا قاجەتتى ءىس-شارالاردى انىقتايدى. سونداي-اق, اتالعان كودەكس جوباسى جاۋىن-شاشىن مەن توپىراق ىلعالدىلىعىنىڭ دەڭگەيىن باقىلاۋدى, قۇرعاقشىلىق كەزەڭى ءۇشىن تاسقىن سۋىن جيناپ ساقتاۋدى, سۋ ۇنەمدەيتىن تەحنولوگيالاردى ەنگىزۋدى جانە قۇرعاقشىلىققا ءتوزىمدى داقىلداردى پايدالانۋ ارقىلى اۋىل شارۋاشىلىعىن بەيىمدەۋدى كوزدەيدى.
«قۇجات – مەملەكەتتىك ورگانداردىڭ سۋ تاسقىنى مەن قۇرعاقشىلىققا قارسى ءىس-قيمىل ماسەلەسىندەگى وكىلەتتىكتەرىن ناقتى ايقىندايدى. ەنگىزىلگەن تۇزەتۋلەر – سۋ سەكتورىنىڭ كليماتتىڭ وزگەرۋىنە بەيىمدەلۋىنە, سۋدىڭ زياندى اسەرىنىڭ قاۋپىن ازايتۋعا جانە گيدروتەحنيكالىق قۇرىلىستاردىڭ قاۋىپسىزدىگىن ارتتىرۋعا جاعداي جاسايدى», دەدى ۆەدومستۆونىڭ سۋ ساياساتى دەپارتامەنتىنىڭ ديرەكتورى سەرىكجان بەكەتاەۆ.
