اتالعان اگروكاسىپورىن سان سالالى باعىتتا ىرىسىن ەسەلەپ وتىر. نەگىزىنەن مال شارۋاشىلىعىمەن اينالىسادى. قازىرگى ۋاقىتتا ونىڭ يەلىگىندە ەكى ءجۇز ءىرى قارا, جۇزدەن اسىپ جىعىلاتىن جىلقى, ءجۇز ەلۋ قويى بار.
ءتورت ت ۇلىكتەن نەسىبە تاپقان اعايىنعا اۋىل شارۋاشىلىعى تەحنيكالارىنىڭ ساقاداي ساي بولۋى قاشاندا ماڭىزدى. بۇل شارۋاعا دا ۆلاديمير مىعىم. شارۋاشىلىققا قاجەت تەحنيكانىڭ ءتۇر-ءتۇرى بار. ولاردىڭ بۇزىلماي, جىلدىڭ كەز كەلگەن مەرزىمىندە ساعاتتىڭ مەحانيزمىندەي سارتىلداپ جۇمىس ىستەپ تۇرۋىنا شارۋاشىلىق باسشىسى باسا ءمان بەرەدى.
فەرمەر شارۋاشىلىعىنىڭ مۇمكىندىگىن تەك مالدىڭ وسىمىمەن عانا ولشەمەيدى. ەگىستىك القابىنداعى شارۋالاردى دا يگەرىپ, يگىلىگىن ارتتىرۋدى كوزدەيدى. ءسويتىپ, وزىنە تيەسىلى 500 گەكتاردىڭ جارتىسىنا ەگىن سالىپ, قالعان 250 گەكتارىنا ارپا, بيداي, س ۇلى ەگىپ, استىق قامباسىن تولتىرىپ الدى.
«بيىلعى جەرگە سالعان ءونىمىمىز بىتىك شىقتى. قامبامىزدى قامپايتىپ الدىق. كوپ شارۋا مولشىلىققا كەنەلدى. توككەن تەرىمىزدى, ەسەلى ەڭبەگىمىزدى جەر انا ەسكەرسە دەپ تىلەيمىز. اگروسالانىڭ قيىندىعى كوپ. ۇنەمى ىزدەنىپ, جەتىلىپ وتىرماساڭ, شارۋاڭ ىركىلىپ قالادى. سوندىقتان ءوزىڭ اگرونوم, ۆەتەرينار, مالشى, مەحانيزاتور بولماساڭ, مال بىتپەيدى», دەيدى فەرمەر.
سۋرەتتى تۇسىرگەن – ەرلان ومار, «EQ»
2017 جىلى ۇكىمەتتەن از پايىزبەن نەسيە العان ول قوراسىن اسىل تۇقىمدى سيىرعا تولتىرادى. نەسيە قارجىسىنا رەسەيدەن ەتتى ءارى ءسۇتتى «سيممەنتال» تۇقىمىنان 50 سيىر اكەلەدى. سودان بەرى ءىرى قارانىڭ كەسەكتى ەتى, مول ءسۇتى كول-كوسىر تابىسقا كەنەلتىپ, بەرەكەسىن ءارى قاراي ارتتىرعان كورىنەدى. شارۋاشىلىق جىل سايىن 8000 توننا ەت, 9 توننا ءسۇت ءونىمىن ءوندىرىپ, ساۋدالاپ وتىر.
اتىرابىنا «سارى قازاق» دەپ اتى تانىلعان ونىڭ بويىندا دارقاندىق بار, وزىنەن ارتىلعانىمەن وزگەگە قارايلاساتىن قايىرىمدى جاندار قاتارىنان. كاسىپكەر ءوزى تۋىپ-وسكەن كوكتىڭكولى اۋلىنا قاراستى ءاليحان ەلدى مەكەنىنە بارىنشا جاعداي جاساپ وتىر.
– شاراپاتتى ءىس ادامگەرشىلىگى جوعارى, رۋحاني الەمى باي, جان دۇنيەسى تازا ادامداردىڭ عانا قولىنان كەلەدى. ۆلاديمير – وسىنداي ساناتتاعى ازاماتتىڭ ءبىرى. بارىن اۋىلىمەن بولىسەدى. جىلدا ءاليحان اۋلىنىڭ جالعىزباستى قارت ادامدارىنا كومىرىن, قىسقى جەمشوبىن ءتۇسىرىپ بەرەدى. مەكتەپ الدىنداعى 250 شارشى مەتر جەرگە اسفالت توسەدى. مەكتەپتىڭ اكت زالىنا پلاستيكالىق تەرەزە ورناتقىزدى. جىلدا كوكتىڭكولى ستانساسىنىڭ بايگەدەن وتەتىن ماۋسىماشاردىڭ باس جۇلدەسىنە ءىرى قاراسىن تىگەدى. مۇنىمەن قوسا وكرۋگىمىزگە قاراستى جىلاندى اۋلىنىڭ ۇزىندىعى 9 شاقىرىم كىرەبەرىس جولىن جوندەۋگە دە دەمەۋشىلىك جاسادى. قىستا اۋىلدىڭ جولدارىن قاردان تازارتۋعا قارجىسىن دا, تەحنيكاسىن دا ايامايدى, – دەيدى كوكتىڭكولى اۋلىنىڭ اكىمى قۋانىش قورشابەكوۆ.
اتپال ازامات ءۆلاديميردىڭ مۇقتاج جانداردىڭ جاعدايىن جۇرەگىمەن قابىلداپ, قولىنان كەلگەنشە جاردەمدەسۋگە دايىن تۇراتىن اتىمتاي-جومارتتىعىن اۋىلداستارى دا ريزاشىلىقپەن ايتىپ جۇرەدى. شىنتۋايتىندا, باتىل فەرمەر كاسىپكەرلىكتىڭ الەۋمەتتىك جاۋاپكەرشىلىگىن جان-تانىمەن سەزىنەدى. تۋعان اۋىلىن تۇلەتۋگە ۇلەس قوسىپ جۇرگەنى دە سونداي ۇستانىمىنىڭ ارقاسى بولسا كەرەك.
ءىستىڭ قيۋىن تاۋىپ, شارۋاشىلىقتىڭ تاسىن ورگە دومالاتىپ جۇرگەن كاسىپكەردىڭ وتباسىن دا ۇلگى قىلۋعا بولادى. بوساعاسىنا بەرەكە, شاڭىراعىنا شاتتىق ۇيىرىلگەن وتاۋدىڭ ءبىرى. جارى ناتاليانىڭ قازانى وتتان تۇسپەيدى. بيە ساۋىپ, قىمىز اشىتادى. سيىردىڭ سۇتىنەن قايماق, ماي, سىر, ىرىمشىك, قۇرت دايىندايدى. اق ءدامنىڭ ءبارى داستارقاندا جايناپ تۇرۋى كەرەك دەگەن ءۇردىس بار ەكەن.
– قۇت-بەرەكەنىڭ بارلىعى داستارقانىڭنىڭ مولشىلىعىمەن كەلەدى. وتاعاسى جىلقى ەتىنسىز وتىرا المايدى. دالادان مال تۇگەندەپ كەلگەن كۇنى مىندەتتى تۇردە قازانعا ەت سالامىن. قوناققا ەسىگىمىز اشىق. جىلدا قۇران وقىتىپ, شەكەمىزدى بەرەمىز. ءبىزدى ەندى تانىعاندار اڭ-تاڭ بولىپ جاتادى. كادىمگى قانىمىز دا, جانىمىز دا قازاق بولىپ كەتكەن, – دەيدى فەرمەردىڭ جارى.
وتباسىنداعى ۇلى پاۆەل مەن قىزى ليۋبوۆ اكەسىنىڭ جانىندا ءجۇرىپ, ەڭبەككە ەرتە ارالاسقان. بالا كەزىنەن شارۋا ىستەپ, شىمىر بولعان ولار سپورتقا جاقىن. پاۆەل – ەركىن كۇرەستەن سپورت شەبەرلىگىنە ۇمىتكەر. قىزى ليۋبوۆ اۋىر اتلەتيكادان ەل نامىسىن بايراقتى باسەكەلەردە قورعاپ ءجۇر. ەل چەمپيوناتىنىڭ بىرنەشە دۇركىن جەڭىمپازى. وڭتۇستىك كورەيادا وتكەن ازيا چەمپيوناتىنىڭ كۇمىس مەدال يەگەرى.
ۆلاديمير كوۆالچۋكتىڭ اۋىل شارۋاشىلىعى سالاسىنداعى ماڭداي تەرى اتاۋسىز, ەسكەرۋسىز قالىپ جاتقان جوق. مەملەكەتتىك باعدارلامالار مەن پرەزيدەنتتىڭ اۋىل شارۋاشىلىعىن دامىتۋ باعىتىنداعى تاپسىرمالارىن جۇزەگە اسىرۋ جولىنداعى ەڭبەگى بىرنەشە مارتە ءتۇرلى ماراپاتپەن اتالىپ وتكەن. ال ىسكەر ازامات ءوزى جاقسىلىق جاساعان جانداردان العىس الۋدى ماراپات بىتكەننىڭ تورەسىنە بالايدى.
مىنە, شاعىن عانا اۋىلدا تۇرىپ, شارۋاشىلىعىن دوڭگەلەتىپ قانا قويماي, اينالاسىنا شاراپاتىن تيگىزىپ جۇرگەن, «سارى قازاق» اتانعان ازاماتتىڭ الەمى وسىنداي ىزگىلىككە تولى.
قاراعاندى وبلىسى,
شەت اۋدانى,
كوكتىڭكولى اۋىلى
