شىندىعىن ايتقاندا, مەكتەپتەگى تاماقتاندىرۋدى ۇيىمداستىرىلۋىنا اتقارۋشى ورگاندار تاراپىنان ءالى دە بولسا باقىلاۋ جەتكىلىكسىز بولىپ وتىر. سونداي-اق مينيستر مۇنى زاڭناما تالاپتارىنىڭ بۇزىلۋ فاكتىلەرىنەن دە انىق اڭعارۋعا بولاتىنىن ايتتى. مونيتورينگ توبى زاڭ تالابىنىڭ بۇزىلۋى بويىنشا 771 فاكتىنى انىقتاعان. وسىنىڭ ءبارى – رەسپۋبليكالىق مونيتورينگ قورىتىندىسىندا بەلگىلى بولدى.
بۇدان بولەك, مينيسترلىك مەكتەپتە تاماقتاندىرۋدى ۇيىمداستىرۋ بويىنشا كەشەندى باعالاۋ جۇرگىزگەن. وعان اسحانالاردىڭ ماتەريالدىق-تەحنيكالىق جابدىقتالۋى, ءبىر وقۋشىعا شاققانداعى وڭىردەگى تاماقتانۋ قۇنى, اتا-انالار اراسىندا جۇرگىزىلگەن ساۋالناما ەسكەرىلدى. سونىڭ ناتيجەسىندە, جامبىل, ماڭعىستاۋ, الماتى, اتىراۋ وبلىسى مەن شىمكەنت قالاسى اكىمدىكتەرى تاراپىنان مەكتەپتەردە ساپالى تاماقتانۋدى ۇيىمداستىرۋعا ءتيىستى دەڭگەيدە كوڭىل بولىنبەگەنى راستالدى.
«قازىرگى تاڭدا مينيسترلىك مەكتەپتە تاماقتاندىرۋ قىزمەتىن ساتىپ الۋ كەزىندە ءونىم بەرۋشىلەردى ىرىكتەۋ تالاپتارىن بۇزعانى ءۇشىن لاۋازىمدى تۇلعالارعا اكىمشىلىك جاۋاپكەرشىلىك ەنگىزۋ ماسەلەسىن پىسىقتاپ جاتىر», دەيدى ع.بەيسەمباەۆ.
ەسكە سالايىق, بۇعان دەيىن مينيسترلىك تالاپتاردى كۇشەيتىپ, ءبىلىم بەرۋ ۇيىمدارىندا تاماقتاندىرۋدى ۇيىمداستىرۋعا قاتىستى 7 نورماتيۆتىك-قۇقىقتىق اكتىنى قايتا قاراعان بولاتىن.
