دەكاندار الدىندا بايانداما جاساعان عىلىم جانە جوعارى ءبىلىم ءمينيسترى ساياسات نۇربەك ءوز سوزىندە 34 شەتەلدىك ۋنيۆەرسيتەت وكىلىن قامتىعان حالىقارالىق كەڭەس قۇرىلعانىن جەتكىزدى.
ء«بىز قازىر تۇبەگەيلى قايتا قۇرۋ كەزەڭىنە اياق باستىق. سوندىقتان مينيسترلىك ءوز الدىنا ءۇش مىندەت قويىپ وتىر: ءبىرىنشىسى – وسى سەرىكتەستىكتەر ارقىلى قازاقستاندى اكادەميالىق جانە عىلىمي ورتالىق رەتىندە قۇرۋ; ەكىنشىسى – مەملەكەتتىك ۋنيۆەرسيتەتتەردى حالىقارالىق زەرتتەۋ ۋنيۆەرسيتەتتەرىنە اينالدىرۋ, ءۇشىنشى – تەحنولوگيالار ترانسفەرتى ءۇشىن وسى پلاتفورمالاردى پايدالانۋ», دەدى ول.
باعدارلاما شەڭبەرىندە NU ساراپشىلارى بىلىمدەگى جاڭا وزگەرىستەرگە قالاي بەيىمدەلۋ, تاۋەكەلدەردى باسقارۋ جانە وسى سالاداعى بيزنەس-ۇدەرىستەرى تۋرالى وي-پىكىرلەرىن ورتاعا سالدى. سونداي-اق NU پرەزيدەنتى دوكتور ۆاكار احماد پەن جوعارى ءبىلىم مەكتەبىنىڭ (GSE) دەكانى ايدا ساعىنتاەۆا باسقارۋ تاجىريبەلەرىمەن ءبولىستى.
«ۋنيۆەرسيتەتتەر كۇردەلى ماسەلەلەردى شەشىپ, سىني تۇرعىدان ويلايتىن ادامداردان تۇرادى. ەگەر ءسىز ولاردى باسقارۋعا تىرىسساڭىز, ءسىز ساتسىزدىككە ۇشىرايسىز. ويتكەنى بۇل اقىلدى ادامدار قاتاڭ نۇسقاۋلاردى ورىندامايدى. مەنىڭ جۇمىسىم – تالانتتاردى تاۋىپ, ولارعا جاعداي جاساۋ. مىقتى كوشباسشى ازاماتتارعا ءوز ماقساتىنا جەتۋگە مۇمكىندىك بەرەدى. ال مەنىڭ ءرولىم – ولارعا بۇل ءۇشىن مۇمكىندىك تۋعىزۋ», دەيدى NU پرەزيدەنتى دوكتور ۆاكار احماد.
وقۋ بارىسىندا NU ۆيتسە-پرەزيدەنتى اسەل ۋۆاليەۆا مەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى مولديار ەرگەبەكوۆ سەرىكتەستىك قۇرۋ جانە رەسۋرستاردى جۇمىلدىرۋداعى كوممۋنيكاتسيالىق ستراتەگيانىڭ ماڭىزىنا ارنالعان سەسسيا وتكىزدى. وعان قوناق رەتىندە شاقىرىلعان شەتەلدىك ءبىلىم بەرۋ ساراپشىسى ۆەنەرا بايجىگىت قاتىسۋشىلارعا الەۋمەتتىك جەلىلەردەگى جەكە برەندتى قالاي قۇرۋعا بولاتىنى تۋرالى شەبەرلىك ساباعىن ۇيىمداستىردى. ال تۇركياداعى كودجاەلي دەنساۋلىق جانە تەحنولوگيا ۋنيۆەرسيتەتىنىڭ رەكتورى مۋزاففەر ەلماس دەرەكتەرگە نەگىزدەلگەن ستراتەگيالىق جوسپارلاۋ ءۇشىن مونيتورينگ جانە باعالاۋ جۇيەلەرى تۋرالى تىڭ اقپارات بەردى.
بۇدان بولەك, باعدارلامادا بەلگىلەنگەن «دەكاندار كۇنىندە» قاتىسۋشىلار اتالعان ۋنيۆەرسيتەتتەگى جوعارى ءبىلىم بەرۋ, مەديتسينا, ينجەنەريا جانە تسيفرلىق عىلىمدار سياقتى ءتۇرلى عىلىمي مەكتەپتىڭ جۇمىسىمەن جاقىن تانىستى.
ايتا كەتەيىك, باعدارلاما ىسكە قوسىلعان 25 قىركۇيەكتەن بەرى بەس مودۋل وتكەن. ونىڭ 2-ءۋى نازارباەۆ ۋنيۆەرسيتەتىندە بولسا, 3-ءۋى تۇركىستانداعى قوجا احمەت ياساۋي ۋنيۆەرسيتەتىندە وتكىزىلگەن. ال 18-22 قاراشا ارالىعىندا شانحاي پەداگوگيكالىق ۋنيۆەرسيتەتىندە (SHNU) حالىقارالىق بەس كۇندىك مودۋل وتەدى. مۇندا قاتىسۋشىلار جوعارى ءبىلىمدى باسقارۋدىڭ حالىقارالىق تاجىريبەسى مەن زەرتتەۋلەرىنە بايلانىستى تاجىريبە الماسادى.
