يبراھيم ە.بوكەتوۆ اتىنداعى قاراعاندى ۋنيۆەرسيتەتىنىڭ فيزيكا-تەحنيكالىق فاكۋلتەتىنىڭ 2-كۋرسىندا وقيدى. ۋنيۆەرسيتەتتە جۇرگەن ول ونەرگە دە جاقىن. دومبىرا وينايدى. كۇي شەرتىپ, تەبىرەنىپ ولەڭ وقيدى.
مۇنىمەن قوسا, ءيبراھيمنىڭ عىلىم سالاسىنداعى جەتىستىكتەرى دە جەتەرلىك. ول قازىر جىلۋ ەنەرگەتيكاسى ماماندىعى بويىنشا ءبىلىمىن تەرەڭدەتىپ جاتىر. ازىرلەپ جۇرگەن جوبالارى دا وسى تاقىرىپ توڭىرەگىندە. ونىڭ جىلۋ ينفراقۇرىلىمىن جەتىلدىرۋ ماقساتىندا جازعان جوباسى فاكۋلتەت دەكانىنىڭ نازارىن اۋدارىپ, ماراپاتىن العان.
– ۋنيۆەرسيتەتتەگى تابىستارىم جەڭىسكە جەتۋىمە كومەكتەستى. سپورتپەن شۇعىلدانعانىم, ونەرگە دە تالاسىمنىڭ بولعانى ءوز اسەرىن بەردى. عىلىم جولىندا كوپ ەڭبەك ءسىڭىرىپ, ەلىمىز ءۇشىن ماڭىزدى جاڭالىقتار مەن تىڭ جوبالاردى ازىرلەگىم كەلەدى. اسىرەسە ءوزىم ءبىلىم الىپ جاتقان جىلۋ ەنەرگەتيكاسى سالاسىندا كوپ وزگەرىس كەرەك. سونىڭ جولىندا العاشقى قادامىمدى باستادىم. بۇل ماراپات – ماعان بەرىلگەن جاۋاپكەرشىلىك. ۇزدىك ستۋدەنت اتانۋ – ەرتەڭگى ۇزدىك مامان دەگەن ءسوز دەپ تە تۇسىنەمىن. سوندىقتان بارىمدى سالامىن, – دەيدى ۇزدىك ستۋدەنت.
«قازاقستاننىڭ 100 ۇزدىك ستۋدەنتى» رەسپۋبليكالىق بايقاۋىنا وقۋ ۇلگەرىمىمەن عانا ەمەس, سپورت, ونەر جانە قوعامدىق جۇمىستاردا جوعارى جەتىستىكتەرگە جەتكەن ستۋدەنت جاستار قاتىستى. بۇل بايقاۋدىڭ باستى باعىتى ول – جاستار اراسىندا ۇلتتىق قۇندىلىقتار مەن جەتىستىكتەردى ناسيحاتتاۋ. سونداي-اق ەلىمىزدەگى ستۋدەنتتەردىڭ ءبىلىم, تاربيە جانە تۇلعالىق دامۋىنىڭ جوعارى ساپاسىن ساقتاۋعا مۇمكىندىك بەرەدى دەيدى ۇيىمداستىرۋشىلار.
وسىلايشا ولجالى ورالعان يبراھيم باۋىرجان ۇلىنا ۇزدىك ستۋدەنت اتاعىن راستايتىن كۋالىك, ارنايى ستاتۋەتكا, ديپلوم مەن توسبەلگى تابىستالدى.
ۇزدىك ستۋدەنتتىڭ ۇلكەن ءۇمىتى بار. ول «وڭىردەگى جاسىل ەنەرگەتيكانىڭ دامۋىنا ءوز ىقپالىمدى تيگىزسەم, بۇل ماراپاتقا لايىق بولعانىم», دەيدى.
قاراعاندى وبلىسى
