چەمپيون قىزدى اكەسى جاتتىقتىرادى. بۇل وتباسىندا حاديادان بولەك تاعى بەس بالا دجيۋ-دجيتسۋمەن شۇعىلدانادى. 42 جاستاعى سامات قۇناەۆتىڭ دجيۋ-دجيتسۋمەن اينالىسا باستاعانىنا بىرنەشە جىل بولدى. كوپتەگەن الەم چەمپيوناتتارىنا قاتىسىپ ۇلگەرگەن ول سپورتقا كەلگەلى دەنساۋلىعى دۇرىستالعانىن ايتادى. وتاعاسى بۇگىندە گرەپپلينگتەن قازاقستاننىڭ سپورت شەبەرى. اكەسىنىڭ جەتىستىگى بالالارىن شابىتتاندىرىپ, بۇگىندە جەتەۋىنىڭ التاۋى ونىڭ جولىنا ءتۇستى.
– كەنجە بالام ءۇش جارىمدا, وعان سپورتپەن شۇعىلدانۋعا ءالى ەرتە. ال حاديانىڭ سپورتپەن اينالىسىپ جۇرگەنىنە ەكى جىلداي بولدى, بۇعان قوسا ەركىن كۇرەستەن دە جاتتىعادى. الەم چەمپيونى اتانۋعا كۇرەستىڭ دە پايداسى ءتيدى. ءوزىم ابۋ-دابيدە وتەتىن حالىقارالىق تۋرنيرگە 2021 جىلدان باستاپ قاتىسىپ, ءۇش جىل قاتارىنان جۇلدەگەر بولسام, بيىل ءبىرىنشى ورىندى يەلەندىم, – دەيدى حاديانىڭ اكەسى.
سامات نۇرتاي ۇلى بالالاردى دجيۋ-دجيتسۋگە باۋليدى. ءوز بالالارىنان بولەك, ەكىباستۇزدا 100-دەي بالا ونىڭ ءتالىمىن الىپ ءجۇر. ابۋ-دابيدەگى تۋرنيردە حاديامەن قوسا, باپكەردىڭ جاتتىعۋلارىنا قاتىسىپ جۇرگەن شاكىرتتەرى – 8 جاسار سيرين الەم چەمپيونى اتانسا, 13 جاستاعى سالسابيل ءۇشىنشى ورىننان كورىندى.
جىل سايىن وتەتىن ءداستۇرلى تۋرنيرگە بالالاردى اپارۋعا س.قۇناەۆ 2022 جىلدان بەرى دەمەۋشى ىزدەپ كەلەدى. ەكىباستۇزداعى ءىرى كاسىپورىندارعا حات جازىپ, كومەك سۇراعانىمەن بارلىعى قولداۋ كورسەتۋدەن باس تارتقان. اقىرىندا باپكەر ءوزىنىڭ جەكە اۆتوكولىگىن ساتۋعا ءماجبۇر بولعان. اقشانىڭ كوپ بولىگى ۇشاقپەن ۇشۋعا, جاتار ورىنعا كەتىپتى.
پاۆلودار وبلىسى,
ەكىباستۇز قالاسى
