ءال-فارابي اتىنداعى قازۇۋ ورتا ازيادا باسپا سالاسىنا ماماندار دايارلاپ وتىرعان بىردەن-ءبىر وقۋ ورنى. سەميناردىڭ اشىلۋىندا قازۇۋ رەكتورى جانسەيىت تۇيمەباەۆ سەميناردى وتكىزۋگە ارنايى كەلگەن فرانكفۋرت كىتاپ كورمەسى وكىلدەرىنە قۇرمەت ءبىلدىرىپ, الداعى ۋاقىتتا Frankfurter Buchmesse وكىلدىگىن الماتىدا اشۋ ماسەلەسىنە توقتالدى.
الەمگە ايگىلى فرانكفۋرت كىتاپ جارمەڭكەسىنىڭ ورتالىق ازياداعى العاشقى سەمينارىنىڭ الماتى قالاسىندا, ۇلتتىق ۋنيۆەرسيتەتتە ءوتۋى جاڭا مۇمكىندىكتەرگە جول اشادى. الەمدە بولىپ جاتقان, باسپا ءىسى سالاسىنداعى جاقسى تەندەنتسيا مەن سوڭعى جاڭالىقتاردى فرانكفۋرت كىتاپ جارمەڭكەسىنىڭ ساراپشىلارىمەن بىرگە تالقىلاۋ, پىكىر الماسۋ وسى سالادا جۇرگەن مامانداردىڭ بىلىكتىلىگىن ارتتىرىپ, كاسىبيلىگىن شىڭداي تۇسەدى, – دەدى رەكتور.
ءىس-شارا بارىسىندا ءسوز العان پرەزيدەنت كەڭەسشىسى مالىك وتارباەۆ مەملەكەت باسشىسىنىڭ شەتەل دەلەگاتسياسىنا زور ىقىلاسىن جەتكىزدى.
«بۇگىنگى جيىن بارلىق كىتاپسۇيەر قاۋىمنىڭ ايتۋلى مەرەكەسى. فرانكفۋرت كىتاپ جارمەڭكەسىنىڭ بەس عاسىر ۋاقىتتان بەرى ۇزدىكسىز ءوتىپ كەلەتىنىن جاقسى بىلەمىز. باسپا ماشيناسىن ويلاپ تاۋىپ, ادامزات دامۋىنا ولشەۋسىز ۇلەس قوسقان يوگانن گۋتەنبەرگتىڭ وتانىنداعى وسىنداي ۇيىمنىڭ كىتاپ دامۋىنا جۇيەلى ۇلەس قوسىپ وتىرۋى ۇلكەن قۇرمەتكە لايىق, وزىق ءداستۇر. فرانكفۋرت ەۋروپانىڭ كىتاپ استاناسى رەتىندە الەمدىك كىتاپ ساتاتىن ورتالىعىنا اينالىپ, باسپالار مەن باسپاحانالاردىڭ حالىقارالىق ىنتىماعىنا جول اشىپ كەلەدى. گەرمانيانىڭ فەدەرالدى سىرتقى ىستەر مينيسترلىگى مەن فرانكفۋرت كىتاپ جارمەڭكەسىنىڭ دەمەۋشىلىگىمەن ورتالىق ازيادا العاش رەت باسپا ءىسىنىڭ وزەكتى ماسەلەلەرىنە ارنالعان ەكى كۇندىك سەميناردى وتكىزۋدى قولداعان Frankfurter Buchmesse پرەزيدەنتى يۋرگەن بوسس مىرزاعا ارنايى العىس بىلدىرگىم كەلەدى. ويتكەنى فرانكفۋرت كىتاپ جارمەڭكەسى وكىلدەرىنىڭ الماتىعا كەلۋى ەلىمىزدەگى باسپاگەرلەر, كىتاپ تاراتۋشىلار ءۇشىن ماڭىزدى وقيعا. سەميناردىڭ سالا ماماندارىنا زور اسەرى بولاتىنى انىق.
قۇرمەتتى كىتاپسۇيەر قاۋىم, وزدەرىڭىزگە ءمالىم بولعانىنداي, مەملەكەت باسشىسى «كىتاپ وقيتىن ۇلتقا اينالۋىمىز كەرەك» دەگەن ماقساتتى ۇلتتىق قۇرىلتايدا ايقىنداپ بەرىپ, وزىق ويلى ەل بولۋدىڭ ءتيىمدى جولى كىتاپ ەكەنىن ايتتى, كىتاپ وقۋعا, كىتاپتان ءتالىم الۋعا جانە كىتاپحانالاردىڭ دامۋىنا ءمان بەرۋگە شاقىردى. پرەزيدەنت ءوز سوزىندە «كىتاپحانا مەملەكەتتىڭ, ۇلتتىڭ نەگىزگى جادى. ەلىمىز ءۇشىن تاريحي قۇندى دەرەكتەر مەن ماتەريالداردىڭ دەنى كىتاپحانادا ساقتالادى. سوندىقتان كىتاپحانا ءىسىن دامىتۋعا بەي-جاي قاراۋعا بولمايدى» دەگەن بولاتىن. بۇگىنگى سەميناردا كىتاپ شىعارۋ, ءوندىرۋ, تاراتۋمەن قاتار قانداي كىتاپ جازۋ كەرەكتىگى دە ايقىندالادى. سەميناردىڭ وتۋىنە تىلەۋلەسپىز. رۋحاني قازىنامىز مولايا بەرسىن», دەپ اتاپ ءوتتى مالىك وتارباەۆ.
سەميناردىڭ اشىلۋىندا Frankfurter Buchmesse پرەزيدەنتى يۋرگەن بوسس ورتالىق ازياعا العاش ات باسىن بۇرىپ وتىرعان دەلەگاتسيانىڭ الماتى قالاسىنان العان اسەرىن جەتكىزىپ, قازاقستاننىڭ باسپاگەرلەرى, قالامگەرلەرمەن وسى سالاداعى تاجىريبەلەرىمەن بولىسۋگە دايىن ەكەندىگىن ءبىلدىردى. كىتاپ يندۋسترياسىن دامىتۋ جانە ادەبي ديالوگتى ىنتالاندىرۋ ءۇشىن وسىنداي ءىس-شارالاردىڭ ماڭىزدىلىعىن ايتىپ, سونداي-اق فرانكفۋرت كىتاپ جارمەڭكەسى مەن قازۇۋ اراسىنداعى ىنتىماقتاستىقتىڭ داميتىنىنا سەنىم ءبىلدىردى.
جيىندا مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۇستەم ءالي ءسوز سويلەپ, قۇرمەتتى مايماندارعا جىلى لەبىزىن ءبىلدىردى.
فرانكفۋرت دەلەگاتسياسى قۇرامىندا كەلگەن Mertin Witt ادەبي اگەنتتىگىنىڭ نەگىزىن قالاۋشى نيكول ۆيتت, فرانكفۋرت كىتاپ جارمەڭكەسىنىڭ حالىقارالىق جوبالار مەنەدجەرى بەتتينا بەك, فرانكفۋرت كىتاپ جارمەڭكەسىنىڭ نەگىزگى كليەنتتەرىن باسقارۋ جانە ساتۋ جونىندەگى مەنەدجەرى ۆلادكا كۋپسكا, تسيفرلىق باسىلىمدار بويىنشا كونسۋلتانت, ساراپشى گەرمان ەككەل ارنايى لەكتسيا وقىپ, «Nomad Culture Foundation» قورى ديرەكتورى بايان قابىلاش «اۆتورلىق قۇقىقتار مەن ليتسەنزيالاردى ساتىپ الۋ جانە ساتۋ», «فرانكفۋرت كىتاپ جارمەڭكەسى جانە ونىڭ شاقىرۋ باعدارلامالارى», «Frankfurt Connect جانە Frankfurt Rights» پلاتفورماسىندا سۇراقتارعا جاۋاپ بەرىپ, پىكىر الماستى.
قازاقستان باسپاگەرلەر, پوليگرافيستەر جانە كىتاپتاراتۋشىلار اسسوتسياتسياسىنىڭ پرەزيدەنتى ءادىل قويتانوۆ, جۋرناليستيكا فاكۋلتەتىنىڭ دەكانى قانات اۋەسباي, «باسپاگەرلىك-رەداكتورلىق جانە ديزاينەرلىك ونەر» كافەدراسىنىڭ كافەدراسىنىڭ مەڭگەرۋشىسى, پروفەسسور ايگۇل رامازان, دوتسەنت, اعا وقىتۋشىسى قوڭىر مۇقاتاەۆا باسپاگەرلىك جانە باسپا ىسىنە ماماندار دايارلاۋ تۋرالى بايانداسا, كىتاپ پالاتاسى ديرەكتورىنىڭ ورىنباسارى تولقىن سالمەنباەۆا كىتاپ كورمەسىنە قاتىستى باسپاگەرلەر سۇراقتارىنا جاۋاپ بەردى.
الەم ەلدەرى باسپاگەرلەرىن ءبىر الاڭعا جينايتىن فرانكفۋرت جارمەڭكەسى قازاقستان قالامگەرلەرى, باسپاگەرلەرى, پوليگرافيستەرى مەن كىتاپ تاراتۋشىلارى ءۇشىن كىتاپ جازۋ, شىعارۋ, تاراتۋ ىسىندەگى زاماناۋي جاڭالىقتاردى يگەرىپ, ىقپالداسۋعا مول مۇمكىندىك بەرەدى.
سەمينارعا «اتامۇرا», «الماتىكىتاپ», «مەكتەپ», «فوليانت», «راريتەت», «Arman-Pv», «Qasym kitap», «وتباسى حرەستوماتياسى», «Amalbooks» باسپاسى مەن كىتاپ ساتۋشىلار قوعامىنىڭ وكىلدەرى قاتىسىپ, فرانكفۋرت جارمەڭكەسى تاجىريبەسىندەگى باسپاگەرلىك, پوليگرافيا جەتىستىكتەرى جايىنداعى زاماناۋي جاڭالىقتارمەن ءبولىسىپ, پىكىر الماستى.
بيىل فرانكفۋرت كىتاپ كورمەسىندە مادەنيەت جانە اقپارات مينيسترلىگىنىڭ قولداۋىمەن قازاقستان ستەندى ۇيىمداستىرىلىپ, 300-دەن استام باسپا ونىمدەرى قويىلعان بولاتىن. ايتۋلى شاراعا الەمنىڭ 150-دەن استام ەلىنەن 200 مىڭنان استام كىتاپ سۇيەر قاۋىم قاتىستى.
الماتى
