ءار قالامگەردىڭ وقىرمانعا تانىتقان شوقتىعى بيىك شىعارماسى بولادى. مەرەيتوي يەسىنىڭ سونداي دۇنيەسى – «اقمولا ءۇشىن ايقاس» اتتى ماقالاسى. اۆتوردىڭ بۇدان قالامگەرلىگىن عانا ەمەس, قايراتكەرلىگىن دە كورەسىز. وتىز جىلدان اسا مۇزداي سىرەسكەن تسەلينوگراد اتانعان قالانىڭ بايىرعى اتاۋى – اقمولانى قايتارىپ الۋعا مۇراتبەك توقتاعازين, بەينەلەپ ايتقاندا, ەشتەڭەدەن تايىنبادى. رەسەيدىڭ سوناۋ نيجني نوۆگورود (بۇرىنعى گوركي) شاھارىنا ارنايى بارىپ, ونىڭ تاريحي اتاۋى قالاي قالپىنا كەلتىرىلگەنىن زەرتتەدى. سول كەزدەگى ءوزى مەنشىكتى ءتىلشى بولىپ ىستەيتىن «ەگەمەن قازاقستانعا» دۇركىن-دۇركىن ماقالا جازدى. قالا تۇرعىندارىنان قول جينادى. زيالىلاردى سويلەتتى. ودان قالدى, جۋرناليست-دەپۋتات رەتىندە تسەلينوگراد قالالىق كەڭەسىنىڭ سەسسياسىندا ماسەلە كوتەرىپ, اقمولا اتاۋىن قايتارۋدى شاھار تۇرعىندارىنىڭ عانا ەمەس, بۇكىل قازاقتىڭ تىلەگى ەكەنىن جەتكىزىپ, مالىمدەمە جاسادى. مىنە, وسىنداي تاباندى كۇرەستىڭ ناتيجەسىندە 1992 جىلى قالانىڭ تاريحي اتاۋى قايتارىلدى.
جيىندا وتكىر ءجۋرناليستىڭ وسى قايراتكەرلىگى كوبىرەك اۋىزعا ءىلىندى. عىلىمي كونفەرەنتسيا ەكى بولىكتەن تۇردى. الدىمەن مەرەيتوي يەسىنە ارناپ جولداعان پارلامەنت سەناتىنىڭ توراعاسى م.اشىمباەۆتىڭ, پارلامەنت ءماجىلىسىنىڭ توراعاسى ە.قوشانوۆتىڭ, مەملەكەتتىك كەڭەسشى ە.قاريننىڭ, مادەنيەت جانە اقپارات ءمينيسترى ا. بالاەۆانىڭ, عىلىم جانە جوعارى ءبىلىم ءمينيسترى س.نۇربەكتىڭ, اباي وبلىسىنىڭ اكىمى ن.ۇرانحاەۆتىڭ جانە تۇركىستان وبلىسىنىڭ اكىمى د.ساتىبالدىنىڭ قۇتتىقتاۋى وقىلدى.
ودان كەيىن كەزەك بايانداماشىلارعا ءتيدى. قارىمدى قالامگەر, اكادەميك باۋىرجان ومار ۇلى قازاق ۇلتتىق ۋنيۆەرسيتەتىندە بەس جىل بىرگە وقىپ, ءبىر بولمەدە تۇرعان ارىپتەسىنىڭ ءومىرى مەن شىعارماشىلىعىنىڭ وزىندىك ەۆوليۋتسياسى بار ەكەنىن ازىلمەن ارلەپ, ادەمى جەتكىزدى.
«ونى ءۇش تاراپقا بولۋگە بولار. ستۋدەنت. جۋرناليست. زەرتتەۋشى. ال ءسىز «قايراتكەرلىگى قالىپ قويدى عوي», دەپ داۋ ايتارسىز. كەلىسەمىز. بىراق ونىڭ قايراتكەرلىگى مەكتەپتە جۇرگەندە-اق باستالىپ كەتكەن سىڭايلى. سوندىقتان جاڭاعى ءبىز ايتقان ءۇش ارنانىڭ ۇشەۋى دە قارىمدى قايراتكەرلىگىنىڭ قالقاسىندا تۇرادى. ءبىز ونى بىلەمىز. بىلەتىن سەبەبىمىز, بىرگە وقىدىق. ءبىر بولمەدە تۇردىق. ءبىر اۋديتوريادا ءبىلىم الدىق. و باستان قولدى-اياققا تۇرمايتىن ادام ايتقىسىز جىبىرلاق بالا بولدى ءوزى. ءبىر وزىندە جيىرما بەس اتتىڭ كۇشى بار شىعار. ول «توم مەن دجەرري» ءمۋلتفيلمىنىڭ كەيىپكەرلەرى سەكىلدى كوز ىلەسپەس جىلدامدىقپەن الدەقايدا زۋلاپ بارا جاتادى. كوك بازاردىڭ جانىنداعى توعىز قاباتتى ۇيگە شەتىمىزدەن سۇيرەپ اپارادى. تانىمايتىن ادامى جوق. تىنىمسىزدىڭ تىنىمسىزى. سول توقتامايتىن توقتاعازيننىڭ ارقاسىندا ءوزىمىز دە اقپارات الەمىندەگى اعا بۋىنمەن تىعىز بايلانىس ورناتتىق», دەدى ول. ال پارلامەنت سەناتىنىڭ دەپۋتاتى, باس رەداكتورلار كلۋبىنىڭ پرەزيدەنتى بيبىگۇل جەكسەنباي ءوزى جەتەكشىلىك ەتىپ وتىرعان كلۋبتىڭ ىرگەلى ورتاعا اينالۋىنا م.بالقىبەك ۇلىنىڭ ۇلەسى مول ەكەنىن ايتىپ, كلۋب مۇشەلەرى اتىنان وعان العىسىن ايتتى.
جامپوز جۋرناليست جوعارى وقۋ ورنىن بىتىرگەننەن كەيىن العاشقى ەڭبەك جولىن بۇرىنعى تسەلينوگراد وبلىسىنىڭ قازىرگى «ارقا اجارى» گازەتىنەن باستاعان. مۇندا زەردەلى جاستى قازاق ءباسپاسوزىنىڭ تارلاندارى اقسەلەۋ سەيدىمبەك پەن جومارت ابدىحالىق ەكەۋى قولىنان جەتەلەپ, ء«ومىردى كورگىڭ كەلسە, ءوڭىردى كور!» دەپ, ەرتىپ كەلگەن. سوناۋ كوكشەتاۋدان ات ارىتىپ جەتكەن جازۋشى جابال ەرعاليەۆ حالقىمىزدىڭ ارداقتى ازاماتى ساكەن سەيفۋللين نەگىزىن قالاعان باسىلىمدا قىزمەت ىستەگەن مۇراتبەكتىڭ قايراتكەرلىگى مەن شىعارماشىلىعى تۋرالى پاراساتتى وي قوزعاپ, قازىرگى وتاندىق جۋرناليستيكانىڭ الدىندا تۇرعان مىندەتتەرىنە دە توقتالدى. ء«جۋرناليستىڭ ساناسى, قالامى ەشقاشان توقىراپ كورگەن ەمەس. ويتكەنى حالىق, مەملەكەت الدىندا ءبىز ايتاتىن, كوتەرەتىن ماسەلە وتە كوپ. ۇلتتىڭ جاڭا بولمىسىن, ساناسىن قالىپتاستىرۋ, ونى بۇگىنگى جاھاندىق جاعدايعا بەيىمدەلۋ ماسەلەسىندە دە الدىمىزدا ۇلكەن مىندەت تۇر. تاۋەلسىزدىككە, مەملەكەتكە ادال قىزمەت ەتىپ كەلە جاتقان ەكى ماماندىق يەسى بولسا, سونىڭ ءبىرى – جۋرناليست», دەي كەلىپ, مەرەيگەرگە اقمولا وبلىسىنىڭ اكىمى م.احمەتجانوۆتىڭ قۇتتىقتاۋىن تابىستادى. سونداي-اق حالىقارالىق تۇركسوي ۇيىمىنىڭ باس حاتشىسى سۇلتان راەۆتىڭ جىلى لەبىزىن جەتكىزگەن اكادەميك كارىمبەك قۇرماناليەۆ ونى اتالعان ۇيىمنىڭ احمەت بايتۇرسىن ۇلى اتىنداعى التىن مەدالىمەن ماراپاتتادى.
مۇراتبەك اعامىز «ەگەمەن قازاقستاننىڭ» اقمولا وبلىسىنداعى مەنشىكتى ءتىلشىسى بولعان جىلدارى, باسىلىم بەتىندە جاسىنداي جارقىلدادى. ۇلتتىق ماسەلەمەن بىرگە استىقتى ولكەنىڭ سان الۋان پروبلەماسىن كوتەردى. ەسىمى ەلگە تانىلدى. «قازاق گازەتتەرى» سەرىكتەستىگى باس ديرەكتورىنىڭ ورىنباسارى قامبار احمەتوۆ ءجۋرناليستىڭ قايراتكەرلىك, ۇيىمداستىرۋشىلىق قابىلەتىنىڭ ەڭ ءبىر جارقىراپ كورىنگەن ءساتى, ەل گازەتىمەن تىعىز بايلانىستى ەكەنىن ايتا كەلىپ: «دالىرەك ايتقاندا, باس باسىلىم الماتىدان ارقاعا قونىس اۋدارعاندا ۇجىمدى قارسى الىپ, ورنالاستىرۋ جۇمىستارىنا اتسالىستىڭىز. وسىندا كەلگەن جۋرناليستەردىڭ پاتەر الۋىنا كومەكتەستىڭىز. وسى ەڭبەگىڭىزدى ارىپتەستەرىڭىز ەرەكشە قۇرمەتپەن ايتادى», دەپ وعان باس ديرەكتور د.قامزابەك ۇلىنىڭ قۇتتىقتاۋىن تاپسىردى.
شىن مانىندە, «توقتامايتىن» توقتاعازيننىڭ بويىندا سان ءتۇرلى قاسيەت توعىسقان. ول جۇيرىك جۋرناليست قانا ەمەس, ىزدەنىمپاز عالىم. حالىق جازۋشىسى ءا.نۇرشايىقوۆتىڭ تۋىندىلارى نەگىزىندە كانديداتتىق ديسسەرتاتسيا قورعاپ, عىلىمدا ايشىقتى قولتاڭباسىن دارالادى. بۇگىنگە دەيىن ونىڭ جۋرناليستيكانىڭ وزەكتى ماسەلەلەرىن كەشەندى زەرتتەگەن 2 مونوگرافياسى مەن 2 وقۋ قۇرالى جارىق كورگەن. سونىمەن بىرگە 80-نەن استام عىلىمي زەرتتەۋ ماقالالارى حالىقارالىق عىلىمي جۋرنالداردا جاريالانعان.
ءبىر سوزبەن ايتقاندا, كونفەرەنتسيا بارىسىندا قاناتتاس, قالامداس دوستارى ابىرويلى ازاماتتىڭ شىعارماشىلىعى مەن ەلگەزەك بولمىسى تۋرالى سالماقتى ءسوز سويلەدى. عالىمدار عىلىمي ەڭبەكتەرى جايىندا بايىپتى بايانداما جاسادى. سونداي-اق مەرەيتوي يەسىنە ەۋرازيا ۇلتتىق ۋنيۆەرسيتەتى عىلىمي كەڭەسىنىڭ شەشىمىمەن «كۇلتەگىن» مەدالى بەرىلدى. ال جەرلەستەرىنىڭ سالەمىن الىپ كەلگەن اباي وبلىسى اياگوز اۋدانى اكىمىنىڭ ورىنباسارى ەرلان مولداباەۆ «اياگوز اۋدانىنىڭ قۇرمەتتى ازاماتى» توسبەلگىسىن تابىس ەتتى.
