فوتو: ۇكىمەتتىڭ ءباسپاسوز قىزمەتى
قازاقستان پرەزيدەنتىنىڭ قاتىسۋىمەن 2023 جىلعى جەلتوقساندا دۋبايدا وتكەن سور 28 دۇنيەجۇزىلىك كليماتتىق ءسامميتى اياسىندا جاسالعان مەموراندۋم شەڭبەرىندە بۇگىن استانا قالاسىندا بريتاندىق كومپانيانىڭ 30 جىل بويى ورمان وتىرعىزۋعا جانە كومىرتەگى بىرلىكتەرىن شىعارۋدا ينۆەستيتسيالارىن كوزدەيتىن SEFE Marketing & Trading Ltd. جانە «SAFC» جشس اراسىندا كەلىسىمگە قول قويىلدى.
جوبا الماتى وبلىسىندا 1500 گا اۋماقتا ورمان ەكوجۇيەسىن قۇرۋعا باعىتتالعان. تەرەك, قاراعاش جانە ىلەسپە تۇقىمداردى (توراڭعى, قايىڭ, ەرەن اعاشى, يتمۇرىن, شىرعاناق جانە باسقالارى) قوسا العاندا, 3,3 ملن اعاش وتىرعىزۋ جوسپارلانعان. ىسكە اسىرۋ سۋ ۇنەمدەۋ تەحنولوگيالارى مەن قارقىندى اگروتەحنيكانى پايدالانا وتىرىپ جۇزەگە اسىرىلاتىن بولادى.
بولجام بويىنشا, لاستاۋشى زاتتاردىڭ شىعارىلۋىنىڭ ورتاشا جىلدىق تومەندەۋى گەكتارىنا 26 توننا CO₂ قۇرايدى. نەبارى 30 جىل ىشىندە 1,2 ملن توننا كومىرقىشقىل گازى جويىلادى, بۇل گەكتارىنا 780 توننا CO₂-عا تەڭ. سونىمەن قاتار اگروورمان شارۋاشىلىعىن دامىتۋ, ەكوتۋريزم جانە جۇمىس ورىندارىن اشۋ تۇرعىسىنان ءتيىمدى ناتيجە كۇتىلەدى.
پرەمەر-مينيستر ەكولوگيالىق تەپە-تەڭدىكتى قامتاماسىز ەتۋ بويىنشا بيزنەسپەن بىرلەسكەن جۇمىستىڭ ماڭىزىنا توقتالدى.
«مەملەكەت باسشىسى جولداۋىندا ەكولوگيا, قازاقستاننىڭ تابيعي بايلىعىن ساقتاۋ جانە كوبەيتۋ ماسەلەلەرىنە ەرەكشە كوڭىل ءبولدى. ورمانداردىڭ كوبەيۋى ءبىز ءۇشىن وتە ماڭىزدى. ءبىز ەكولوگيالىق جوبالارعا شەتەلدىك ينۆەستيتسيالاردى تارتۋ ءۇشىن قولايلى جاعداي جاساۋعا تىرىسامىز. ۇكىمەت ەكوجۇيەنى قالپىنا كەلتىرۋگە, كومىرتەگى ءىزىن ازايتۋعا, جاسىل ەكونوميكانى دامىتۋعا جانە باسقا دا نەگىزگى ماسەلەلەرگە باعىتتالعان جوبالاردى قولدايدى», دەدى ولجاس بەكتەنوۆ.
SEFE ۆيتسە-پرەزيدەنتى الەكساندر دەميدوۆ پەن «SAFC» جشس ديرەكتورى يۋري كيم اڭگىمەلەسۋ بارىسىندا جوبانىڭ قازاقستان ءۇشىن عانا ەمەس, بۇكىل ورتالىق ازيا ءوڭىرى ءۇشىن بىرەگەيلىگى مەن ماڭىزىن اتاپ ءوتتى. باستاما – بيزنەستىڭ, مەملەكەتتىڭ جانە حالىقارالىق ارىپتەستەردىڭ ءتيىمدى ءوزارا ءىس-قيمىلىنىڭ ۇلگىسى.
