فوتو: اشىق دەرەككوز
پرەزيدەنتتىڭ ايتۋىنشا, مۇندا كولىك-لوگيستيكا مۇمكىندىكتەرىنىڭ شەكتەۋلى بولۋى كەدەرگى كەلتىرەدى. مىسالى, ەلىمىزدەگى لوگيستيكا مەن ساقتاۋ جۇيەلەرىنىڭ جەتكىلىكتى بولماۋىنان اۋىل شارۋاشىلىعى تاۋارىن وندىرۋشىلەر زور شىعىنعا ۇشىراپ وتىر. سوندىقتان ساقتاۋ ينفراقۇرىلىمىن, سونىڭ ىشىندە ەلەۆاتورلار, كوكونىس جانە جەمىس-جيدەك ساقتاۋ قويمالارىن دامىتۋ ماڭىزدى باعىت بولۋعا ءتيىس.
«سىيىمدىلىعى 700 مىڭ توننا بولاتىن قويمالار سالۋ مەن جاڭعىرتۋدىڭ كەشەندى جوسپارى قابىلداندى. بۇل جۇمىستى ۇدايى باقىلاۋدا ۇستاۋ كەرەك. ءبىز ءداستۇرلى وتكىزۋ نارىقتارىن ساقتاپ قانا قويماي, ءتۇرلى ەلدەردىڭ تالاپتارىنا بەيىمدەلگەن يكەمدى جەتكىزۋ جۇيەسىن قۇرا وتىرىپ, ەكسپورتتى ارتاراپتاندىرعانىمىز ءجون.
وزبەكستان, ازەربايجان, تۇرىكمەنستان, قىرعىزستان جانە اۋعانستانعا جوسپارلى تۇردە استىق تاسىمالداۋ جۇمىسى باستالدى. يران نارىعىنا كىرۋگە رۇقسات الىپ, 250 مىڭ توننا ارپا جونەلتتىك. سونداي-اق قىتايعا, ەۋروپا وداعى ەلدەرىنە جانە سولتۇستىك افريكاعا استىق جەتكىزىلەدى. تەڭىزبەن تاسىمالداۋدى ارتتىرۋ ءۇشىن قۇرىق پورتىندا جاڭا استىق تەرمينالى ىسكە قوسىلدى», دەدى مەملەكەت باسشىسى.
سونىمەن قاتار مەملەكەت باسشىسى جاڭا نارىقتاردىڭ ازىق-ت ۇلىككە سۇرانىس كولەمى ۇلعايىپ كەلە جاتقانىن ەسكەرسەك, سولتۇستىك – وڭتۇستىك جانە ترانسكاسپي باعىتى سياقتى حالىقارالىق دالىزدەردىڭ ءرولى ارتا تۇسەتىنىن تىلگە تيەك ەتتى.
«قازاقستاندى ەۋرازيانىڭ نەگىزگى كولىك-لوگيستيكالىق ورتالىعى رەتىندە قۇرۋ جونىندەگى ستراتەگيالىق مىندەت – مەنىڭ كەيىنگى جىلدارداعى حالىقارالىق دەڭگەيدە جۇرگىزىپ جاتقان كەلىسسوزدەرىمنىڭ باستى تاقىرىبىنا اينالدى.بۇل ماسەلەدە اتالعان دالىزدەرگە ىڭعايلى جول تابۋ جانە ىشكى لوگيستيكانى جاقسارتۋ وتە ماڭىزدى. سوندىقتان الداعى التى جىلدا (2030 جىلعا دەيىن) ءبىز تەمىرجول جەلىسىن اۋقىمدى تۇردە جاڭعىرتۋدى كوزدەپ وتىرمىز. ون ءبىر مىڭ شاقىرىم تەمىر جولدى جوندەپ, بەس مىڭ شاقىرىمنان استام جاڭا تەمىر جول سالۋ جوسپارلانىپ جاتىر», دەدى پرەزيدەنت.
پرەزيدەنتتىڭ ايتۋىنشا, قازىردىڭ وزىندە «داربازا – ماقتاارال», «دوستىق – مويىنتى», «باقتى – اياگوز» جانە «الماتى قالاسىنىڭ اينالما جولى» سياقتى ءىرى جوبالار جۇزەگە اسىرىلىپ جاتىر. بۇل ورتالىق ازيا مەن قىتاي باعىتىنداعى جۇك تاسىمالىنىڭ ارتۋىنا جول اشادى. اۆتوكولىك جولدارىنىڭ جەلىسىن دامىتۋ باعىتىندا اۋقىمدى جۇمىستار اتقارىلىپ جاتىر.
سونداي-اق, جىل سوڭىنا دەيىن «استانا – بالقاش – الماتى», «تالدىقورعان – وسكەمەن», «اقتوبە – قاندىاعاش» جانە «اتىراۋ – استراحان» اۆتوموبيل جولدارىنىڭ قۇرىلىسى اياقتالاتىنى ايتىلدى.
