ۇلتتىق بانكتىڭ ينۆەستيتسيالىق مونەتالارى حالىقتىڭ جەكە جيناق قورىن قۇرىپ, ينۆەستيتسيالاۋىنا ارنالعان. مۇنداي مونەتالاردىڭ تيراجىنا شەكتەۋ قويىلماعاندىقتان, سۇرانىسقا قاراي شىعارىلادى. جالپى, باس بانك 3 ءتۇرلى ينۆەستيتسيالىق مونەتا شىعاردى:
1) نومينالى 1 000, 2 500, 5 000 جانە 10 000 تەڭگەلىك «جىبەك جولى» مونەتالارى;
2) نومينالى 10, 20, 50, 100, 200 جانە 500 تەڭگەلىك «Altyn barys» جانە نومينالى 1, 2, 5, 10 تەڭگەلىك «Kumis barys» مونەتالارى;
3) 2023 جىلى ۇلتتىق بانك «Altyn barys» جانە «Kúmis barys» ينۆەستيتسيالىق مونەتالارىنا رەبرەندينگ جۇرگىزدى. 2024 جىلعى ناۋرىزدا وسى مونەتالاردىڭ ورنىنا جاڭا «Kókbóri» ينۆەستيتسيالىق مونەتالارى ساتۋعا شىعارىلدى.
«Altyn barys» جانە «Kúmis barys» مونەتالارىمەن سالىستىرعاندا, «Kókbóri» ينۆەستيتسيالىق مونەتالارى العاش رەت «uncirculated» جانە «proof» ساپالارىندا, ەكى نۇسقادا ۇسىنىلدى. بارلىق مونەتادا 99,99% (999,9 سىناما) باعالى مەتالل بار. كۇمىس مونەتالاردىڭ سالماعى 31,1-دەن 311 گرامعا دەيىن, ال التىن مونەتالاردىكى 3,11-دەن 155,5 گرامعا دەيىن جەتەدى. وسىعان دەيىن الەمدەگى اسا ماڭىزعا يە ءارتۇرلى تاقىرىپ پەن وقيعاعا ارنالعان ءبىرشاما كوللەكتسيالىق مونەتا شىقتى. بۇل مونەتالاردا ەلىمىزدىڭ مادەني مۇراسى, تابيعي رەسۋرستارى, تاريحي وقيعالارى, كورنەكتى تۇلعالارى, فلورا-فاۋناسى, سونداي-اق سپورتتاعى جەتىستىكتەرىن قوسا العانداعى اۋقىمدى تاقىرىپتار قامتىلعان. جالپى سانى 500-دەن اسا ءتۇرلى كوللەكتسيالىق مونەتا اينالىمعا شىقتى. ولارعا تەك ەلىمىزدىڭ ەمەس, شەتەل كوللەكتسيونەرلەرىنىڭ دە قىزىعۋشىلىعى زور, بۇل مونەتالاردىڭ ساپاسى جوعارى ەكەنىن, تاقىرىبى وزەكتى ەكەنىن بايقاتادى.
